上年9月出發前，曾經評估過呢個一年旅程會有機會遇上咩危險。 睇過我 第一章 出發前序言既朋友都知，我預算過會訓街乞食，會比人驅逐出境，更會比美女強暴，當中尤以後者最大機會! 但我點都估唔到，比起被劫色，有更危險既事會係呢個波斯尼亞小鎮Mostar度等緊我.......... 而呢件事，更加係我呢個旅程中，最凶險，最接近死亡既一次............... 事源於一幅相，於Hostel Majdas的一角，攝了一個極度漂亮的九龍瀑布，前方則是一群著住泳衣的年青人 (非我當時所見之原圖，純粹當地之網絡相，但都差不多~) 在克羅地亞時錯過了在Krka National Park瀑布下碧波暢泳既機會，今次應該補得返啦掛～ 點知話去此瀑布既tour係隔日出發，今日岩岩出左，要後日先有，但到時我都走左啦! 當時心諗 : 無理由一場嚟到但眼白白錯過呢d美景ga~ 此地無tour je，我唔信其他地方無! 係大街上行下行下，見到有一間舊舊地樣既hostel，個名仲hea到叫Backpackers Hostel，膽粗粗就入去問下聽日有無tour去waterfall，竟然又有又唔介意我係非住客wor! 於是就咁拍板，於Mostar既第二日有tour有水游啦～ (就係呢間hostel) 第二朝一早去到間hostel集合-------ee點解一個人都無ge？ 10點，無錯呀!但係連門鐘都比我打爆都無人開門wor! 15分鐘後終於有人開門，一臉年初四，我問係咪有tour時話有只係未準備好....... 當時我個心其實開始有d不安，唔通會比人昆？但我又未比錢呀!唔通係謀人寺？但我係飛來蜢，唔係咁都中獎呀？ 我係不祥預感到要whatsapp同我哎也契女講定“今晚11點前我唔whatsapp比妳報警ar plz!” 之後佢問我 : “報香港皇氣定波斯尼亞差佬ar?" 一個好好既問題ar............................ 最後近11點先可以出發，原來係要等埋兩個比利時既女學生化妝執野買野等等等等等.......總之就係女士出門前既準備啦..... 再望一望佢兩個，我開始明白我既凶兆預感啦......我旅途上保持至今既玉潔冰清究竟保唔保得住呢？？？？ 真係痴孖筋，前言都講咁耐! 好啦開始講呢個tour! tour guide原就係此hostel主人Ermin，今日全日都係佢親自渣車帶我地周圍走 睇佢3尺長髯兼紅鬚綠眼大光頭，原來竟然細過我........... Anyway佢都真係超級健談兼英文超好，一路上都不愁寂寞～ 第一站去到巴爾幹半島最大既山中洞穴Blagaj tekija，外觀上有少少中國式石窟既感覺 比左3歐話坐船入山洞，點知原來就係洞口片個灣出返嚟! 原來呢個山洞既入口係水中，係科學家潛水落去搵龍珠時無意中發現!既深且凍又變左保護區，根本就係一個入唔到既觀光區! 之不過，山洞外圍既環境都真係幾靚，洞旁既清真修道院示範單位都頗有特色，都值得一到的! 點擊圖片放大 +3 （外面36度，河水就16度，部相機鏡頭一落水即刻凍濛左） 點擊圖片放大 +3 (傳聞話飲啖水對身體有益，真定假我唔知，但我知咁凍飲完一定肚痛!) 第二站去到Mostar近郊的古堡Pocitelj 此古堡既歷史唔多介紹啦，有興趣可睇維基，我只知當時36度太陽直射既高溫之下，爬上廿層樓高既石城堡與人肉石頭燒相差無幾! 轉眼已經見有個赤裸上身既阿伯有著一身鮮紅色既火燄肌膚啦! 何況我原本想去瀑布下游水ja ma，踢拖嚟ga ja! 