德國working holiday第六十八章 : 波羅的海撞板單車行

瀏覽人數:2533
發佈於 2014.04.25

回到2月既波羅的海之旅~

 

去得愛沙尼亞同拉脫維亞,點可能唔去埋立陶宛Lithuania呢~

相信十個有九個朋友,都估我會由Riga直落立陶宛首都維爾紐斯Vilnius或第二大城考納斯Kaunas,但抱歉讓大家失望了!

我係由里加直接坐巴士到達立陶宛最西邊的波羅的海海岸城市克萊佩達Klaipeda!

 

 

如上圖所見,呢個地方有個好有趣長條弧月形的島嶼

我plan行程時係google map見到覺得過癮,見里加中央車站又有巴士直到wor,約略問一問Riga既美女hostel職員狀況後,就立刻改行程將佢作為我立陶宛首站了!

據當地hostel staff所講,Klaipeda並沒有太多亞洲人到訪,而來此的旅遊人亦主要前往那半月形沙洲Curonian Spit作單車遊!

真係聽到都不得了! 在一個無咩亞洲人去過既島嶼作單車探險呀,我點可以唔試!!!!!!

 

Curonian Spit是庫爾蘭沙洲國家公園Kursiu Nerija National Park的一部份,又係聯合國世界文化遺產之一,近年面積已因沙土流失而不斷減少

洲上約有5個小鎮,一般都係先到Klaipeda港口坐約每小時一班的船,到達沙洲北面的Smiltynes後直踩落去最南邊的Nida,又或在Smiltynes坐巴士落Nida踩返上嚟

係hostel見d航行班次唔太岩,細問之下原來可由Klaipeda中央車站直接坐車去到Nida!慳左去兩個地方既時間仲唔使回頭!Perfect!

之不過果架巴士唔一定有位放單車!幸好架車除左我一個乘客都無,架大牛龜點放都得!

而仲有一樣令我興奮既,係成架巴士會駛上船嚟過海!十足香港已絕跡既汽車渡海小輪,未開始踩已十足興奮呢!(我知我大鄉里~係咁ga la~)

 

 

一個鐘後到達Nida!

唔使踩都見到呢個咁樣既海邊----------

 

 

雖然話係赫爾辛基同Haapsalu都見過完全結冰既波羅的海,但都係舉起相機係咁影!

始終如此壯闊既自然氣勢返香港就無得見ga la!

 

地圖到手後就正式出發啦~

一貫見到有feel就衝過去既風格,踩下踩下無意中去左一個沙灘上~盪下盪下又遇到座山此路不通~

我事check返先知我原來去左一個當地好出名的海灘,夏天非常好feel!

可惜我而家係冬天,混合雪冰沙泥既道路“啜軚”非常難行!

加上好多時地面都有唔起眼既冰塊,一踩上去行山鞋都跣到7彩,何況係單車!我自己小心極上斜時都出左幾招青城派絕技屁股向後平沙落雁式

 

唔經唔覺入左山林中........越行越唔對路.......睇地圖無呢座山ga wor........

前面越行越見僻靜......唔好制,返返Nida先,回到城市後就發現,原來自己白痴攪錯哂成個方向!

以為面向波羅的海既右邊就係北,但原來呢個一望無際又結冰既係沙洲與歐洲大陸之間既內海Curonian Lagoon! 我被之前既經驗“波羅的海係結冰的”完全誤導了!

即係話我岩岩向左南面行,再直行就踩到俄羅斯啦..............

實在超級傻仔......咁我同卓洛“東面等於右邊”有咩分別.................

 

 

去超市$15港幣唔使就能買隻雞脾同立陶宛大餃子當lunch,坐係海邊望住冰海靚view食不亦樂乎~

食完大讚好味好抵,轉頭就發現我跌左對雪地手襪!!!!!

於是呢餐好味好抵就盛惠$15+$350 la.............

最慘仲係天寒地凍無手襪踩單車d手指會死ga wor!我件風褸又fit size拉長唔到隻袖!

頸凍好過手指斷,拉高件衫,將頸巾繃帶式纏手頂當!

效果?好過無啦...........

 

 

攪左兩個幾鐘,終於正式向Smiltynes既正確方向進發啦!

沿內海岸線前進,沿途風景也是不錯,但實在太多小路成日行錯!

