話說琴晚去飲，今次生果環節係橙（完整一粒）。通常呢啲時候，年輕人都會選擇唔食，而媽媽級既就會選擇打包返屋企。但今次有啲唔同，因為拎走曬啲橙既，係我朋友。 同C9搶野，未死過？ 佢唔係唔怕死，而係因為佢想拎啲橙去派俾露宿者。由於琴晚太夜，所以佢拎住一袋二袋既橙返左屋企，今日再拎返出黎派。 今日大約黃昏時間，我地四個跟住佢一個，去到觀塘碼頭。係對面馬路時，佢叫我地收埋啲橙係個袋到先，一陣傾完先再俾佢地。 原來，露宿者對於機構、社工對佢地既關心已經好熟悉，佢地知道只要聽你講野，佢地就可以得到物資。如果想真正同佢地做朋友，關心佢地既話，最好就傾完計，friend左，先再扮「咁岩」有個橙，又「咁岩」可以請佢地食。咁樣，就有會減輕「我聽聖經，你派物資」的感覺。 黃昏時間，係觀塘碼頭既露宿者幾乎係冇，只見到一間間「空屋」，同埋黎搭船睇海約魚既人。終於兜左一陣，俾我地見到一個將啲雞骨放緊入鐵籠既疑似露宿者，朋友走過去了解。原來，佢係呢到其中一名露宿者，叫勇哥。佢係一個五十幾歲，黑黑瘦瘦，著住T-Shirt，牛仔褲既男人。 勇哥將啲雞骨放入鐵籠係為左捉老鼠。佢話，呢到一到夜晚就好多老鼠，咬爛曬佢「屋」入面啲衫同布，仲食曬佢啲野食。我真係聽到嘩嘩聲。觀塘碼頭隔離就係海濱公園，有時夜晚都會同朋友過黎吹下水，食下野。一諗起原來附近有咁多老鼠一齊玩，真係人都癲。 而更重要既係，你又點會估到佢地會自己整一個捕鼠器，而呢個捕鼠器，一晚仲可以捉到十幾隻老鼠，捉完就掟曬佢地落海消滅佢地。 勇哥同我地講，佢今日咁岩放假，所以先會係到出現。而其他露宿者因為天氣熱，通常日頭就出去行，到夜晚八點幾食埋飯先會返黎。而有關佢既「鄰居」：有個係老婆爛賭，輸錢，八十幾歲仲要去返工賺錢，仲要俾老婆趕出街訓；有一啲係吸毒既無業游民，仲有一個二十幾歲既人。 留心睇，你會發現佢間「屋」係真正既「麻雀雖小，五臟俱全」，應有盡有，佢連電話都有幾部。你可能會奇怪點解一個露宿者可以。傾落先知，原來佢係有正職，清潔部主管，月入大約兩萬。佢仲話已經排到公屋，下個月就上車。 我地唔知佢屋企有咩人，都唔知點解一個月入約兩萬既男人，點解會成為露宿者。但從勇哥身上，我地可以知道，露宿者都有佢地自己既生存方式同露宿既原因。 雖然都係訓街，但唔代表所有露宿者都係無業遊民、無用、甚至低人一等。冇人有資格去睇低佢地，亦唔需要可憐佢地。因為佢地分分鐘比我地收入更多，生活更無憂更自由。佢地要既，唔係我地自以為既關心，而係一份平等既尊重。當然，你可以選擇同佢地做朋友，了解佢地真正既需要，再從旁幫助佢地，但絕對唔係施予。 好記得勇哥話： 「我一日做兩更，十七個鍾，靠自己賺錢。我唔會去拎綜援。」 我對拎綜援既人冇意見，但我欣賞勇哥這種靠自己、努力生活既態度。你可能會話佢月入約二萬，洗也拎綜援。唔好意思，留意返，佢一日做足十七個鍾清潔，用勞力同汗水先可以咁。 香港有七百萬人，七百萬人有七百萬段經歷，七百萬段經歷會引申出七百萬種生活方式，而每個生活方式，都有佢地獨特的故事。 露宿者只係代表一個名詞，唔應該對佢地有過度既前設。有人露宿，可以純粹因為未上到樓。有人露宿，可以真係冇能力上樓，甚至放棄自己，放棄生活。先了解，再針對佢地既需要作出相應既幫助，比起盲目咁去關心同物質上支持佢地來得有意義。
