第一趟日本親子自駕遊,我地選擇咗由東京出發,沿住海岸線一直玩到落伊豆!近郊地區地方大D,小朋友玩得開心D,往伊豆方向走,大人又可以沿途望住個海,忙碌照顧小朋友之餘,都可以俾大海療癒一吓。值得一讚嘅係兩個細路都好合作,車程途中都係食吓水果/零食同補吓眠,真係冇乜扭計,減少咗大人唔少煩惱。 同時極力推薦大家如果爸爸/媽媽識揸車,去日本記緊要自駕遊! (如果你嘅行程唔係僅限於東京鬧市內的話)因為當你有架車,車尾箱就成為你多一個儲物空間,我地呢趟日本之旅,除咗MIMARU係住3晚,其他酒店都係 每 晚 唔 同 ! 而行李策略就係將每晚要用嘅物資放晒喺同一個喼,戰利品就盡可能放車尾箱,留 到最後一晚先一次過執入喼。咁每晚check in酒店,就只需要拎一個喼就可以了,方便好多!同埋有架車代步,小朋友玩到累就可以上車休息,仲可以食住野咁睇風景,真係容易控制好多咖~ 跟以往計劃行程一樣,我都係先資料搜集有咩地方想去,就加晒落Google My Map,之後再慢慢篩選,再畫條路線圖出嚟~以下係我地今次行程嘅主要checkpoints:東京都 品川Maxell Aqua Park集合光與影嘅東京市區內水族館,較多日本當地人會去,海豚表演非常精彩,勇者唔怕濕身建議可以坐頭幾排,不過底褲都濕透唔好怪我 LOL 可以先去我以下個blog睇咗條片俾定心理準備自己先 :P詳細請閱: 東京親子景點 | Maxwell Aqua Park 水族館 | 品川王子酒店 | 日本親子自駕遊 三鷹之森吉卜力美術館係琛珈媽咪夢寐以求一直好想去嘅地方,作為吉卜力+龍貓fans,呢個美術館係必去! 驚喜嘅係,入場人士有8成都係外國人士,係講英文嘅外國人士。美術館內外每件展品都好好好靚,紀念品店更加買到我失心瘋,必買粉紅龍貓產品,美術館限定喔!詳細請閱: 東京親子景點 | 三鷹之森美術館 | 吉卜力粉絲必去| 日本親子自駕遊 必食推介: 東京壽喜燒 百年老店 いし橋多年來都係琛珈媽咪心目中嘅第一名壽喜燒! いし橋每個餐嘅第一片肉,係無人能及嘅厚切滋味! 加上係個室環境,帶住小朋友去食都唔怕搔擾到其他食客,只係記得要預早預約,網上預約(暫時只得付費服務)/致電預約都可! 詳細請閱: 東京壽喜燒 | 我心目中的第一位 いし橋 神奈川縣 平塚市総合公園距離東京市中心90分鐘左右車程,係我地離開東京市中心嘅第一個checkpoint! 大人都可以玩得好開心嘅大型遊樂設施,旁邊仲有極大片草地,同埋一個小小動物園。不得不羨慕一下日本嘅小朋友們,當日有小學生就係去呢個公園旅行,玩得勁開心! 我同對仔女都當然唔執輸,同樣玩得好高興! 呢度仲有滾輪滑梯,琛珈爸媽都係第一次玩,雖然碌到個patpat有D熱同痕,不過真係有點刺激又好好玩!詳細請閱: 東京近郊親子景點 | 平塚市總合公園 | 神奈川縣 | 日本親子自駕遊 橫濱麵包超人兒童博物館可能係今趟行程當中唯一不推薦大家去嘅地方。Surprised呢~ 因為我地去嘅當日撞正日本假期,睇到嘅只係人頭湧湧,連平時好乖唔會走好遠玩嘅琛琛,我地都玩玩吓走失咗搵咗陣先搵得返佢,因為真係 太 多 人! 加上玩樂設施係好少,地方又好窄。當日我地買紀念品,排隊俾錢都排咗20-30分鐘…所以… 我唔詳細寫篇blog俾呢個地方了,純粹俾大家睇吓撞正日本假期去嘅景況吧: 靜岡縣 富士野生動物園有富士山做背景牆紙嘅動物園,仲有好可愛,唔同動物外貌設計嘅safari bus。乘坐safari bus就可以進入野生動物區域,(隔住車嘅鐵欄)近距離餵黑熊﹑獅子﹑駱駝食野,刺激但安全,琛琛珈珈同爸爸媽媽都樂在其中!詳細請閱: 東京近郊親子景點 | 富士野生動物園 Fuji Safari Park | 靜岡縣 | 日本親子自駕遊 小室山公園攬住小朋友著吊椅上山會有少少緊張,不過上到去盡收眼簾嘅風景完全值得! 非常新淨整潔嘅步道,仲有超靚景打卡Café 321~ 回程行落山腰位置,仲有個「恐龍廣場」遊樂場,大大隻恐龍陪你玩! 非常建議4歲以上小朋友要去埋呢個遊樂場啊~詳細請閱: [coming soon] 伊豆仙人掌動物園另一可以同動物近距離接觸嘅動物園,不過呢個動物園主打比較冇傷害性嘅小動物,例如羊﹑馬﹑袋鼠,周圍都放咗飼料+料金箱,俾你自行付費餵動物。呢個動物園仲有個比較出名嘅動物展區,就係水豚君溫泉區,餵佢地食野好刺激,佢地好進擊,勁為食!詳細請閱: [coming soon] Teddy Bear Museum為了DIY龍貓公仔而去~~ 同琛琛合作自己整咗一隻紅葉龍貓,非常可愛! 雖然教學過程係用日文講解,不過枱面上都有圖文並茅嘅說明書,都可以容易跟到D steps。館內有個龍貓電影展區,將一幕幕龍貓經典畫面用實體公仔呈現出嚟,仲有一架伊豆貓巴士俾你可以坐入去打卡! 當然仲有好多teddy bear公仔不同造型展出,鍾意毛公仔嘅朋友記得要去睇吓。詳細請閱: [coming soon]完成了一趟旅程,就係期待下一趟旅程嘅時候。2024年,名古屋gogogo!━︎・━︎・━︎・━︎・━︎・━︎・━︎・𝓌𝑒𝓁𝒸𝑜𝓂𝑒 𝒻𝑜𝓇 𝒸𝑜𝓁𝓁𝒶𝒷𝑜𝓇𝒶𝓉𝒾𝑜𝓃ig: @123LungsumkaMami email: wwwwwaiki@gmail.com━︎・━︎・━︎・━︎・━︎・━︎・━︎・#琛珈去日本 #琛珈去旅行 #wwwww遊記 #wwwww遊記_日本 #waikiinjapan#東京都 #神奈川県 #靜岡県 #日本親子景點 #東京親子景點 #親子景點 #日本 #東京 #hkmamablogger #香港媽媽 #香港寶寶 #親子 #親子旅遊 #日本自駕遊 #親子自駕遊