貓記養生齊分享 一切從頭開始（一）～進擊的伯伯 香港都市病頭三名，一定有頭痛份。 我記得人生第一次頭痛係19歲，初入行做婦產科姑娘。那個醫生開早上8點到晚上10，日日三百個症，好多時開門已有二三十人喺門口排隊，因為佢除左婦產科，附近街坊有咩唔舒服都會搵佢。 忙到一個點，半年左右我已開始偏頭痛，食Panadol 500mg，好快食到一次五粒都止唔到痛，老闆開另一隻更強的Ponstan 500比我，無知的我發現加咖啡或可樂更止痛。但無幾耐就人生第一次痾黑便便胃出血，老闆話食胃藥就無事架喇，唔使請病假既，自己入藥房攞啦。（胃病我可以話係專家） 食左胃藥好下差下...直到我聽到個伯伯同醫生的對話（真實對白） 伯伯：我隻腳係米醫唔好喇？食左禁耐止痛藥無用既！？ 受到挑戰的醫生反擊說：阿伯，我地西醫係頭痛醫頭腳痛醫腳架啦，你黎搵我唔係攞藥又黎做咩呢？診所係比藥你架啦，唔通幫你把脈？你要做物理治療，我可以寫信比你去排。 果刻我喺到諗，頭痛同腳痛點解都食相同的止痛藥呢？而食止痛藥背後，係米應該要搵出痛症的成因呢？ 下篇我們再探討頭痛的成因，和治療方向。
