幾日冇打，今日呢篇好長。 本來今日計畫去傳說中的姬路城，但係天色唔好，神戶個邊中好似落雨，所以下午決定去搵韓國野食。你一定想講呢條女痴線嫁開口埋口都食韓國野但就去左大阪留學… 香港係尖沙咀有韓國街，大阪個條韓國街就係鶴橋（つるはし）。去日本旅行點會想食韓國野，但係到住有時想轉下口味就要黎呢到。（ok我知我由頭到未都係食泡菜！） 我只係坐到幾個站就到，咁方便之後都一定會再黎啦。感覺呢到比較舊，入黑應該會比較雜？我唔清楚，但我一個女仔去陌生地方都係會保持警覺。呢到條商店街中好有花園街feel囉，衫個d就完全唔岩買嫁啦，黎到都係因為要食野姐。 點解唔食壽司要食紫菜包飯姐？因為我真心中意食XD 其實中有碟泡菜煎餅，但我兩下就食晒。有片為証。 https://youtu.be/Qld4RxOQHQg 有大量韓國野買之外，中有個街市，總之就好多野買啦…但我食飽之後係咩都冇買走。事關我已經打算，想食咪即刻黎食洗咩買番屋企姐。 食完野緊係順便行下街，行行下心血來潮要剪頭髮。冇計我日日見到自己甩d頭髮就想喊，又打晒結。加上之前成日染色。同埋可能我真係太多頭髮，長頭髮唔係好岩我啦。學校附近好似有間都幾平就去問，點知今日full booking，我都明星期六。所以就繼續行，ABC MART又有特價啦，但姐姐心中只係得剪頭髮三隻字。 繼續行下街…我好中意呢個設計師，呢到有齊佢d tee同totebag l0l好想要呀～次次有呢個情況出現我係會決定走人，免得自己失心瘋。所有想買又不能買，我都會映低佢，放上黎～～～～ 最後最後，由於太想剪啦係屋企附近搵到間，其實係我日日都經過XD 我係香港剪開80蚊是但剪…（我講出黎都冇朋友信）黎到其實貴小小我都唔mind因為呢到服務係好好，好到我好唔自在。 我一黎就話想剪短，個髮型師小姐就好擔心我後悔問左我好多次好多次係咪真。之後係雜誌上搵左一個我大概想剪的長度。其實我想電埋髮尾但因為未試過驚懶野…洗頭個時一直係到同我呢個日文有限公司傾計，之後佢會因你ge打扮同埋由於我係留學生啦，比左d旅遊書同雜誌我解悶。最驚喜係有按摩服務…唔好諗衰野，係幫你鬆下博頭啦。 我只係普通剪連埋set頭都係個半鐘ge事，我d頭髮多到嚇親個髮型師…有時佢剪剪下會同我講可愛い，OK！但我知我一d都唔可愛い。係剪得好ge，但我唔可愛い。到目前為止有時都唔習慣日本人個種客套到好假的感覺。好啦，可以講係禮貌啦，我都明。講到set頭佢真係張我個頭set得太型，我出門口行去第二個街口都要搵塊鏡整番好個頭。 佢地比左d優惠卡我，總之只耍我一直幫襯就會有優惠。由於咁近，而且佢地服務都好好又剪得唔錯，所以我應該之後都會再去。問題係佢吹到我個頭好好睇而我自己應該吹唔番XD 我相信洗完頭我會變左小丸子… つづく
