上回講到係大草原嘅騎馬活動，其實佢唔係單純騎馬，中途會經過兩三個景點，然後俾我哋落馬影下相。上圖就係第一個景點敖包山，敖包係蒙語解石頭，即係一座用石頭堆起嘅山，用嚟祈福，同埋喺大草原上當成座標，零research嘅我一開始以為真係一座山。不過其實呢個算係比較細，上google搵見到有啲再大座啲，感覺有氣勢好多。 然後經過呢度嘅「沼澤地」，同我地認知嘅沼澤都差幾遠 lol，不過當地人係咁叫的。 之後去咗個買土產嘅地方，就騎馬返起點啦。成個行程本身預大約半個鐘，但最後好似行咗差唔多個令鐘，下半身都有少少攰，所以冇乜騎開馬嘅人唔好貪心騎太耐啊。 然後就繼續草原體驗旅程，去「蒙古人家」食下地道小食。點知「蒙古人家」都係啲專搭俾遊客睇嘅景點，小失望嗚嗚 :( 不過終於近距離見到第一個紮出嚟嘅蒙古包啦! 內裡都幾骨子 嘢食方面炸粿子非常好吃，都係配返碗內蒙奶茶，草原呢杯好味過酒店嗰杯。 通常去得啲咁民族風情嘅地方，點會少得...... 去放羊了，勿念 住宿方面係我報團開始就一直期待嘅蒙古包體驗。不過現實總是殘酷，我哋旅行團安排咗住商業化渡假村，蒙古包係石屎造的:( 不過又未至於好差，設施甚至比我預期中好，六點前有熱水沖涼，又有冷暖空調，高床軟枕 趁入黑前去草原留下影 晚餐方面有自費全羊宴，由於我出發前意外洗咗幾百蚊，所以冇加錢食到... 因為全羊以前係皇室貴族喜慶場合先有得食，所以每枱都要派一對夫婦出去扮皇爺皇妃結婚lol 雖然冇食到呢餐全羊宴，但係酒店都有機會食吓羊肉鍋，我想講嗰度啲羊肉真係唔同啲，無羶味，幾香甜肉嫩。 臨出發之前，聽人話內蒙係冇菜食，仲擔心腸道唔健康，買咗啲水果乾去食。點知所有擔心都係多餘，冇加錢食全羊嘅人成枱都係菜 lol 入黑之後我哋都係蒙古包入面休息，本身想睇吓星，但真係好凍，同埋唔知係咪渡假村太光，睇唔到好多。夜晚嘅大草原氣溫同日頭差好遠，我係室內著住厚衛衣瞓，無開暖氣都還可以，不過有團友話佢哋嗰間房凍到開暖氣都唔掂，所以最好帶啲保暖衫去著。 瞓咗幾個鐘就出去迎接內蒙的日出! Outfit of the morning lol 我著咗四層衫，包括一件薄羽絨同保暖大褸 美麗的晨光:) 下一篇去沙漠! - 相片謝同行友人阿徐 -
