有睇過我前面咁多篇文章都知道小妹家中大大小小都係淘寶返黎，咁的確有D真係會中伏，為左大家唔中伏，小妹都堅持要用過先介紹比大家。小妹由細到大既早餐都要有一杯牛奶/豆漿，由於自細被灌輸飲咖啡奶茶對皮膚唔好，所以傾向都係撰牛奶/豆漿。牛奶而家既價錢最便都要5-6蚊一包，所以小妹係一年前就開始轉飲豆漿，每次都係襯AEON特價星期三去搶購，飲飲下就發覺其實都幾貴，而且日日飲咁多外來野唔知對身體有冇影響。於是就決定買一部豆漿機返黎，係香港睇過200-300mL容量已經成300-400蚊港紙，仲要整多次先夠份量，好麻煩。於是我就奔向我地偉大既淘寶，有留意開，都知道出名既豆漿機係黎自九陽，膽粗粗就襯雙11買一個返香港啦。果時因為係做緊雙十一優惠，所以到手既時候其實只係309蚊人仔，計落只係364蚊港紙就買到。小妹因為買左一隻綠色既水煲，為左唔搞亂，於是就撰左粉紅色。撰呢款原因係一次可以整到400-600mL，因為我地屋企有2個人飲，基本上整一次就OK，而且佢完全唔需要浸豆，用佢提供既量杯盛滿豆，加水至600mL，按煮既功能就可以，整豆漿時間大概係25分鐘左右。呢樣野當然唔係小妹睇中佢既原因，而係有預約功能，8個鐘後就有豆漿出黎，基本上你訓覺前整好，起身就有得飲。小妹收到後，覺得質地唔錯，係有少少磨沙感覺，唔似水煲膠面擺係廚房容易黏油，大小跟普通水煲差唔多。至於大家擔心既轉插問題可以放心，佢既插頭同家用電器一樣，基本上借隔離電飯煲果個3腳線一用就OK。佢附送一個量杯、一支擦頭清潔同一個奶茶隔網。運作的時候佢會有打豆既聲音，但係我覺得可以接受，小妹放係同睡房相差2米既廚房都沒被嘈醒。小妹覺得有打豆聲係正常，佢唔發出聲點知佢運作緊。相反我好懷疑冇聲果D係點磨爛D豆。由於豆漿機已經有加熱功能，你係唔需要再煲滾，只係倒出黎加糖就可以飲得。如果你唔鐘意有豆渣既感覺，強烈建議你用煲湯魚袋去渣先好飲。小妹係接受唔到個喉嚨有磨沙感覺。千奇唔好用奶茶隔網，個網太大係無用既。小妹仲未試其他功能，如煲粥、整果汁等，唔知效果如何，溫馨提示其他功能係冇預約既，只有豆漿功能先有。咁小妹開始時都係打算只整豆漿，就豆漿呢個功能，表現十分不錯。最後親話晒圖就有LINE 杯送，有熊大/SALLY 隨機款，或者可以撰退款15蚊。咁我當然撰退款15蚊啦，運杯落黎好易爛，而且又要比運費，一D都唔抵。所以減埋呢15蚊，其實呢個豆漿機300蚊人仔都唔洗，目前我用左一個月都未壞。如果大家想買豆漿機不仿可以一試，有問題歡迎留言比我～下次再同大家推薦其他寶物～～
