西貢大灘郊遊徑,長者行山無問題【香港郊遊7】

瀏覽次數:17363
發佈於 2020.06.23


疫情時父母係屋企發哂霉,4月尾時見緩和返d,一於同佢地出去行下散下心!

講就易! 4日連假無得去旅行,基本上全香港既郊外都people mountain people sea啦!

西貢? 勁多人

長洲? 超多人

行得高? 阿媽對腳唔得

行平路? 阿爸興趣無乜

想點呀!!!!!!!! 又要馬兒好,又要馬兒夾到老豆老母

要搵一條適合行山高手father同行山唔得mother既行山路線真係好難呀!!!!!!

不過我既性格一向都係徐錦江我全部都要!

同father研究完一輪,

終於搵到呢條「大灘郊遊徑」,輕鬆簡單得嚟又有少少挑戰的海岸風景合家歡路線了!




前往方法 : 


非常簡單,同我上次去赤徑鹹田灣一樣坐去黃石碼頭的巴士 (94 / 96R / 289R),係「大灘」落車,轉左就可以開始行了~



-----------------------------------------------------------------------

赤徑與鹹田灣的行山路線,可參考以下連結~

【香港郊遊004】赤徑與鹹田灣,宛如沙巴的美麗海灣

-----------------------------------------------------------------------





頭20分鐘,傷健人士都行到~


行不數步就見到呢條清澈小溪(渠?)

一起步就有d野睇,雖然天氣熱辣辣但精神都立刻為之一振~







5分鐘後,已能看到一大片廣闊海灣~

無錯我係上幾個月先見完呢個同鹹田灣一樣既view,但咁靚既風景,睇幾多次都唔厭啦~




正式開始行啦~


如果閣下係輪椅人士,到呢個位就可以調頭沿路出返大馬路去黃石碼頭了~

因為網上所謂既「大灘無障礙郊遊道」只有這10-15分鐘,轉左沿海邊的正式路線已經係亂石路,雖然無乜起伏,但都唔係輪椅可以做到既事


-----------------------------------------

輪椅人士路線就參考呢個網啦~ 我都係係度搵出嚟的~

https://www.oasistrek.com/bf_tai_tan.php

-----------------------------------------









至於普通老人家,我就覺得無咩問題啦,因為成條路近乎平坦,d石階都係一級起兩級止,根本只係換左自然風景既行街shopping mode,畢打街行上蘭桂坊都仲激過佢! 邊會有事ar~

見兩老係烈日下仍可以頭不暈氣不喘,妳就知個輕鬆程度去到邊~










約45分鐘,就可以嚟到旅程既中途站大灘沙灘了~

水係超清,可惜d沙唔係,又海草又膠樽

無法啦,始終呢度有d僻,唔會有咁多人嚟清理

不過作為休息點,吹下海風聽下海浪,係舒服ge~









高潮位 ---- 要上山啦!!


如果同行者係日常行動唔算太靈活既,我會勸到呢度好返轉頭了

因為繼續去灣仔南的路程會突然不斷石級上山落山一百公尺兩次! 對於雙膝唔掂既朋友絕對會好易唔掂!

無錯,對於我地後生仔係小菜一碟,不過我今次介紹既係適合長者的合家歡行山路線嗎~ 年青人要挑戰自己就去蚺蛇尖啦!




(遠望蚺蛇尖都幾靚~)





雖然我話係有d辛苦,但一向上落樓梯不太方便的娘親竟然都可以慢慢行哂整段路!

所以我諗平時有適量運動的長者應該都無咩問題的~

加上沿路清風吹拂,一片開揚無敵海景,係精神ge!









終點 ----- 先係最靚既地方~


由大灘海灘慢行的話大約要2小時,就可以到達著名的西貢灣仔(南風灣)~

呢處係四條山路的超狹窄交匯點,轉向西行幾步路就係自然保護區的海下灣

超靚law!!!!!!!~

同埋見到人地玩獨木舟with美女我都好想玩埋一份呀!









至於轉向東南,10分鐘石屎路左右已到達旅程既目的地「灣仔南營地」~

係呢處可以等船返黃石碼頭,約每小時一班~

不過重點都係「灣仔南營地」風景優美,環境清幽,且設施非常充足,有齊洗手間浴室燒烤場,送全屋傢俬,我寫到樓盤廣告咁tim!

唉係貝澳已淪陷既今日,要搵另一個可以釣魚觀星BBQ既企理露營地真係好難ga!

希望有一日可以同大家寫一篇露營既遊記啦~













成條「大灘郊遊徑」就係咁多~

後記 --------- 

就係parents對於呢日行山既事非常興奮,眉飛色舞講左幾日~ 見到佢地咁開心,我4日連假無去到柬埔寨都係抵ge~ (其實係肺炎無得去……….)

特別對於已經有三十年無行過山既娘親竟然可以完成全程,我真係不得不寫個勁字!

其實我覺得同長者行山,最重要係比多d支持鼓勵!

「慢慢嚟~」 「唔好急~」「行慢d~」雖然係黃興桂式廢話,但可以比對方知道身邊有人陪伴住~ 行起上嚟都舒暢d~

始終運動除左講體力,精神力都好緊要的~

希望大家同我一樣可以享受下同家人長者行山既樂趣啦!







=================================



相關篇章 :


香港郊遊



005 - 沙田行去慈雲山,原來超級簡單


006 - 大埔三門仔,零難度的全海景輕遠足



發掘香港



01 - 香港Staycation首選,皇家太平洋酒店住後心得



=================================




IG果邊間中會有d和Blog及fb page不一樣的相片和story,大家有興趣既去follow下支持下啦~


Instagram : https://www.instagram.com/fung_garcia_backpacker/







==============================





我既Youtube Channel正式開通啦!!!!


快d Click入 「鋒加西亞 / 旅人瘋語」Subscribe 睇片再禁個like啦!~

岩岩開始,完全未有人睇呀~




=================================



Email : funggarcia@gmail.com


Facebook Page : www.facebook.com/Garcia.in.Germany






文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!



鋒加西亞 - 德國工作假期後的世界流浪









*本站之內容由作者所提供,並不代表本站的立場。因此本站對所有博客的立場、真實性、準確性及完整性不負任何法律責任。

相關話題

收藏此文章
  • Facebook分享
  • WhatsApp分享
  • Line分享
  • 複製連結

發表評論

{{commentText.length}}個字
全部評論 {{comments.length}}

作者最新文章

更多旅遊文章推薦

下一篇