很慶幸獲酒店邀請到位於沙田石門的萬豪酒店試住, 入住日期是星期六(2月2日), 這次體驗十分難得啊, 因為我地係第一批住客, 換言之房間從未有人住過~ ~ ~ 萬豪真係好疏爽, 讓我們免費地享用住宿、餐飲及設施, 而我作為體驗賓客, 亦比了酒店很多意見, 詳盡地填寫意見書. 大致上行程是這樣的: 自助晚餐 > 住宿 > 早餐 > hotel tour > 甜品示範. 活動安排得宜, 若果我有帶衫做gym就好了; 泳池就未開, 形狀好似隻船咁, 好特別. 先說食物質素, 因為我地好遲check-in, 去到都開始食dinner buffet 了. 用餐地方是在Momo Café, 地方十分寬敞, 環境舒適, 每張枱有足夠空間感, 唔洗迫. 另外亦有private dining room, 當晚有酒店高層用膳, 所以影唔到相比大家睇. 不過我出去拎野食經過, 見到內裏的setting都好好, 夠坐10-12人. Café的一角有這個area, 真係好似飲咖啡食件餅的café設計~ 自助晚餐款類多, 有前菜、沙律、日式、西式、海鮮(龍蝦仔、凍蝦、螺、大大隻蟹)、麵檔、甜品等等. 鮮甜既清酒煮蠔、多膏既蟹、好足料既無花果雪耳燉木瓜湯! 我唔食牛又少食肉, 但朋友說牛及羊架等肉類都好惹味!! 砵酒牛仔骨好正; 刺身好新鮮, 有三文魚、八爪魚、墨魚、鯖魚等等. 侍應不時上前問我地要唔要refill飲品, 我先來杯橙汁, 臨走就要杯cappuccino. 連紅酒都可以點哦~~~ 一般來說, buffet只包一杯飲品的, 唔知今次會否因體驗團關係, 而不停refill都得. 收餐速度是OK的, 要記住最好食幾多、拎幾多, 唔好食淨晒響碟, 因為侍應會以為你還未享用完哦. 好了, 大家都好心急想知甜品區有咩好食哩~ Shooter甜品有三款, 最好味係中間個款 '菠蘿椰泡沫' 綠茶燉蛋好鬼滑哦~ 切餅類有藍莓芝士餅、栗子蛋糕、美國芝士餅、蘋果碎碎撻 (好好味!!) 朱古力球放在別緻的 ‘容器’ 內, 視覺上亦能享受啊~ 即席製甜品有朱古力心太軟、桑梅橙香梳乎厘. 呍呢嗱雪糕及生果是我後加的~ 一般的梳乎厘都是呍呢嗱味, 今次的是桑梅橙香味, 粉紅色好吸引. 莓類我一向喜歡哩~ 這裏是用光波爐去焗的, 5分鐘就食得, 但我覺得甜左D、質地濕左D. 自助早餐亦在Momo Café, 種類夠, 只係我朝早食唔到太多東西…..同埋甜酥餅類….一朝早食有點膩. 所以我的早餐頗簡單. 最好味係碗雞粥, 粥底靚, 雞肉唔會有太多骨, 又唔會落好多調味料, 食得出係淆出來的. 日式燉蛋放了味噌去整, 好味~ 照燒汁雞扒又係無得頂, 肉質唔會太乾, 但又好入味. 總括來說, 食物質素非常高, 雖然價錢未公佈, 但私底下我都問左價, 價錢都很公道. 可惜…酒店員工說最出名的乳鴿肉同本地菠蘿包我都無試到….唯有等佢正式開業, 我同屋企人再去啦~
