自購產品用後感
＿＿＿＿＿＿＿＿＿＿＿
【Cosmetic Skin Solutions】
〝Vitamin C 20% (Advanced Formula +) 〞
價錢：$480/30mL (平均 $16/mL)
購自：Salala Beauty

＿＿＿＿＿＿＿＿＿＿＿
一路以來，
睇睇埋埋咁多 YouTube、
forum、instagram、雜誌等等
都算係知咗唔少護膚化妝知識。

最近心血來潮，突然想開個 blog account，加入成為分享嘅一分子~

希望可以用自己嘅角度，
同大家報告吓唔同產品嘅用後感~~

第一個 post，係為咗尋日朝早打瀉咗嘅呢支 Cosmetic Skin Solutions - Vitamin C 20% 而寫的。

嗚嗚~~~ 呢支維C精華只係買左10日左右！
但尋日我未擰蓋就拎起佢個頂頂，
跟著佢下半部就訓低咗，
啲精華就倒咗一半出嚟！
但反正都已經發生咗，
我只能慶幸我唔係倒哂全部出嚟~
＿＿＿＿＿＿＿＿＿＿＿＿＿＿＿
『官方介紹 (取自 Salala Beauty 網頁)』
適合任何皮膚，敏感皮膚，彩光後更佳。
含20% 純維他命C 、0.5 Ferulic Acid、0.5透明質酸。
增厚表皮層，改善皮膚健康。
初用者適用。
合抗氧化保護，能中和游離基，
增強皮膚對紫外線免疫能力，
有效抵禦 UVA I / UVAII / UVB，防止皮膚提早衰老，
減少幼紋、皺紋的出現，
有助減低黑色素及色斑形成，
能刺激骨膠原蛋白增生，
有效改善皮膚色澤和彈性。
＿＿＿＿＿＿＿＿＿＿＿＿＿＿＿
『用後感』
●成分●
其實市面上嘅美白精華有唔同嘅有效成分，
1.有啲係純維他命C，又稱左旋C，即 L-Ascorbic Acid；
2.有啲只係維他命C嘅衍生物，例如 Sodium Ascobyl Phosphate；
3.有啲係曲酸等等等等等等。
唔同嘅有效成分，對於美白嚟講，當然有唔同嘅優點缺點。

先講講呢支 Vitamin C 20% 嘅有效成分。
呢支精華有嘅係『stabilized L-Ascorbic Acid』，
即係穩定嘅左旋C。
未穩定化嘅左旋C本身穩定性低，唔容易保存，好容易氧化，
但佢嘅好處係功效相對上明顯啲。

而呢支精華嘅左旋C 係穩定化咗嘅，
姐係唔容易氧化，
仲會提供紫外線保護，幫助對抗光老化，
從而做到抗氧化功能。
而且維他命C 本身係製造骨膠原嘅重要因素！
所以呢支左旋C 精華係集防紫外線、
抗氧化、幫助製造骨膠原於一身~

而有效成分嘅濃度，
亦都係選擇美白精華嘅考慮因素之一。
從支精華個名可以知道，入面有 20% 嘅左旋C 。
市面上大部分嘅維他命C精華，
最多只會去到20%嘅濃度。
因為維他命C本身都係酸性 (acidic)，
濃度過高對皮膚都會帶嚟刺激同負擔。
但相反，如果濃度唔夠高，
效果就當然會唔明顯同較慢，
但好處係安全啲，唔怕會太刺激皮膚。
＿＿＿＿＿＿＿＿＿＿＿＿＿＿＿
●質感，吸收度●
小妹我未用過 20% 以外嘅左旋C精華，
所以比較唔到唔同濃度嘅左旋C精華嘅質感會唔會唔同。
但剩係講呢支嘅話，
我會覺得佢係流動性好高嘅精華。
我一滴上額頭，佢就即刻流向左右兩邊，有啲啲「呢hea」......
平時啲美白精華可能會令皮膚乾，
但呢支唔會~

推開全面按摩之後，就覺得佢吸收唔算快，
按摩完之後，仲會 feel 到少少痴立立。
未吸收哂嘅時候，我會邊做其他嘢等佢自己吸收，
通常過多2、3分鐘，佢就會吸收哂。
用咗10日，都唔覺佢會令我生粒粒~~
＿＿＿＿＿＿＿＿＿＿＿＿＿＿＿＿
●成效●
未用之前，就一直好想買濃度高嘅左旋C精華嚟去印！
做咗好多產品比較，就揀咗呢支。
買完嘅呢10日裡面，我唔算係好神心咁日日用。
但我想講，我啲印係淡得超快！
整體膚色均勻咗，亮白咗，
我相信如果我繼續用落去，
一定繼續去印同整體提亮膚色！！
＿＿＿＿＿＿＿＿＿＿＿＿＿＿＿＿
●總結●
以醫美品牌嘅高濃度維他命C美白精華嚟講，
我覺得呢支 Cosmetic Skin Solutions Vitamin C 20% 唔算貴。
以佢寫嘅使用方法，每朝用 5—6 滴，
用量唔算多，會比平時早晚都用嘅精華 last 得耐~
大家可能會問我，如果我只係朝早用呢支左旋C 精華，
咁夜晚會唔會用佢？定係用其他美白精華？
答案係，我夜晚會用美白精華！
但會係其他有效成分嘅美白精華。
我夜晚會用有曲酸嘅精華。
而點解我只係夜晚用、同埋用後感如何，
就留返以後出post 講啦～
以上！

成功發佈