Dr wu 18%杏仁酸亮白煥膚精華，快速去印嘅效果，我大概喺20歲果陣就親身體驗過。 仲記得果陣係因為皮膚第一次有暗瘡印（我20歲之前皮膚好靚的），日日照鏡好不爽，因此就畀錢買咗。 果陣未返工，冇錢錢，所以只係想搵啲平平地又有用嘅去印產品，於是上網做功課，見到Dr wu 18%杏仁酸亮白煥膚精華，個個都有讚無彈，而且15ml都係百令蚊，好平！ 我仲要搵咗好耐都無得買，直到去咗元朗廣場某間細細美妝店先搵到。一用之下，真係有驚喜，唔係講笑，用完第2日即刻明顯見到啲印淡咗！（好多年前，無圖） 果陣用咗一排就無哂印，就無再用，但後來大個仔，可能因為壓力大，腸胃唔好，唔知點解，暗瘡又愈來愈多。 直到呢排，我又為咗暗瘡印而煩惱，於是即刻醒起呢隻去印專家，Dr wu 18%杏仁酸亮白煥膚精華了！ DR.WU 18%杏仁酸精華，用咗大半先記得影相~ 我都循例講下杏仁酸係咩黎先，其實杏仁酸係果酸嘅一種（你一定聽過果酸煥膚~），杏仁酸萃取自苦杏仁，係喺咁多種果酸（甘醇酸、乳酸、蘋果酸、酒石酸、檸檬酸）之中，對皮膚最溫和嘅一種！ 果酸類產品大部份都係偏水溶性，不過杏仁酸因為分子量同結構脂溶性較高，更容易吸附在角質層，係慢慢咁滲入皮膚，所以就比較溫和。 杏仁酸主要有「美白」同「去角質」兩用，可以去印，亦可以清除黑頭粉刺同收毛孔，甚至淡到皺紋同色斑等等效果。而杏仁酸有分5-30%嘅濃度，效果都係因人而異，有啲人可能需要較強嘅濃度先有用，而我用Dr wu 18%杏仁酸亮白煥膚精華就好足夠了。 20歲試過，26歲再試返，可能我啲皮膚同我一樣，經歷得太多野，再用返嘅效果係無以前咁好，咁一鳴驚人，但都幾有用的！ 我嘅步驟：洗臉乳>爽膚水>Dr wu 18%杏仁酸亮白煥膚精華>乳液（有錯請指正..） 我隔2-3日夜晚就會用一次，每次滴2-3下就OK，大概用咗兩星期就有明顯效果，有啲大粒少少嘅暗瘡紅印好快就消退！ 但可惜嘅係去到暗瘡印，但就唔係好抑制到暗瘡嘅生長，所以我都要繼續搵唔同嘅方法去搞暗瘡...:( :( 溫馨提示：用完果酸之後記得一定要多保濕，尤其係皮膚敏感嘅朋友，最好早晚都搽保濕同防曬，記住唔洗日日用，日日煥膚你皮膚都頂唔順啦~ 強烈表示單手好難影相，每次滴2-3下就OK~ 效果：●●●●○ 抵買度：●●●●● 回購率：●●●●○ Facebook : https://www.facebook.com/8goalman/ +1個like代表您對我的1份支持+
