< 東京﹑富士山9天遊 > 第四天 一朝早七點起身出發，今日要離開東京市區，去到富士山旁邊既河口湖，方便之後一日上山；先將大背囊同冇用既野留係東京，轉用細小小既行山背囊出發！ 坐地鐵到新宿，再轉京王高尾線坐到總站「高尾山口站」；如果一日東京來回高尾山有pass可以買，我唔返東京就用唔著lu 由新宿出發大約一個鐘車程黎到啦 其實...我係因為漫畫而黎架，哈哈 頭先買左個飯團未有機會食，落車後係月台坐左一陣，食左佢先出發，唔食早餐冇力上山點算呢 成個站新裝修過，同漫畫有啲唔同 高尾山有幾條唔同路線上山，可以行上去，亦都可以坐吊椅或纜車上去，原本我計劃好似漫畫一樣行1號路上去 可惜一黎到高尾山就落雨，有時仲落得好大，就算開遮都係濕 高尾山代表動物鼯鼠 天氣差好遠... 落雨都懶得行，直接坐纜車上去算數，纜車站係正山口，咁吸引想唔坐都唔得啦 如果買來回會平小小，我都唔知會唔會行呢條路落山，所以就買左單程票，期望一陣唔再落雨可以行返落黎 呢部纜車同香港山頂纜車差唔多，用鋼纜將車拉上山；而呢部車就比香港既細一啲，只有一卡車箱 不過高尾山纜車比香港纜車斜好多，車箱設計係一層層，一陣上到最高時部車仲會斜到個人向後 入面好似樓梯 睇相係感受唔到，呢條係日本最最最斜既纜車路線，可想而知有幾斜 上到黎啦！高尾山有599米高，呢道只係472米咋，即係仲有排行 上到黎都係落住雨，而家仲望到小小野算好啦，一陣天氣將會更差 鋪頭又唔開 去山頂沿路會有一啲小景點，呢棵係好似八爪魚既大樹 點擊圖片放大 會帶黎好運既八爪魚 大霧之下冇咩好睇，只好默默向上行 點擊圖片放大 +5 離開纜車站頭一段路係小斜路，唔覺得辛苦 中間有小段路分開左樓梯同斜路兩邊，兩邊都係去同一個地方，我又係根據劇情需要行樓梯呢邊，好在唔係好長好快行完 路過一間小茶寮（咁古代feel），有免費茶水供應，當然仲可以食野啦 想食呢個烤團子好耐啦，好好食架 再行就去到佛教寺廟「藥王院」，有超過一千年歷史，算係高尾山最出名既地方，如果坐纜車上黎呢道係必經之路，有唔少善信參拜架 點擊圖片放大 +4 四圍搵位影相 藥王院好大，向上行都仲係寺廟範圍，我冇點理繼續向上行就算 點擊圖片放大 +3 夜晚有機會見到飛鼠 離開藥王院後雨又變返大，背囊就算有rain cover都入水濕濕地，呢個時間都冇咩可以做只諗住快啲行到上山頂，希望山頂可以見到小小風景 點擊圖片放大 終於黎到啦，咩都見唔到，哈哈 觀景台就係咁啦，理想同現實始終係有啲距離，係呢個距離大左啲姐...好彩未上山時都估到係咁架啦，冇咩話特別失望，希望富士山有好天氣就得 理想係咁架！ 好多人黎到山頂，呢道有餐廳又有間小小博物館，係博物館行個圈就落山啦，唔係道浪費時間lu，今日仲有地方要去 點擊圖片放大 繼續落大雨 去返纜車站附近，好天既話呢道係可以望到東京市區，而家天氣仲差過頭先連前面啲山都見唔到 點擊圖片放大 落雨坐返纜車落山算lu 點擊圖片放大 落到山發覺下一班火車就快開，買左小小紀念品就向車站跑去，岩岩好順利上到車，如果上唔到呢班車就轉唔到下一班車，又要唔知等幾耐，呢道唔係市區班次唔會好密 由「高尾山口站」坐一個站去「高尾站」，轉坐中央本線去「大月站」，再坐富士急行線去「河口湖站」，時間要兩個幾鐘，有排坐 買左個炒麵麵包一陣食 本來係坐車尾，後來火車調轉行變左車頭 沿路天氣都唔多好，不過冇落雨比頭先好左好多啦 