係香港行山路線就聽得多，城市步行路線就真係少wor!咁梗係啦，香港個城市有咩睇? 咪樓呀樓呀同樓呀law而且，略為有野睇有野玩既地方，有邊處唔係一放假就一村人ga?唔一定ge~今次小弟就輕行左呢由觀塘至鯉魚門的城市步行路線，慢行睇埋日落至入黑全程只係兩個鐘，人少清靜之餘仲有維港日落美景!岩哂我呢d放假訓晏左行唔到山，又想臨時出發郁兩下既懶鬼啦~ 行程重點 :茶果嶺拍攝三家村碼頭鯉魚門海灘日落馬環村防波堤 我既起點由觀塘地鐵站開始，由D出口向藍田方向前進~過左工業區見到頭頂好高既觀塘繞道就可以右轉，行人路直行就會見到麗港公園其實如果唔係住呢邊，真係唔會嚟過呢個公園law而呢個公園亦保留左一貫make in HK公園既特色，就係無咩特色行過就算了~ 點擊圖片放大 出左公園偉業街轉左，沿麗港城外圍直行約5-10分鐘就會到達茶果嶺~ 茶果嶺呢個名大家可能聽過，但問d後生仔女係邊可能真係無咩人答到!我父母個年代，要由觀塘去將軍澳一帶，不論人車，茶果嶺可是必經之路時代變遷、人去樓空，現只剩數間酒樓海鮮批發店，或五金、汽車維修等生锈的鐵閘，剥落的牆身，清冷的氣氛有點像到了離島的街道，難以想像和熱鬧的觀塘僅數步之遙 再向前行到達茶果嶺村，這裡更舊了，為香港現存少有的大型鐵皮屋村其實真係好難想像住係呢d屋會有幾熱，特別我行緊果陣34度戴住口罩，更加令我入村尋幽探秘的興趣大減………據聞呢度有間茶記有d歷史有d名，不過我當時唔餓無幫襯，有興趣既朋友可以自己睇睇~ 點擊圖片放大 茶果嶺盡頭係天后廟，入去求神求神都係好事~ 過對面再向前行接近油塘了，出現一列普通的建築簷篷+周街亂泊貨車奇異的是，兩者組合，在這無人路上，長長的骯髒簷篷竟變成奇幻的無盡隧道!將相片再加少少味精 ------- 還可以wor~ 點擊圖片放大 +2 至於個地盤大家去到會唔會無左我就唔知了不過呢撻地裡面d雜草成寸高，好明顯係同富奸Hunter一樣，未來一百幾廿年都唔會攪得掂放心走嚟影啦! 再前行多陣已經見到油塘站~無錯近到爆，以後地鐵塞車可以行過嚟 (what!?)溫馨提示 ----- 呢處超多蚊，如果對自己餵蚊功力有信心的話請放心停留~ 沿茶果嶺道上行，可到達三家村遊樂場，穿過埋左方的工業區後，鯉魚門就係眼前了! 點擊圖片放大 當日30幾度，係非常好的過冷河地點~我先去左三家村碼頭，如果早起身的話，的確可以行完鯉魚門再係度坐船去東龍島郊遊~不過我放假既「早起身」一般都係中午12點後，算吧啦~ 碼頭隔離的海旁小公園係釣魚發燒友的聚腳地~閒閒地都有十幾個阿叔無戴口罩高談闊論非常熱鬧~快d走呀!!!!!!!!!!!!!! 轉過頭來，望下個海 ---------- 維港日落出現了!!!! 一時間我都呆一呆，估唔到鯉魚門既日落竟然可以咁靚!不過此地不宜久留，最佳既日落觀賞地點，似乎係對面鯉魚門海鮮村盡處燈塔!距離太陽落哂仲有d時間，行快d啦喂~~~~~~~~不過原來公園仔無得直接過對面，要C字型大兜路返街市圖書館果邊先入得…………只怪自己傻仔唔睇地圖啦…….. 兜個大彎，終於到達令遊客聞風喪膽既鯉魚門海鮮村啦~呢班海鮮檔十間有九間都殺人不見血，食人唔lun骨，本地人幫襯根本少之又少，於是係疫情下個個拍哂烏蠅不論有咩途人行過都問「食左飯未」甚至想捉你入去，我以為去左10年前旺角做問卷調查呀好景4仔阿叔都唔會郁手郁腳啦，阿部長你唔好掂我好唔好 村內某幾個地方都係賞日落既一流位置，有時間可以係度影兩張再前行~ 穿過海鮮村，終於到達我此行的目的地鯉魚門燈塔啦!