某日Instagram上睇到網友Travelology post左張夕陽下的蘆葦田，立刻驚為天人 -------- wa呢個咪同我係京都嵐山睇既一模一樣!! 京都嵐山蘆葦田 (Nov 2019) 人地影相真係好靚 做下功課，發現呢條由粉嶺鹿頸走至谷埔的步道，根本係一條知名的零難度遠足路線!1小時攪掂，而且平坦易行，連長者小孩都完全無問題~ 係我大鄉里無聽過je~既然又靚又易行，岩哂我呢d懶人，當然係襯d蘆葦未死哂，星期日立即山長水遠走返轉啦~ 行程概要 :前往交通鹿頸至發記士多發記士多至鳳坑村鳳坑村至谷埔谷埔蘆葦田 前往交通去鹿頸既方法非常簡單，只需係粉嶺火車站C出口小巴站坐56K綠van到總站就得~一般網上介紹都會咁寫，但佢地無講到一個問題，就係星期一至五56K係1個鐘一班，星期六係10-30分鐘一班換句話講，不論妳係走左車定上唔到車，總之就半個鐘後再見呢~咁我坐左咩呢?hey如果我咁好彩上到綠van，當然就唔會講到以上兩句野啦~所以我建議無車的話，立即轉身射個三分波，投向「綠的」既懷抱啦~車程約15分鐘，價錢約$90，幾個人除開都唔算貴 (56K都要$9.3啦)人數唔夠既，唔好怕醜，好似我咁問下一齊等車既乘客有無興趣夾份「泥鯭的」啦~ 雙嬴嚟ga~ 原來等車時唔記得影相，用「泥鯭的」示意圖頂住先啦 起點 - 鹿頸至發記士多到步，開波啦~係鹿頸「陳鳳記」士多落車後，向新娘譚路前進~其實頭先的士沿路既紅樹林風景已經超靚，而家落車望真d，的確唔錯! 入鹿頸沿路風景靚到爆炸! 行2-3分鐘，見到「發記士多茶座」個牌轉左行入去，就係今次既遠足路線「吊燈籠徑」~ 發記士多至鳳坑村一直沿吊燈籠徑前行，穿過充滿唔戴口罩阿伯既士多和數間民居，眼前立即一片開揚~Wa係小型紅樹林呀!!!!加埋對面個沙頭角紅花嶺山景倒影，會唔會太正呀? 對面就係傳說中的沙頭角了~ 之後的道路都係緊貼海邊，十足我上年去過的西貢赤徑一樣~在碧水樹影下逶迤前行，近觀翠綠灌木，遠觀沙頭角海同深圳鹽田區~……………………….Ok我認望住深圳呢件事差左少少………喂無偏見呀，鹽田個城市外觀真係欠左美感呀嗎! +++++++++++++++++++++++++++++++++延伸閱讀 : 《【香港郊遊004】赤徑與鹹田灣，宛如沙巴的美麗海灣》https://garcia-in-germany.blogspot.com/2019/11/4.html +++++++++++++++++++++++++++++++++ 對面就係深圳鹽田區 再行前d就係呢條遠足徑唯一的樓梯~唔係好長je，我見唔少長者都健步如飛，上吧啦~ 上完樓梯，兩旁是巨大古樹及一大片草原，十足中學去旅行時全級通山跑果d地點~我見都有d家庭抱住BB係陽光下碌草地曬太陽，感覺非常溫馨~人地天倫樂開心就好了~ 就算同不遠處果堆先人家宅玩埋一齊都唔使介意啦~ 五月天話齋，潮落之後一定有潮起，上完樓梯一定有落樓梯，行啦~ 繼續沿海邊前行來到check point鳳坑村~呢度既重點唔係士多，而係比你放低幾兩既廁所~當然村外的一小片蘆葦田都有一定可觀性，之不過夜晚食自助餐中午就唔好食太多啦，前方還有更好的，唔好太浪費時間係度啦~ 鳳坑村至谷埔再沿海邊彎彎曲曲行多數十分鐘，d紅樹林風景都係同之前差不多，但仍然係舒服的~ 成個海灘都係蠔殼 沿路的紅樹林點擊圖片放大 +2 來到今次的目的地谷埔了!時間充裕的，可以坐係海邊食個靚豆腐花~以豆腐花檔嚟講，呢個view都算係世界級啦~ 但sorry我無時間，太陽開始落山啦!!!!!係豆花店行前兩步，成個谷埔村的景觀盡收眼底呀!群山環繞，山谷中央一大片蘆葦田隨風搖曳，配以四周疏落的民居舊宅，彷如看到電視劇中的民國初年農村風貌古樸，卻饒有意境我想起數年前在日本琵琶湖畔誤闖的秘景小路，那風景實在有過之而無不及!+++++++++++++++++++++++++++++++++延伸閱讀 : 《【北陸之行8】用電動單車逍遙於琵琶湖吧!》https://garcia-in-germany.blogspot.com/2018/04/8.html +++++++++++++++++++++++++++++++++點擊圖片放大 谷埔蘆葦田不過，話就話靚je，但蘆葦距離太遠，總覺得差左少少，亦和網友果張相有少少差別……..