無諗過旅程會過得咁快，黎到尾二一日。過埋今日，聽日我就要到布達拉宮朝聖了！ day23 工布江達到松多，96km，六個半鐘，爬升海拔800 米。 點擊圖片放大 呢隻牛，有個朋友話可愛，你地覺得呢LOL 我同佢傾計傾左十分鐘。 今日既路好痴線！全程有接近九成既路係爛路。大家唔好以為小事，我山地車條肽都就爆就爆咁，有個踩公路既（一直無介紹，小潑）臨尾二呢日終於頂唔順啲石仔，爆肽了。 一齊換左半個鐘shit！ 一路既路況都係咁，想快都快唔到，因為真係好多石仔，又凹凸不平。 點擊圖片放大 真係好誇張，踩得勁辛苦！又要快又要小心。 終於俾我親眼見到輪肽哥！佢一路推住個大車轆，同我一樣由成都出發去拉薩！今日係佢第73 日，我地遇上了。佢打算推81 日到拉薩！呢個世上真係癲人多。 Lunch 食左個$3 甜筒同$20 回鍋肉飯。 做開工程既，見到工程難色會留意多啲。 踩左咁多日！終於俾我係尾二呢日見到彩虹啦！！勁大條勁靚！！ 夜晚到左松多鎮，小鎮一個無咩特別。最特別係超市多過食店LOL 聽日就會到達拉薩，所以今都特登唔係旅館食，出去食左碗籣州牛肉拉面！好好味，但得兩片牛肉。 24 日既單車旅程，聽日完結！到左拉薩會繼續玩落去！ 預告少少，聽日會六回準時出發，史無前例一日 180km 既路程。會爬上最後一座山，米拉山，係第二座亦都係最後一座海拔五千米以上既山！預計晚上7-8 點到達布達拉宮。 依家係8 月25 號晚上11:04，我準備訓覺！而且好興奮！聽日布達拉宮見！早抖！
