同大家打聲招呼先，因為差唔多成1個月都冇出POST，原因就係小妹已經轉入直路，係下個星期就會收樓啦，拍手～～～收樓前大家都會睇下買咩傢俬，作為一個精明既消費者，緊係每買一樣既時候都要貨比3家啦。所以小妹都用左好多時間研究，而家就等小妹我同大家分享下買傢俬心得啦～香港實體店小妹有行過香港好多實體店，但真係款式唔多，睇左好多都唔係好岩心水，而且質地係好渣，大多都係"顆粒板"，我地會叫佢做"豆渣板"，價錢都要幾千蚊左右。所以小妹到最後已經放棄係香港買傢俬，轉去我地偉大既淘寶搵親。當然香港實體店好處就係好多都包運輸同上門安裝，而且有實物睇，對於有D人黎講都係好方便，所以如果你地睇岩款式，又對木材冇咩要求，其實香港實體店傢俬都唔錯，而且好多時都有開倉價好便。(當然你有預算，係香港可以搵到岩款又靚木啦)淘寶至於小妹因為係香港搵唔到岩既款式，而且未來老公都對木材有要求，所以我地決定去淘寶會一會親。結果發現其實淘寶真係有好多款式，而且好多都係實木，相同既香港價錢已經係淘寶買到實木。不過大家買既時候都一定要注意買家評價同買家秀，大家都知道淘寶好多都良莠不齊，唔比較下好容易中伏。而且大家一定要"自量"，因為淘寶運落黎香港係唔包安裝嫁，大家可以叫親提供安裝視頻或者圖紙，再考慮下自己係唔係搞得掂先好買。另外，要問下親需要咩安裝工具，如果需要到電鑽咁大工程，都要自行行量。小妹未來老公係做工程，所以對佢黎講係easyjob。當然，淘寶買傢俬大家都會話有白蟻等昆蟲，但其實香港好多公司都係係中國拿貨，好多時候其實都係同一間直銷倉黎。小妹因為未收到實物，所以收到之後再同大家評價下。另外因為咁遠水路運落香港，其實真係好難避免會有損壞，所以大家要承擔一下風險。(PS好多間運輸公司都唔包損壞，只係包唔見野)淘寶運輸講到淘寶運輸方面，大家記得一定要選一間可以收傢俬既公司，因為唔同集運對收貨都有唔同要求，小妹已經完美咁中伏，買左梳裝檯，淘寶官方冇話唔比買，買完後又話大理石/鏡子易碎品唔收。結果小妹要中途轉地址去別家私人集運，搞到一頭煙，所以大家撰收貨地址時最好聯繫運輸公司，提供重量/包裝，等佢地決定收唔收。另外，價錢收費真係要大家自已比較下，有D係按包裝計，有D係按重量計，所以真係要視乎你果件貨係咩，小妹撰果間MIN CHARGE已經係300蚊，所以運得多同重就會比較抵。由於小妹仲未收到淘寶傢俬實物，如果搵到好既實物同運輸公司之後再同大家分享～～希望大家多多支持我既BLOG：）附上一張小妹鐘意既實木傢俬圖～～
