近期有唔少來台嘅港人都開茶餐廳, 好可惜係開得快都執得快. 其實初來報到, 最好都係熟習左呢邊嘅文化, 消費模式先進一步做生意穩陣d. 以下同大家分享下台灣搵工係點 . 台灣難唔難搵工? 同香港一樣都有好多搵工網嘅. 例如: 1111, 104 等等嘅人力銀行. 基本上都係分行業, 工種, 工作地點咁分類. 當然服務行業流失率都係比較高, 長期都會請人, 不過一般港妻係香港做開OL嘅, 係好難無啦啦去做老麥或去賣炸雞咁.(唔係話做服務性行業唔好, 只係已經要離鄉別井又冇家人朋友時. 始終做反近似d嘅工作, 會易適應d ) . 因為台灣工種比較多, 一般寫字樓工其實都有好多選擇, 亦有好多輕工業, 電子業, 原材料, 食品公司俾你選. 個人建議係咩工都見左先, 因為多一次嘅interview就代表多一個機會請你, 翻左工真係唔鐘意先唔做都未遲. 將心比己, 好多時公司都冇乜信心用一個"新移民", 千其唔好抱住 "我來旅行感覺都同香港差唔多唧"呢個心態, 一d傳統行業嘅公司文化同我地係好唔一樣, 同事睇你係會當一個外國人咁睇. 所以有人請最好say yes先, 有好多朋友仔就係揀來揀去, 最後成年都搵唔到一份工呀. 台灣搵工要咩技能? 撇開學術要求, 識渣車, 打中文字, 台語能力.呢3樣我覺得係我地蝕底嘅地方. 渣車: 地方大, 老細叫你落一落銀行可能都要渣車先去到. 唔識渣機車/ 汽車對老細帶來不便. 點請你啊? 打中文字: 一般公司電腦內置輸入法係注音, 無蝦米, 倉頡, 速成. 港人一般用嘅九方, 六哥, 廣東話拼音 sorry係冇嘅. 不過細公司通常都有得商量, 可以自已裝. 入到大公司, 就未必了. 台語能力: 個人能力係零, 完 XD 之前有講過, 我地港人比較有優勢係英文能力. 建議考一個英文嘅水平試TOEIC, 佢用分數來分grade. 一般公司係睇listening 同writing呢2方面. 其實做下mock, 攞最高grade 金色cert 一d都唔難架 台灣返工嘅工作環境? 大公司一般都會有冷氣, 不過就算有開, 佢地都係開26-28度, 非常環保 如果你搵到細公司, 代北極熊多謝你, 你為環保出左一分力. 沒錯, 好多細公司, 特別係家庭式的, 非常非常非常之耐熱, 同時十分十分十分慳家. 所以大部份都唔會開冷氣的. (本人嘅公司就係見工時有開, 翻工後開親冷氣老闆娘都好凍 T.T) 點樣返工? 始終地方大好多, 點對點有公共交通翻工其實好難, 好多時近嘅距離可能都要轉好多程車, 變相浪費好多時間. 所以有機車/ 車牌係非常重要 屋企人可以接送當然更好啦 ~
