有舊同學番黎日本，係上星期就跟住2個日本老師去左明石一日遊啦。大阪由梅田去明石都要坐成個鐘頭車，對我黎講真係出城。 呢張阪神pass 1500yen 可以一日內由大阪到神戶同明石冇限坐，當中包括左有outlet的地方。 到明石之後就去附近ge商店街，因為入面有好多好野食。明石燒之外就係食海鮮啦。不過呢到唔係食生野ge，最主要就係食章魚！ 其實一開始我真係有d試食過度(笑）…呢到好多店都可以試食，最後唔好意思當然比錢買啦XD 呢到ge章魚真係超好食又易咬。 呢種類似韓國魚餅的都係呢到熱賣。掃完街其實已經夠飽。 手信部都係章魚ge天下，不過個d晒乾章魚其實都唔平。同埋好似外星人（驚）之後中未夠飽我地就去食明石燒！ 日本人話呢間係最出名，850yen（冇記錯）有20粒。其實明石燒係章魚燒個親戚，唔係搞gag…蛋ge比例比較多，可以配湯食。 我地一盤2個人食。其實係大阪食過覺得唔好食，果然係明石ge明石燒先係正宗。好好味呀～～話說我地入左去冇幾耐出面就開始排隊，所以真係要早去早食。 下一站我地去左舞子公園，上明石大橋。之前去研修旅行我地去過明石大橋另一邊坐船睇鳴門漩渦。今次係陸地上睇清楚呢條橋。唔好問我點解背晒光（笑） 公園好靚，文青可以影1000張相。上橋都只係幾百yen，不過唔建議係秋風起去，因為又大風又凍。 上左去可以清楚睇到橋的結構，橋上中有休息站可以係坐下。不過畏高者要考慮下，佢有小部分係玻璃底而且條橋都幾震。 最後一站我唔記得自己坐車去左邊，因為係臨時決定參觀酒廠…都冇咩影相因為我本身唔好日本酒。 參觀酒廠對酒鬼黎講就係可以免費試飲…而我最開始就係有得食日本酒雪糕。 完。 つづく －－－－－－－－－－－－－－－－－－－－－－ 更緊密的無聊事請看面書： https://www.facebook.com/ami7.sevenkahei/
