過境哈薩克 - 阿拉木圖一日漫步

瀏覽人數:638
發佈於 2019.05.27

邊個話個遊記就咁完結~
離開左格魯吉亞je,仲未返到香港ar嗎!
由於Air Astana轉機問題,我將會係大城市阿拉木圖Almaty停留大約15個鐘,凌晨5-6點到埗,即係話我大約有一日時間可以睇下呢個哈薩克前首都係咩情況~
再加上Air Astana有轉機優惠,1蚊美元就可以住一晚4星級酒店!
係~係同Qutar免費住5星級有d距離,但港幣$7.8住一晚Holiday Inn +機場來回接送+自助早餐仲想點?
旅行得咁攰,就比自己係張酒店大床好好抖下一抖先返香港啦~

 

但理想還理想,現實還現實,旅行實在有太多不確定既因素了
凌晨5點幾竟然會有3架飛機同時埗,海關又只係得幾個counter處理幾百人入境,更不用說佢地既效率會有幾快………..
更慶既係,哈薩克人真係好鐘意打尖兼無禮貌呀!!!!!
個哈大媽不停閃前閃後推左走右,我單擋頂住,佢竟然開口大罵我,旁邊人就一如香港人只係袖手旁觀,終於佢都係標左上前,好似我先係衰人咁,真係wtf

(就係呢個阿嬸)

最終只係入境,我就等左近兩個鐘頭,出到去,酒店等我既司機唔係度都好正常呀
好彩見到另一個又係嚟接人既Holiday Inn司機,於是就上埋車向酒店進發了
沿途岩岩係當地剛天光既晨曦時刻,個雪山好靚wor~

 

去到Holiday Inn等check-in又等左半個幾鐘,當我諗住坐完一晚通宵機終於可以抖下時 ---------
“Sir, I am sorry, Haven’t your name on the record.”
What???????????????
個酒店職員再check多陣,原來間酒店係Air Astana根據我張機票自動訂的,我21/5朝早到埗,佢就幫我book 21/5,但實際係如果我要即時入住補返個飛機上欠缺的睡眠,就應該係book 20/5先岩! 而家我要下晝3點幾先check-in,但我7點幾就要出發去機場,玩咩!
如果要early check-in就要比500幾港紙,點計都無著數!
好彩哈薩克都有好人!
酒店職員見我一臉倦容,就話既然我只係要訓幾粒鐘only,就將我既房期手動改為20/5,仲免費比我late check out until 14:00 tim!
不過由於架機場接送的士唔係我果架,我點都要比返10蚊美金個local司機
Alright,就當係$78住酒店,都抵啦~ 最緊要都係解決到件事!
折騰左成日,食個靚早餐,朝早8點幾,我終於可以有張大床比我休息下了……..

 

 

 

 

 

 

 

訓到下晝兩點check out,終於出發去探索下阿拉木圖了~
問過酒店職員,上山最好就係去Kok Tobe Park坐纜車,可以一覽整個阿拉木圖市既風景
見距離酒店都係15分鐘左右步行路程,就慢慢步人生路去順便睇下呢個城市咩料啦!
不過一出門就比架洗地車噴到濕哂.........咁我見到佢迎面嚟逃得開je,唔代表我知道佢「食鬼」咁調頭後面追住我ga......

 

步行於阿拉木圖的第一印象係個城市scale好大!
雖然未到北京俄羅斯果種行一個街口都會講句「x你行15分鐘都未到」既過份,但10分鐘都係少不了!
而d建築物係會大到無廣角鏡唔使旨意影得哂既程度,我呢d唔識影相既人真係老鼠拉龜,唯有亂影留記錄算啦
但平心而論,行走於如此空擴既空間與巨大的建築下,自有一種身處大人國既新奇之感,係幾輕鬆寫意的~

 

 

 

 

 

 

 

 

 

 

另一印象係路牌一d都睇唔明!
無錯好多國家既語言都唔係英文,但路牌多多少少都show埋ga ma
Sorry 呢度車路牌會有3種文字,但每一樣對我嚟講都係外星文
加上市中心格局基本係幾何式橫直橫直,所以如果無地圖無GPS,妳要有迷路既心理準備!但呢句好似都幾阿媽係女人...........
而市中心有另一特色,就係成個城基本上係座落於一大幅由南至北向下的巨型斜坡
行落當然ok,但行返上的話........對唔住我好懶,都係坐的士啦!

 

 

 

 

 

 

(阿拉木圖揾的士其實又係趣事,但同呢篇文有d格格不入,都係過兩日fb  #場邊小故事 講啦!)

打左咁多字,我其實只係行左廿分鐘左右,總之我終於來到Kok Tobe Park啦!
纜車around 50蚊港紙唔貴,話咁快上到山~

 

 

 

 

之不過,此山不同彼山,我想上大雪山,點知只係太平山.........
阿拉木圖最靚最出名既其實係雪山步行!但今日無可能啦!!!唯有又唔知幾時先做到了.......
Anyway, 呢座「太平山」其實係一座山頂廣場,係荔園+動植物公園既混合體,但係咪好似悟天格斯咁勁多幾倍就見人見知啦~
亮眼點應該係山上的風景,仲有個養鷹人比你玩佢隻大雕
如果有睇過謝利既XXX旅行社廣告定fb唔記得,有一個shot係有隻鷹係佢身邊展翅好似好女木玩,其實就係呢個公園內比人影下相打下卡而已
唔記得係邊一幕?唔緊要,我都唔明點解我會記得.......