再望真d，唔係呢個角度呀喂!真正影呢片蘆葦田的最佳位置，係前面松記士多轉右的小路呀!!! 呢度右轉入小路 小路狹窄，只勉強能容二人並行，但呢個位置真係無得輸!當時為下午4點半，太陽剛好從正面落下，金黃色的蘆葦閃閃發亮以夕陽為背景，微風輕撫，蟲鳥輕落，活活一片詩畫中的自然美景 點擊圖片放大 +6 面對如此美景，當然要加我個貓樣落去破壞佢啦~不過條路真係太窄，加上前有泥沼後有鐵絲網，除半身大頭look外別無他法如果各位IG美女想影人像打卡都無問題je~ 只要預備採蓮藕咁影相就得ga啦~ 點擊圖片放大 +3 採蓮藕look 谷埔碼頭及回程終於我係度影相+hea到太陽落山~唔好走住，落埋去谷埔碼頭影張相先啦~至於其他谷埔景點如白色學校等就各位自便啦~ 點擊圖片放大 +4 回程需要沿路行返去~無咩特別，唔使影相行得仲快左tim~只係留意天黑得好快，而且小巴尾班車係19:30，想摸黑hea下hehehaha都要睇鐘呀~不過睇鐘都無用，因為人潮唔算少，我6點幾出返鹿頸時已有約7-80人排隊等車 (沿路出粉嶺時我亦只見兩架小巴入去)算吧啦，唔好哂d咁既時間，同一方法，搵人夾的士啦 呢次既郊遊路線就係咁多~全程來回兩個鐘多d，影相另計，係咪簡單得嚟風景又超正先~以小弟寫過的路線嚟講，就係赤徑同大灘的混合體除一上一落樓梯外其他全程平路，想斜少少都無，連長者小童都可以輕易完成，家庭的話仲有紅樹林生態比小朋友學習呢~ +++++++++++++++++++++++++++++++++ 延伸閱讀 : 《【香港郊遊7】西貢大灘郊遊徑，長者行山無問題》https://garcia-in-germany.blogspot.com/2020/06/7.html +++++++++++++++++++++++++++++++++不過都有少少Kindly remind大家~12月的5點正左右太陽就完全隱入山中，要睇夕陽下的蘆葦最好唔好遲過3點到達粉嶺了~紅樹林含豐富生態資源，請勿破壞沿路補給點雖多，但都係無垃圾筒的，記得帶走自己垃圾啦~海的對面就係深圳，近到游水都去得到，假如對自己泳術有信心又想見識下深圳監獄有咩動人美景既歡迎一試~ (試完唔好話係我教的plz)*******更正啟示~原來我自己見識少分唔到芒草同蘆葦，多謝咁多網友的指正~Topic名都改返了~ 如果內文有咩地方未改ge，請諒呢~ (23/12/2020)===========================IG果邊間中會有D和BLOG及FB PAGE不一樣的相片和STORY，大家有興趣既去FOLLOW下支持下啦~Instagram : https://www.instagram.com/fung_garcia_backpacker/=====================================我既YOUTUBE CHANNEL正式開通啦!!!!新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~ =================================相關篇章 :香港郊遊《004 - 赤徑與鹹田灣，宛如沙巴的美麗海灣》《005 - 沙田行去慈雲山，原來超級簡單》《006 - 大埔三門仔，零難度的全海景輕遠足》《007 - 西貢大灘郊遊徑，長者行山無問題》《008 - 飛鵝山芒草之行》發掘香港《1 - 香港Staycation首選，皇家太平洋酒店住後心得》《2 - 城市步行︱鯉魚門的絕美日落》《2.5 - 鯉魚門石礦場︱夕陽下的芒草群》================================Email : funggarcia@gmail.comwww.facebook.com/Garcia.in.Germanyhttps://mewe.com/p/fung_garcia_backpacker 文章同時刊於以下平台，請各位多多支持呀!!!!!!!!!!!!!UBlogDC Fever TravelBlogspot 遊牧爆谷Medium
