【Chugoku Wonder Quest - Day6】2015-03-05 [LEVEL 9/12] 山口縣岩國市嘅錦帶橋係一條有好耐歷史嘅橋，而且全條橋都係用木嚟建造。整條橋分開三節，每一節都好似一個拱橋型狀，遠處望條橋都幾特別。 【怕錯過巴士班次，睇定個時間表】 ☞ 首先開始搭JR去咗岩國站再轉巴士去錦帶橋。喺呢邊都算有多車去錦帶橋，可能巴士路線比較多，途經個錦帶橋呢個站都唔少，所以就算失咗一班都唔太大問題。去到錦帶橋嘅時間都唔耐，一路車第一件事就係睇回程嘅時間表先，始終要知邊度有回程嘅巴士站位置，因為有時唔係喺落車附近就係，到時先揾就會冇晒時間，連上車都可能上唔到。加上呢日係行程嘅最後一日，當然要好小心睇清楚啲回程時間，係唔係可以駁到拎返行李仲有時間搭鐵到機場。好彩見到個站就係落車嘅對面，即刻拎手機影低個時間表，唔好靠記喇，記錯就超大獲❕ 【行入條橋要收錢 ❕ ❔】 ☞ 落車位置行去錦帶橋唔遠，只有幾步路就到，而且好容易就見到添。條橋其對我嚟講唔算好特別因為始終行過咗條橋就完，反而最令我驚奇係過橋完來都要收錢❕當時自己真係呆咗，比唔到反應，不過佢除咗俾錢過條橋外仲可以上埋岩國城。咁都係嘅，其實錦帶橋真係要行幾分鐘就行完，只係有隔住一條河流嘅長度。 ☞ 行完條橋之後係類似一個開放式嘅公園，而附近就有個噴水泉嘅地方，都幾靚。噴出嚟係拋物線形狀出嚟，不過望真啲係梅花間竹有高拋物同低拋物線咁噴出，模仿錦帶橋嘅拱形情況，一高一低，係幾有心機喎。 【坐纜車上岩國城】 ☞ 附近公園唔太多嘢睇，咁隨後就行上前，有個纜車站係上山去岩國城。中途有一班類似幼稚園學生都坐纜車一齊上去，我就喺佢哋嘅一群當中就係咁搭纜車上去。去到山上啲學生唔係去岩國城而係去附近空地玩，咁我就繼續行上去，經過斜路就到呢個岩國城。 ☞ 岩國城其實都幾細，外型亦都係一般，絕對冇大阪城咁大。入面其實係一個展覽館，裡面擺咗好多歷史嘅武器，例係長刀，武士刀，亦都介紹當代嘅歷史人物，但當然都係一個都唔識 ❕行上去就係城頂，係望到整岩國市嘅全貌。地下上面畫咗以前古代市區樣貌，對應依加望出去嘅情況係有咩轉變。 ☞ 逗留幾個字就走，然後離開個城返去纜車站準備離去。不過纜車未咁快開出，就係旁邊等嘅時候見到剛才嘅幼稚園學到。應該係唔同嘅班級一齊玩集體遊戲，而啲家長都在場。望到啲小朋友玩得咁開心，家長們又有傾有講，令自己喺等車其間都係咁開心。 【最後橋底影相走人】 ☞ 搭纜車到返條橋就去橋底旁邊影吓相，希望影到唔同角度嘅岩國城係點。最後就行手信睇有冇咩可以買嚟紀念，但好多間都冇一啲小擺設買，淨係得一個鎖匙扣賣。唔理咁多買咗佢，因為好快嘅回程13: 25嘅巴士會埋嚟。 ☞ 之後就搭返去廣島市，拎返個喼，再食買吉野家飯先走，因為晏晝嗰餐都未食。然後坐新幹線返大阪再去機場返香港。 【INFORMATION】 前往錦帶橋/岩國城嘅資料 ☞ 參觀費用 : 300円 ☞ 交通 : JR岩国駅換乘錦帯橋方面巴士 。 http://www.iwakuni-bus.com/r_jikoku/jikoku_itiran/heijitu_kintaikyo_kudari.pdf ☞ 參觀時間: 8:00 - 17:00 ☞ 網址 : http://kintaikyo.iwakuni-city.net/summary.html 【後記】=============================== ☞ 去到最尾嘅時候自己有啲唔捨得咁就完咗六日嘅Chugoku Wonder Quest，可能係玩唔夠。當然中國地方其實真係仲有好多要玩。 ☞ 整體嚟講中國地方嘅體驗同上次關西嘅行程完全唔同。交通上始終冇大阪 / 京都咁放便，而且市中心地方都冇大阪難波同京都河源町咁旺咁多人。點都好，中國呢個地方真係有好多好靚嘅景點，非常滿意。 ==================== 外部連結 ==================== 自己係一個普通嘅香港打工仔，趁後生三十歲前，自己無咩負擔嘅時候，訂立一個目標去，兩年時間內 (12/2014 – 12/2016) ，分開17次時間，唔識日文情況下，自己一個人遊歷日本47個都道府縣。 ☞ https://blog.ulifestyle.com.hk/blogger/ao37182/?p=2922849 ☞嚟關西主要地區遊覽，例如大阪，京都等地方，一定要有張周遊券旁身，咁就可以慳唔少錢！ ☞關西地區都推出好多款嘅周遊券，特別係前往京都，大阪，神戶地方，只要因應自己行程需要，再買相關記周遊券，咁可以慳唔少旅費喺交通方面。 有關各種關西地區嘅鐵路周遊券可以CLICK入去睇。 https://blog.ulifestyle.com.hk/blogger/ao37182/?p=2936671
