好耐都冇同大家更新過,原因就係小妹係呢個月已經完成左收樓、搬屋同結婚。雖然係忙到喊出黎,但係而家可以舒舒服服同大家更新BLOG,小妹覺得好幸福。呢個月經歷左太多野,希望之後有時間再同大家慢慢分享。而今次就先同大家分享小妹上車買樓最終章之收樓篇,小妹按時間同大家分享下呢一日做野D咩啦......上網有爬文都知道通常經紀等對家律師通知收到錢先會比鎖匙你,估計都要4、5點後,但今次經紀竟然可以比我地提早下午1點上去拜四角先,呢樣野真係好心心眼。但大家要記得既係拜四角係要擇日子同撰時晨,當然你可以搵專業師父去做,亦都唔一定係收樓日做,但小妹只係咁岩收樓日係好日子同好時晨就可以一次過做埋,上網有好多萬年曆網址大家可以去參考,或者屋企有本日曆簿都可以直接睇。小妹果日就係1點至3點係好時晨,所以就約左經紀下午1點開門比我地。早上既時候當然要準備拜四角既用品,小妹上網爬左好多篇文章,真係各處鄉村各處例,小妹都只係抱住做儀式準備左以下既野,同大家分享一下,大家可以按自己要求加加減減。雖然係話拜四角,但計埋中心點係五個地方,所以有時聽到人講係拜五角。以下份量都係按5份為單位。1.蘋果x5隻 (每隻角放1隻)2.橙x15隻 (每隻角放3隻)3.糖一些 (平均分配5隻角)4.花生一些 (平均分配5隻角)5. 紅蔔白一條 (切5舊)6.芽菜&豆腐卜&豆腐 5份 (同舖頭講話用黎拜四角,佢會同你執5份,因為小妹係係鬼節期間,所以需要額外準備這些,唔係鬼節間拜四角可以怱略)7.拜四角衣 (5份)&地契紙 (1份)8. 茶一支 (中心點擺3杯茶)9. 肥豬肉5份10. 香燭 5份 (每角3支) +大香燭 3支放中心點準備晒好呢D物品後,要係地契紙到寫上今日農曆日子、樓既地址同屋主既姓名,如果唔識可以叫香燭舖幫你填,之後就將以上每樣東西擺位,通常買既時候已經叫人分好晒,咁樣可以直接擺位。除左中心點要加3支大香燭、3杯茶、舖好紅色紙,其他四角都係擺放同等份量一份。記得係要順次序咁大門開門方向順時針咁擺,直到中心點。物品放置後,記得插香落紅蔔白上,然後口中唸合家平安,事事順利,說明自己係屋主,祈求保佑,直至中心點完成,中心點記得要加大香燭3支。(小妹覺得呢D儀式不易影相分享,所以有咩唔明大家可以留言問小妹) 直至香燭燒完,就可以收拾物品,拿紙衣去化寶及將拜完神物品棄置到遠處。(由於物品是拜神用,小妹唔敢食返,所以大家唔洗買咁貴既生果/糖等)搞掂完拜四角,小妹就會去地產舖問問幾時可以拿鎖匙,經紀就幫小妹打電話比對家律師,確認過左數就會比鎖匙你,之後當然要比埋1%經紀佣金,直至呢個時候,你同經紀關於已經完結。所以記得係收樓日前,追經紀幫你做好佢既野,小妹就叫經紀幫我地搞埋水電過戶,雖然自己可以上網搞,但你係比左錢經紀,無理由唔用個service。直於煤氣,因為小妹間屋個錶係係屋內,唔係中央抄錶,所以要抄低自己個度數,然後拿埋律師果封證明信去煤氣公司到搞過戶手續就OK。通常水電煤呢D都係要交幾百蚊按金,直至你退戶。做完咁多野後,我相信大家當日已經是筋皮力盡,但記得一定要去換返個鎖匙,始終唔知有幾多個人有你屋企鎖匙可以隨時上黎。當然,仲要去屋苑管理處更新住戶資料。小妹果日仲要買左好多清潔用品黎清潔,仲有搬左少許物品入新屋,希望可以係結婚前搞掂,所以真係忙到喊出黎。無論之前有幾辛苦,而家終於有自己個安樂窩,拍手⋯⋯呢篇係小妹買樓篇最終章,如果大家買樓到收樓有咩唔明,都可以留言話我知,小妹之後再同大家分享結婚/裝修等事。多謝大家呢幾個月陪伴小妹買屋收樓既經過~~~