路過富士急樂園，曾經黎過架 經過三程車，終於黎到河口湖站 點擊圖片放大 河口湖站本身係餐廳又係手信店，係道坐車返東京順便買野就最方便，可惜我唔係由呢道走冇機會比我買手信 我住個間溫泉酒店有車接送，去車站旁邊案內所請職員幫手打電話通知酒店，好多人都係搵佢地幫手 案內所有好多優惠卷拎，玩河口湖可以慳到錢，今次我用唔著 富士山我黎到啦 等車期間出去行下，河口湖站附近冇咩野，最重要係比我發現有便利店，唔洗擔心聽日冇早餐食同冇地方買野帶上山 酒店用私家車送到Fuji Royal Hotel Kawaguchiko門口，服務好好；黎得河口湖點都要浸下溫泉，今次平平地揀左住呢間，本來係預左行完富士山再浸溫泉嘆返下，後來改左上山時間變左浸完溫泉先上山 點擊圖片放大 +2 如果住正常房呢間野好貴，我訓呢間多人房就平好多，三百幾一晚，訓既床鋪同其他房一樣咁舒服架；今晚全間房只係得四個人，好寧靜，我諗呢道唯一唔好既地方就係出面個廁所，感覺好奇怪 酒店係湖邊，由窗口望出去就係河口湖 酒店外觀 放低背囊好快就出去，已經四點半再唔出去就趕唔切 圍繞河口湖有好多地方可以玩，今次我既主要目標唔係玩河口湖，只係揀左一個近近地既地方參觀 穿過農田向「八木崎公園」方向行去 河口湖真係好靚，企係呢道睇有小小去左瑞士既感覺，加埋山上有啲雲霧成個意境好正 點擊圖片放大 留左一陣再向前行，好快去到「八木崎公園」，呢段時間咁岩有薰衣草祭，第一次見到咁多薰衣草咋，係好似花海咁多，空氣好香薰衣草味 點擊圖片放大 可惜今日多雲冇陽光，影出黎既相都係陰陰沉沉，而且薰衣草好似已經係季尾啦，唔係最靚既時間，不過現場睇都係好靚 點擊圖片放大 除左薰衣草之外仲有好多其他花 點擊圖片放大 +4 時間已經唔早，遊人唔多，環境特別舒服 點擊圖片放大 隱約見到太陽開始落山，我都係時候慢慢行返酒店lu 仲有攤檔未關門，食小小野過下口癮 點擊圖片放大 由於時間關係，好快食完就趕返酒店浸溫泉，呢個係河口湖既重點活動黎架 點擊圖片放大 之前住過兩次溫泉酒店，兩間既溫泉都好大而且冇咩人，呢道就唔同啦，溫泉細一啲而且仲好多人一齊浸，可能個個係道冇野做走晒去浸溫泉啦，哈哈（話說浸完溫泉發現唔見左袋錢，係房搵左好耐都搵唔到，原來漏左係溫泉冇拎...）；浸完溫泉返房望出窗外，可以見到大大座富士山，而且天空變得好清冇咩雲，只有富士山頂仲有小小雲；一路都有check住富士山天氣，天氣報告話富士山今晚會變得好天，未來兩日都會天晴，睇黎天氣報告好準丫 富士山上既燈光係由山小屋發出，而家睇落好遙遠，好難想像聽晚我會去到其中一點燈光之中 間房又望到富士山又望到河口湖，位置唔錯架 對住個窗發左好耐夢，都係出去行下仲好（出發前好多人同我講河口湖有好多鬼故，四圍咁黑搞到我都驚驚地...） 係湖邊睇到星星，都算影到小小 點擊圖片放大 有人玩火！ 係湖邊想搵個地方買野食都難，跟住google map行大約十五分鐘成功搵到便行店，今晚晚餐有著落啦 買好野食拎返酒店開餐，便利店既意粉超好食，如果香港既便利店都有咁高質素既意粉就正啦，香港個啲好難食... 食完野差唔多十點，又去浸多次溫泉，聽日一早就要走冇機會再去浸啦；本來想早啲訓聽日早啲起身，結果都係早訓唔到，但一樣要早起身...好快最重要既富士山旅程將會開始，今次可唔可以係山頂睇到日出要靠運氣啦，加油！