在碎石爛路與不成比例樓梯之下，好不容易上到城堡塔頂!回報就係俯瞰Neretva River及周邊的漂亮景色，仲有一絲絲既涼風～ 評價同上面一樣，都係值得一到既～ 點擊圖片放大 +6 於熱辣辣既郊外馬場食完自備既麵包當lunch後，終於去到期待已久既重點 -------- Kravice Falls瀑布啦! 其實呢度已經近克羅地亞邊境，所以有呢種近九寨溝、十六湖咁既瀑布真係一d都唔奇! 儘管已經見過唔少，但呢d多種分支瀑布真係百看不厭! 更何況清涼水氣彌漫山谷之中，悶熱暑氣全消，即刻有唔想走既感覺～ 點擊圖片放大 正當我想郭晶晶上身轉體翻騰三周半直飛落水時，話 :「呢度人太多啦，我知有一個地方人跡罕至係我既secret bath，你地有無興趣去？」 佢講得我地當然信佢啦～本地人生活經驗一向係my飛佛! 於是一行四人向下游走，沿路見著一層一層向下落差不一的小瀑布，亦有數個營幕在此玩叢林的法則 最後我地看到河既對岸有一似是工程未完而遺下的小沙灘，this is it! 老實講我係有少少失望的，我寧願望住個超靚瀑布好過坐係工程沙堆 不過一場嚟到都無計啦，說時遲那時快，Ermin已經捉住較漂亮既女生Manon慢慢地高速過河去到對面，咁我當然就帶住另一女生Mira過河啦 因為怕比人偷野，所以我都係揹埋個袋，右手捉實Mira，兩人緩緩涉水而過 我地兩個越行越覺得唔對路，表面睇落緩慢而平靜既水流，點解好似越來越急既？ 多步行到河中心，點解原本到腳踝既河水會深到近膝頭ge!!!？？？？ 當時河水既衝力已異常巨大，腳下水中的石頭滿佈青苔，崎嶇不平，每一步都要小心找立足點， 望望身後，是一層一層向下的山坡式瀑布群完全不見平地! 一不留神，絕對會來個沖廁所式水上飄!奔流到海不復回! 再行多兩步，水已過膝，我有武功底馬步夠穩都好d，但較矮既Mira已受不了! 她腳下一滑，幸好我右手仍捉緊她而無事 誰知我用力過猛，竟醉酒失平衡!我立刻鬆開右手免拉跌Mira，但整個人竟已撲倒水中! 其時我左右手及時抓住水中石邊，但左腳已離地，全身口部以下全在水中，身體幾被衝得與水面平衡，簡單嚟講就係日本過年d鯉魚旗一樣，只不過佢食風我飲水! 事出突然，落水時左手只能勉強抓住石邊凸出部份，在洪水不斷衝刷下，手指已漸漸被衝開! 只要手一鬆，我只餘的右手右腳勢必失去平衡，會被衝下瀑布，甚至衝到不知何處! 波斯尼亞既警察真係信得過？我真係會被搵得返？ 樂觀既今晚山頭過夜，做泰山啊啊啊啊啊返一兩個禮拜 ; 大吉利是d既，被衝去撞到岩石斷手斷腳頭破血流，甚至提早飲孟婆住家靚湯! 快要支持不住了..............唔通我終於要客死異鄉？ 我既旅程要永遠終結於此........不過唔緊要啦......我已經比世界上好多人活得精彩，過左無憾既一生...... 只不過......我永遠再見唔到我重視既家人、朋友、同愛人......... 我要死啦...... 我要死？ 我要死!!!!？？？？？ 唔可以呀!!!!!!!!!!呢個世界仲有好多野等緊我ga!!!!!!!!!!!!!!!! 突如其來既絕地氣力（即技安媽媽所講既火警時的蠻力），快鬆開的兩根手指奮力一握!再次抓實岩石! 這時Ermin既怒吼在耳邊響起 : 「Hold on! I am coming! Up your body!!!」 係wor，心口食水多左，當然係水阻大易沖走啦! 好彩我一向係個好腰好腎既好男人!