其實好多男仔成日係到ff一個肯陪自己捱譚仔既女神出現 講到而家啲女仔好似全部都係港女又拜金咁 . 事實上好多女仔真係唔介意做俾錢既一方 更加願意同男朋友食cheap野 話就話女仔中意相機食先 但絕對唔係個個女仔願意為左影張所謂既靚相 花個半鐘時間去排Lady M嘆件食完等於冇食過既蛋糕 其實你女朋友係吾會介意陪你排個半鐘食碗雞肉墨丸三小辣加杯凍檸茶再配碟蒜泥白肉 只要身邊係你愛既對方 真係食咩都冇所謂 . 日子耐左 你地會發現諗食咩呢個咁小既問題變左個難題 可能只係掙扎究竟食大家樂定食日本野好? 係呢個時候你一句你中意啦冇所謂食乜都得 即使女方有幾想食日本野 都會出聲講句不如食大家樂啦 唔好成日食咁貴啦 但係錫女朋友既你知道佢明明係想食日本野 最後都會帶佢去食 . 慢慢開始你覺得自己個荷包越黎越輕 作為學生既你開始係到諗對方會吾會嫌你窮嫌你冇錢? 自己又未出黎做full time 一個asso仔打份40令蚊既垃圾part time點帶女朋友去食好野? 有時女方明白到呢點都會提議下不如今餐我俾啦/一係AA啦 好多男仔就係為面子 怕對方覺得自己好冇用咁 連食飯都要女人俾 所以都會話唔洗啦 傻豬黎既我俾得啦 . 吾知點解拍拖既定律好似變到吾跟住做就叫唔正常咁 就好似拍拖一定要食貴野/食飯一定要男仔俾 話就話拍拖唔應該去計較咁多 但其實邊個話一定要跟啲所謂既拍拖定律? . 最緊要都係搵岩一個大家都覺得舒服既相處方式 有時男仔不妨可以試下同你既另一半講下自己既諗法或者有冇咩金錢上既困難 等對方可以明白你知道你諗咩幫輕下你 女朋友其實唔係你諗到既咁吾成熟 分分鐘佢仲成熟過你 其實食啲咩同邊個俾又有乜所謂 最怕隔離果個唔係你姐~ 8laah.life ig: http://www.instagram.com/8laah.life/ 8laah.life fb: http://www.facebook.com/8laah.life/
