早前跟朋友去紅磡必嘉街一帶飯聚, 原來那邊都好多食店哦~ 晚飯後, 總是想食些甜品潤一潤! 我選了這款…唔記得正確名啦, 好似係鮮雜果河粉~ 以$26的定價來說, 不算太貴啦, 因為響別家食的也差不多價錢, 或者會仲貴! 我唔係好食凍野的, 一來對身體唔好, 二來一食落去成個人凍晒既感覺好差! 好彩呢個河粉一D都唔會過冷,味道剛剛好, 唔會過甜, 椰汁河粉質地軟滑, 煙煙韌韌, 正! 成個汁都係芒果底, 好好味~ 朋友叫了這杯綠茶芭菲 ($28). 相比之下, 我覺得呢杯好似抵D, HAHA. 不過唔係apple to apple, 無得相比既~ 綠茶雪糕味道濃, 雪糕球後有兩粒QQ的, 好得意, 唯粟米片太多, 食到牙骹有D軟, 但整體都係好味的~ 另一位朋友點了傳統的哈蜜瓜西米露($18), 賣相無特別, 她經常幫襯呢間鋪的, 相信亦唔會差. 見到隔離枱見既綿花冰/刨冰都好多料, 唔係講冰多, 而係D料都好足的! 都係$28-30! 店鋪裝修一般, 不過價錢同食物質素都幾好. 「潤一潤」有兩個鋪位, 好明顯睇得出那個才是主鋪. 而家做甜品鋪, 除左有傳統既糖水, 仲要有特色甜品才夠競爭力. 「潤一潤」算是做得不錯, 每款甜點索價亦不過高, 甚至可說是偏向便直, 絕對抵食! 不過細鋪個邊就坐得唔舒服, 每張枱都貼得幾近, 坐近走廊位的亦會經常被撞....>.<