不久到達另一段森林平路時,我一不為意來了個360℃轉體杜卡卓夫前空翻,幾乎以為自己係五星戰隊變身go go power ranger!架車就成龍電影一樣打平割草式飛出幾里遠!

原來整條路因尋晚落大雨而結成一層看不見既滑冰,望望遠方仲過份!成條馬路牛奶白色ge!私家車都行唔到呀!

於是想循另一邊的外海岸前進,但原來係無外沿海路的,我要努力向上既就要踩沙洲既main road!

咁就大鑊啦............頭先巴士上已知呢條主馬路掘地中,起碼有10公里地面係佈滿小穴同泥濘,仲未計水同冰

羅家英話齋知唔知咩係“蹬蹬蹬蹬”?我幾乎每踩一圈就“蹬”一次!就嚟變元太祖ga la!

加上零下3℃之下,我頸巾纏手囚犯上扣咁樣控住架良驅,泥濘濺到齒輪上越來越“啜”,長期好似用6波行車咁,不時仲要向後望有無私家車食左蘑菇衝上嚟,還有閃避泥窪同結冰地面......

真係有史以來最辛苦最危險的一次單車行...............

 

(牛奶路因個體操動作太完美,enjoy到唔記得影相)

 

沿途都有幾個位值得一到的~

我分別到了最南方的兩個沙灘(搵唔返叫咩名),這個就是真正波羅的海灘了!

空無一人既沙灘,點影相發癲寫大字都得~

但都諗,如果可以一班fd嚟呢d無人沙灘就正lu,一定玩到痴線........

 

 

好不容易終於完成果10公里!!!!!!!

但到下一站小鎮Preila前還有約1.5公里上山公路,經過之前既戰地公路我對腳幾乎已到極限,上山一半已開始抽筋 (keep住踩6號波ga)

坐在森林馬路上拉筋時,眼看天已黑,腳已抽,再看地圖原來我只完成了約1/4路程!!!!!???

無辦法,只好捱到後坐巴士回程吧

幸運的是,我到達Preila是17:12,17:15有車到 Smiltynes坐船回Klaipeda,而下一班車係20:15..........

唔能夠想像疲憊既我要係零度入黑的無人森林小鎮中捱多3個鐘..........

 

 

就係咁樣,完成左我呢個傷痕累累傻下傻下撞板多過食飯既單車之旅啦

我粗略search過,網絡上寥寥數篇的Klaipeda中文遊記,應該只有我呢篇係遊於冬天,所以有返少少建議比各位想冬日時份來此旅遊的背包客 :

 

1. 一定要小心check好hostel架單車 ----- 轉波,煞掣,高度等等,有唔岩既唔好怕麻煩一定要換!唔係真係搵自己嚟玩ga ja

 

2. 雖然話可以由頭踩到尾,但個沙洲睇落細,其實極大極長! 聽hostel staff講d運動人爆seed都要一清早踩到下晝,如果唔係踩開長途或具有台灣環島能力的話,都係學我踩一兩段路算啦

 

3. 島上巴士的班次非常疏,而盡早做好資料搜集,預計好幾時回程,唔係真的會流落荒島.........

 

4. 沙洲的路牌指示並不完善,而且小路和地圖無的路甚多,有些感覺上真的有危險性,一發現唔對路請即刻回頭!

 

5. 單車積雪加結冰既海邊真係非常難踩,可以的話,請做足一切防滑措施和抄車到7彩既心理準備

 

總之,Klaipeda係一個少人但頗有特色既地方,夏天嚟踩單車郊野上應該唔錯~冬天ge話.......加油呀各位!

 

===================================


IG果邊間中會有d和Blog及fb page不一樣的相片和story,大家有興趣既去follow下支持下啦~


Instagram : https://www.instagram.com/fung_garcia_backpacker/




==============================

我既Youtube Channel正式開通啦!!!!

快d Click入 「鋒加西亞 / 旅人瘋語」Subscribe 睇片再禁個like啦!~



=================================

Email : funggarcia@gmail.com


文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!







 

 

*本站之內容由作者所提供,並不代表本站的立場。因此本站對所有博客的立場、真實性、準確性及完整性不負任何法律責任。

相關話題

收藏此文章
  • Facebook分享
  • WhatsApp分享
  • Line分享
  • 複製連結

發表評論

{{commentText.length}}個字
全部評論 {{comments.length}}

作者最新文章

更多旅遊文章推薦