小妹又失蹤左一排，大家放心，只係寶寶出左世了⋯⋯大家都知當新手媽媽頭果幾個月係幾忙，而家終於有時間忙裏抽空同大家分享下心得。小妹實在有太多野想同大家分享，趁記憶猶生，小妹會加快腳步更新，大家都知一孕傻三年嫁啦～哈哈有睇小妹上一篇文，都知道有邊D物品係要帶，而家就同大家review一下是否必需啦。-媽媽袋 1. 產婦衛生巾 x 3包 (按照廣華書仔指引，小妹帶左3包，一包有10片左右。廣華沒要求扣或貼，所以小妹帶左2包扣1包貼）小妹覺得產婦衛生巾同普通M巾係冇分別，雖然佢話吸收能力多D，但小妹見惡露同平時M量差唔多，所以建議可以用M巾來取代。如果真係要買產婦衛生巾，建議買貼，因為新手媽媽真係唔會識用扣，而且千祈唔好指望醫院D姑娘姐姐幫你。2. 網褲 x 1包 (5條裝)小妹覺得用舊底褲已經OK，因為網褲貼上衛生巾好易會走位。3. 沖洗瓶 x 1瓶沖洗瓶是必需的，由於下面有大量血，係醫院真係好難沖洗，所以要用沖洗瓶沖乾淨先唔會UP住唔舒服。4. 消毒濕紙片 x 1包 (疫情期間好多野都要抹乾淨，絕對有用)小妹用黎抹枱、抹手，好方便。特別係廁所好遠，有傷口行黎行去洗手真心累。5. 濕便紙 x 1包 係生完第2日，醫生會成日問你是否有去到大大。所以正常來說你係會有大大去，用沖洗瓶初步沖完，可以用濕便紙再抹，咁就更加乾淨衛生。6. 抽取式面紙 x 1包抹口，抹野、去廁所等基本會用到。7. 個人用品 (牙膏、牙刷、護膚品、毛巾、防滑拖鞋等)其實除左防滑拖鞋會用到，其他小妹都冇用。生完真係好攰，仲要唔掂得生水，2至3個鐘餵1次人奶，根本唔會有多餘時間同心力去做，小妹餵奶換片掃風後，連休息時間都冇，就話要食飯，食完又係下一個循環。8. 備用口罩 x 2-3個小妹住醫院時姑娘會每日比一個你更換，當然只是普通口罩，不是KF94果D。9. 保暖衣物 (長襪、外套、帽)醫院冷氣真係好凍，但醫院會提供袍仔比你穿，所以唔怕冷。而以上物品小妹出院時都有用。10. 奶墊 x 10片 ＋ 哺乳BRA (餵人奶媽媽）岩岩頭果3日其實真係唔會咁快上奶，所以大家都可以唔洗執奶墊去醫院。至於人奶BRA，小妹住院期間係真空既，入面全部都係醫生姑娘冇話尷尬，只係出院時帶返BRA走人。11. 安睡褲 x 2包 (出院方便穿)小妹覺得安睡褲係最方便，始終M巾係有機會走位，而且量大會整污糟褲，小妹就係醫院不斷比姑娘話要褲啦。所以建議直接用安睡褲去代替底褲＋M巾。12. 炒米茶 x 5包由於醫院政策唔會提供滾水，所以小妹係冇機會沖到炒米茶。小妹做法係叫老公直接係屋企沖好拿過黎。13. 保溫瓶用黎飲暖水。14. 尿袋 (由於要住3日2夜，上網爬文係冇得直插充電，所以建議帶備一個尿袋)由於最後小妹去左瑪嘉烈生，所以係有得用插頭直接充電。- BB袋1. NB尿片 x 1包 (約20-30片）20-30片量已夠。2. 乾綿巾 x 1包用黎餵奶後幫BB抹口。3. BB濕紙巾 x1包記得係要帶大張BB濕紙巾，因為用黎抹patpat面績較大。4. BB出院衣物 (衫一套、手套、帽、襪同包被）由於醫院冷氣太大，建議帶一套厚身少少既衫比BB穿，加埋一條厚身既包被已足夠。（這個只是FOR夏天出世BB，冬天出世BB請媽媽自行再添加）至於帽、襪小妹冇用過，因為醫院已經有提供帽，包被更係包住腳，唔需要用到。5. 廚房紙 x 1卷其實呢樣野應該係放落媽媽袋到，因為小妹用左黎印乾沖洗瓶D水，十分有用，唔會甩紙醉搞到下面都係。由於最後小妹由廣華轉左去瑪嘉烈生產，所以最後review可能都有少少出入，但基本上公立醫院都係大同小異，所以大家可以根據我個review再去執下走佬袋。當然如果有D物品醫院話一定要用，請媽媽都帶定先，以防萬一。