亂石海灘雖比不上西貢的乾淨清澈，然此地卻能直視維多利亞港的壯麗日落香港能看浪漫日落的地方不少，但這裡不用長途拔涉，搭車又搭船，就能靜坐沙灘寫意欣賞維港日落!就像死氣沉沉的沙漠裡突然出現綠州，城市與郊外互相融合真係講左好多次都要講句 --------- 香港真係好靚! 點擊圖片放大 +2 靚係好靚，但邊有咁好死呀~黑仔如我，一去到石灘影左2分鐘個太陽就消失左了……..天aar…………你比我開心多一陣得唔得…….所以剩下既相都係天黑黑欲落雨……..無計啦…….. 影完呢張之後.............. 喂咁就無左啦?????點擊圖片放大 +3 襯仲有日照，可以沿球場穿過馬環村到盡頭的天后廟拜拜~不過對釣魚友及攝影友嚟講，村外的防波堤似乎更吸引呢~ 點擊圖片放大 +8 天黑後行返燈塔，影多兩張維港夜景後，今日行程正式完結! 點擊圖片放大 總結行程，簡單講就係由觀塘沿茶果嶺道行到油塘、鯉魚門睇日落~全程慢行+影相打卡都只係用左2小時，非常輕鬆~更特別的係雖一直在城市之中，卻有到了郊外暢遊的感覺~若想行多d可以行哂成個觀塘海濱公園先出發，不過果邊放假時多人到行年宵咁，唔match我今次人少清靜既主題了~ 補充少少既係我出行當天係星期日，茶果嶺道我沿途遇見唔夠廿個人，鯉魚門燈塔亦無西貢人潮咁誇張~不過又係果句 ------ 而家講左出嚟，幾少人都變成村人，妳見而家西貢d隱世海灘變左銅鑼灣就知啦………..亦有friend同我講三門仔比我攪到多左10倍人……….Hey無事ge~ 我個blog邊有咁多人睇呀~ ++++++++++++++++++++++++++++++++++++++++相關篇章 : 《大埔三門仔，零難度的全海景輕遠足【香港郊遊6】》 https://garcia-in-germany.blogspot.com/2020/03/6.html ++++++++++++++++++++++++++++++++++++++++ IG果邊間中會有D和BLOG及FB PAGE不一樣的相片和STORY，大家有興趣既去FOLLOW下支持下啦~Instagram : https://www.instagram.com/fung_garcia_backpacker/=====================================我既YOUTUBE CHANNEL正式開通啦!!!!新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~ =================================相關篇章 :香港郊遊《004 - 赤徑與鹹田灣，宛如沙巴的美麗海灣》《005 - 沙田行去慈雲山，原來超級簡單》《006 - 大埔三門仔，零難度的全海景輕遠足》《007 - 西貢大灘郊遊徑，長者行山無問題》發掘香港《01 - 香港Staycation首選，皇家太平洋酒店住後心得》================================Email : funggarcia@gmail.comWWW.FACEBOOK.COM/GARCIA.IN.GERMANY 文章同時刊於以下平台，請各位多多支持呀!!!!!!!!!!!!!UBlogDC Fever TravelBlogspot 遊牧爆谷Medium
