相信係公立醫院生既媽媽都被鼓勵用母乳餵哺，母乳既益處相信大家都知道，小妹就唔再重複去講。而想同大家分享一下剛出世果幾日餵哺母乳要注意既事項，如何退黃疸，防止一連串問題發生，希望為咁多位媽媽走少D冤枉路(小妹深深明白產後果種情緒既不安，BB有咩事都會情緒崩潰)小妹自身經驗：BB出生之後果幾個鐘，就需要餵哺母乳，而公院一直都係鼓勵你埋身去餵哺。小妹BB一出世係櫻桃小嘴，唔知點解個口張幾都唔夠大，乳頭根本就好難塞得入。但由於小妹用手擠少少已經有奶，所以姑娘都鼓勵我繼續比BB埋身啜，仲讚小妹好快上到奶，結果小妹傻更更咁樣餵左BB 3日2夜。另外再用尿片去分辨BB係唔係食得足，而小妹被灌輸既認知就係有痾濕同便便就OK。到左出院後回家既第一日，係老人家既思想灌輸下，堅持BB喊先餵，結果BB成5-6個鐘先埋身餵一餐。第二日去到健康院檢查時就大穫⋯⋯BB體重不但輕左好多，而且黃疽指數高，於是即刻refer我地返公院跟進，當時已經要擺低BB過夜照燈，係果一刻相信岩岩生完三日既你已經崩潰，小妹不斷自責咁喊。正當你以為第二日可以接返BB出院(通常照燈一日第日黃疸水平就下降)，小妹係凌晨2點收到醫院既電話，話BB發燒，醫生解釋唔到個原因，只係話有可能係照燈溫度過高，亦有可能係細菌感染，於是要即刻決左做腰椎穿刺加種菌，係果個moment根本係一片空白，只好跟住醫生決定去做。BB得果3日人仔，身為呀媽既我十分心痛。由於一直都係等緊報告，BB未出得院，醫院會提供水奶比BB飲，有幾隻牌子可以選擇，小妹就撰左美素佳兒。另外醫院都會提供玻璃奶樽比母乳媽媽，小妹就一直泵出黎叫老公拿去醫院比BB飲，如奶量不足，姑娘會幫你補水奶。BB留院一星期後，終於出左報告，結果就話BB有尿道炎，要食抗生素同之後做進一步覆診檢查，不過黃疸已下降到安全程度可以出院。打完以上文字，小妹又開始眼濕濕⋯⋯不過想同大家分享既係BB有黃疸其實係好正常，但只要確保BB係食得飽同埋有足夠屎尿濕片就OK。而家小妹回憶返一連串問題，都歸咎於BB一開始係食唔足。所以如果媽媽係餵母乳可以參考我以下做法，希望幫到大家走少D冤枉路。1. 手擠/電泵奶出黎，然後用針筒/杯比BB飲返，一來可以確保BB飲得到，二來確保BB飲得足。雖然好多人會話比BB吸啜幫助上奶，但其實用手擠或電泵出黎都可以刺激乳房造奶。另外BB剛出世頭果幾日真係懵懵下，好難一下子學習到吸啜技巧，小妹BB係住完醫院飲完奶樽後個口竟然可以開到好大，之後埋身餵就好順利，諗返之前點整BB個口都塞唔到乳頭入去就覺得冤枉。如果媽媽真係冇奶或未上到奶，媽媽千萬要同姑娘堅持餵水奶/補奶粉，雖然母乳係有較大益處，但如果食唔到就咩都吸收唔到。2. 每一餐都要按時間餵哺，2-3小時就好食一餐。初生BB有黃疸係好懶訓，我相信好多老人家都冇咁既知識，佢地喊先餵既理論係應該等到BB完全退黃先可以應用。BB如果食得足夠就好快退到黃，而2-3小時一次係岩晒初生BB胃容量。所以媽媽一定要堅定，唔好聽長輩講。3. 留意濕片重量同大便顏色。小妹係醫院比姑娘灌輸既觀念就係有冇痾尿，有冇痾屎，如果有就OK。直至去到健康院，原來條濕片係要去到聚手先代表BB食得足，所謂聚手感覺係拿起上手覺得重就OK。另外，BB係頭果幾日應該要有黃色便便，BB一直痾緊墨綠色胎糞，小妹仲以為係正常⋯⋯最後補充返小妹BB覆診結果都只係話懷疑BB有尿道炎，因為含菌量根本不足。但係疫情高峰期下加上坐月中，不斷進出醫院覆診檢查真係人都癲，而且BB咁細個就做咁多檢查，真係好心痛。但為母則強，小妹會繼續加油！
