德國working holiday第102章 : 克羅地亞(4)十六湖=歐洲九寨溝是也!

瀏覽人數:1707
發佈於 2014.10.24

上回講到於Zadar遇上美妙既海風琴同日落,但其實我嚟Zadar根本就只係貪佢近克羅地亞必到景點Plitvička Jezera,俗稱「十六湖」既普利特維采湖群國家公園je!
係網上睇過相,呢十六個湖唔同觀瀾湖個十八個洞,係靚到爆炸的!
我呢d文人雅士一向在乎山水之間也,豈能不到呢~

由於十六湖位於克羅地亞正中間,多數遊客都會選擇由首都薩格勒布坐約5小時巴士西行作one day trip,或於湖區內酒店宿一宵
但我金睛火眼目測下,擺明Zadar順路d近d就腳d啦!
於是係事前搵唔到任何網上交通既情況下,依然闖去Zadar再搵車!我先唔信呢個咁近又咁出名既地方會無車無tour去!
事實證明--------差d中計!原來一日得一兩班車而且仲好多人去!
所以都係join hostel ge tour或者靠佢地organize一班人租架車會好d,我是屬於後者的~

於Zadar第二日一早9點幾出發,的士包車2-3小時後到達
入場費成人110HRK,即約港幣$142,唔平,不過已包括湖上渡船及回程火車,算係咁啦!
雖然夏天+內陸地區,但十六湖山區氣溫仍是非常寒冷,同行澳洲仔要即刻去紀念品店買厚褸就知幾過份!聽講有時冬天會落雪tim!一聽到呢句就好想冬天再嚟........
而湖內步行路線大致上分為A、B、C、K 4條,每條所需時間及體力要求均不同,旅客因應需要自行選擇
與同行者參詳過後,後生仔身壯力健,行C路線4-6個鐘無難度啦!

正式入場啦!
喂喂喂...............我有無眼花呀?d山川地形,九曲棧道,飛流直下三千尺...........咁大陸feel嘅??(呢度既大陸係褒義來的~)
遠山處瀰漫著神秘的煙霞 ; 山路過處,任瀑布於身邊流逝 ; 我係咪行左入隨意門去左桂林呀??
昨晚既大雨令水位上漲,由圓木階梯湧出,上下山時猶如腳踏瀑布逆流而上,更別有一番風味!

(當時初面世既自拍神棍,澳洲仔玩得非常開心!)

再行到第一湖畔時,清澈透底就基本功啦,重點係翠綠湖水內所見滿佈青苔、已倒塌的巨大樹幹為湖泊添上別致!
古人說水太清則無魚,此處就多到魚塘咁........唔係桂林,根本就係睇相見過既九寨溝!

個零鐘後走到碼頭畔,如果A路線既可以係呢度折返啦,而此處都有洗手間和小食亭比大家休息下飲啖茶食個包
當然啦唔好預d包會太好味,亦唔好預洗手間有幾乾淨,過到自己果關就得啦~
船程約20分鐘,可以飽覽湖岸群山美景,不過大家睇相都知當日天氣多雲不時有零散驟雨,唉大打節扣呢

(同行3人都唔太岩傾,此為唯一既合照!)

落船後要即刻留意你係行邊條路線,因為出口唔同的!
而此地段開始地勢又有不同,以平地及小瀑布為主,但不時又有橫幅甚巨的大瀑布wor,更有圓木小路讓旅客享受步於湖上的感覺,又或巨樹群中的小橋流水人家
總之就係「有feel!」「正!」同埋「行啦喂~」

假假地行到最後最高湖泊時,真係岩岩行左4個鐘!使唔使咁準!?
坐火車回入口,再叫的士大佬嚟車我地走,直接返到Zadar ge hostel~
呢個就係包車既好處,唔使就巴士時間又唔使逼做沙甸魚!而且4個人都係比巴士貴左d d,建議咁做ar~

(衰鬼你話!走人時先好天!)

十六湖的確係值得一到的山水景區!
儘管天陰、儘管落雨、儘管同行者好cool唔太岩嘴形,但我依然睇風景睇得非常過癮~
話時話,點解我行哂呢十六趟渾水,都唔見相裡面果個可以睇住黃河之水天上來既游泳湖ge?
望真d......................
果個係另一個地方Krka National Park嚟ga傻仔!!!!!!!!
呀克羅地亞太多野玩!!!!!我無時間去啦!!!!!!!!!!!Orz

===================================

補完此Blog上未成文的相片和無聊閒事:
My Facebook Page : www.facebook.com/Garcia.in.Germany ,多多支持呀!~

*本站之內容由作者所提供,並不代表本站的立場。因此本站對所有博客的立場、真實性、準確性及完整性不負任何法律責任。

相關話題

收藏此文章
  • Facebook分享
  • WhatsApp分享
  • Line分享
  • 複製連結

發表評論

{{commentText.length}}個字
全部評論 {{comments.length}}

作者最新文章

更多旅遊文章推薦