於是盡力挺腰，抬高個身減少水阻，而這時Ermin已趕到，終於將我救起，並成功拉我到對岸 我終於逃離鬼門關了............ 坐到沙灘時我全身乏力，回想剛剛的凶險，仍是猶有餘悸，真係一個唔該就同呢個世界sayolala啊ga la...... 我評估返點解Ermin可以過得咁輕鬆，一來佢行慣行熟，二來佢身體比較高同重，而且著住波鞋 雖然危機已過，但問題嚟啦 ---------------- 我地一陣點返去呢............. 望住滔滔江水連綿不絕，儘管身邊有比堅尼美少女，我仍然提不起任何幹勁，更何況游水呢....... 最後坐左半粒鐘，大家就係Ermin一個一個接送下回到對岸離開 其實細想一下，呢個“沙灘”位真係好危險的!假如河水再暴漲d既真係無得走齊齊玩人肉激流! 而自始之後，我對於涉水過河都存有好大戒心，即係話有d驚左! 大危機過後，大家都攰到嘔，係時候回程返Mostar啦 呢個時候Ermin話 : 「我帶你地去我既secret place呀!每次我煩惱時就會去，我sure無乜邊個tour guide會帶你地去!」 又嚟!!!!!!!!!!？？？？？？唔好啦掛!!!!!!!!!!! 但手車係佢揸ge，又盛意拳拳，唉好啦............ 經過一段成廿分鐘九曲十三灣既上秋名山後，嚟到左Ermin講既Secret Place，Mostar最高山Hum Mountain上既廢棄城堡 遠處睇的確係幾唔錯的～當我地落車影左幾張相時，Ermin話行前小小影啦～ 好呀，唔經唔覺越行越近時，驚見Ermin一支箭咁向廢城堡上跑去!仲不時轉頭大叫“Come on!” 唔係掛............我當時手持防撞相機，足踏人字拖，腳穿游泳短褲，你要我呢個泰國沙灘look去攀石行廢墟!!？？？？ 回頭一望，車門已上鎖................ 我地三個=_=樣出現後，唉今日都死過一次，死就死啦! 咁欺山莫欺水，我諗點都安全d既........只係要忍受利草及矮灌木割腳，同埋用拖鞋嚟攀行山鞋都難上落既石山，記住我條褲仲袋唔落相機要手渣wor! Ermin仲好似怕我地唔夠擔心一樣 : 「Hey你地小心有蛇呀～」 得啦!!!!!!!!!!!!我著緊拖鞋ga!!!!係咪即係詛咒我唔跣落山跌死都比蛇咬死呀!!!？？？？事實係真係有呢個機會ga!!! 不過我覺得我咁既裝備都可以成功攀上石峰並去到廢堡盡頭，真係叻到加零一ga啦! 當然，辛苦過後既景色，的確係特別靚的～ 點擊圖片放大 +6 (同兩個十八歲既女仔泊埋一齊，我都唔係好老je~) 點擊圖片放大 +3 (呢個look爬山都無事，我懷疑下次可以赤裸去北極ga la) 點擊圖片放大 +2 (此地既石質，特登囉左返香港比阿爸收藏，但唔記得係咩質地.....) 終於，呢個超漫長超危險幾乎無命既Day Tour終於完結! 風景係靚，但點解每個地方都係有阻滯ga呢？先苦後甜到咁明顯! 而發生左咁多事，我亦都同Ermin，Manon及Mira做左好朋友!～到而家都間中有聯絡～ so總括嚟講呢個我on居居撞入去既day tour真係玩得開心的～ 有機會要唔要再嚟一次？ 得!但我要人在野Bear Grylls帶住我呀plz! ======================================== 補完此Blog上未成文的相片和無聊閒事: My Facebook Page : www.facebook.com/Garcia.in.Germany ，多多支持呀!~ (就嚟到900人啦!Yeah!!XD)