 

 

 

 

 

 

 

 

 

 

 

第二個要去既地方係Park of 28 Panfilov Guardsmen,裡面有一座當地幾著名既巨大雕像
根據維基所講,呢座雕像係紀念第二次世界大戰時Panfilov將軍等28名士兵為拖延納稅德軍入侵Almaty的英勇戰事
雖然話係歐洲周街睇銅像雕塑已經睇到無哂感覺,但呢種大刀闊斧式既粗獷美學又同歐洲主流既有所不同,所以我都忍唔住影多幾張兼同佢合下照
之不過,"揾人揸機影到唔知想點"已經係我今個trip既定律,我已經唔想再吐槽了......

 

 

 

第三個值得去既地方應該係步行街Panfilov Street~
我當時根據information centre既地圖行過,覺得根本無咩野睇,只係有d商場咁,但到日入後先知自己行錯路去左Abylai Khan Avenue!
正式嚟講步行街應該係由Abay Kazakh State Academic Opera and Ballet Theate一直向下(向北)行,沿途感受呢個城市既年輕同生命力~
而步行街範圍亦佈滿特式餐廳,有唔少裝潢得勁有個性,齋睇門面都值得一試~

 

(Abylai Khan Avenue)

 

 

(Abay Kazakh State Academic Opera and Ballet Theate)

 

 

 

我亦不能幸免,係一間街邊+露天的平價本地餐廳Entrecote食個豐富到嚇死人既晚餐~
個份量大到,只係個紫椰菜湯都夠頂一晚啦! 仲加埋個main course......
至於個main course,比大家估下呢舊咩嚟,幾日後fb #環球美食吐糟區 開估~

 

 

 

 

 

(比大家估下呢舊咩嚟,幾日後fb #環球美食吐糟區 開估)

非常心滿意足後,我就坐的士返酒店囉行李,再由酒店免費車送到機場,要返香港啦!!

 

 

 

 

 

好啦,與此同時,我呢個為期12日,格魯吉亞+阿塞拜疆+哈薩克係咁ee行下既長旅行正式完結了~
都係果種句式啦 --------- 去就去xx日,寫就寫左xx個月,有無慢到咁ar??
唉呢個系列遊記不知不覺又寫左10個月,我真係好難想像下個長系列又要寫幾耐,特別係以我而家既工作忙碌程度與精神狀態..........
不過又咁講,話唔定我幾個月後豉椒炒魷 (whatever 邊個炒邊個啦),又失業大把空閒時間寫呢~ 我都分唔到自己想唔想d文出得快了~
總之,雖然出文勁慢now,但呢個無聊自high旅遊blog依然會繼續落去的,我仍然未想停呀!
嚟緊may be會出一至兩篇想寫好耐既日本短篇先,長篇遊記好快會奉上~
至於係邊幾個國家.........你睇得我個blog同facebook都知ga啦~
多謝大家支持「格魯吉亞/阿塞拜疆背包行」系列,下篇見!!

===================

 

相關文章 :
 
 
 
 
 
格魯吉亞背包行Day2.3 - 半山城+初試格魯吉亞菜格魯吉亞背包行Day3.1 - 雪山下的仙境民宿

格魯吉亞背包行Day3.2 - 冰川獨行@Mestia

格魯吉亞背包行Day4 - 烏樹故里,那僻遠村落中的僻遠村落

格魯吉亞背包行Day5.1 - 係咁ee睇下Kutaisi

格魯吉亞背包行Day5.2 - 一支公hostel天台BBQ

阿塞拜疆背包行Day6.1 - 司機傻更更 (#過客列傳13)

阿塞拜疆背包行Day6.2 - 熱心老伯有性格 (#過客列傳14)

阿塞拜疆背包行Day6.3 - Sheki市區與遇上的女士們 (#過客列傳16)

阿塞拜疆背包行Day7.2 - 城外小村Kish與飲飲食食在Sheki

格魯吉亞背包行Day8 - 交通日暨大病日

格魯吉亞背包行Day9 - Kazbegi tour概述

格魯吉亞背包行Day10 - Wine Tour@Sighnaghi

 
====================
 
Email : funggarcia@gmail.com
 
 
 
 
 

另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!!
 
 

 

 
*本站之內容由作者所提供,並不代表本站的立場。因此本站對所有博客的立場、真實性、準確性及完整性不負任何法律責任。

相關話題

收藏此文章
  • Facebook分享
  • WhatsApp分享
  • Line分享
  • 複製連結

發表評論

{{commentText.length}}個字
全部評論 {{comments.length}}

作者最新文章

更多旅遊文章推薦