去日本玩，最幸福就係不斷食好嘢。今篇就記錄一下今年年頭嘅名古屋之旅有咩新奇有趣嘅美食，有部份都係誤打誤撞先發現架!

1. 名古屋市區轉角不起眼拉麪店 - 肉そばやま昇

呢間拉麪店其實只係當時酒店附近一間普通到極嘅小店，不過佢哋碗麪嘅性價比相當高。
上面呢碗正常size嘅麪印象700円左右，無論蛋、叉燒定麪都恰到好處。

然後，加多少少錢就可以叫碗大盛

麪底起碼係正常size嘅兩倍!
在場都不少本地人食，老闆都好好人，係間值得幫襯嘅溫情小店。

2. 平靚正魚生丼 - 若狹家

若狹家其實係日本一間幾出名嘅平價魚生丼連鎖店。
佢最好嘅地方係可以好似叫車仔麪咁，自由配搭自己鐘意嘅魚生。
好似上面四款魚生：三文魚+明太子+海膽+赤背，價錢2000円有找。
有選擇困難症嘅話都唔怕，店內周圍都貼滿不同set menu，是但整碗都唔錯。
唔識日文都唔洗怕，份menu有埋圖，指手畫腳就叫到架啦。

質素方面，魚生都幾新鮮，海膽係冇臭腥味嘅，
唯一唔太鐘意明太子太咸，撈飯都處理唔到。

3. 280円均一價燒鳥屋 - 鳥貴族

呢間餐廳主打Menu全部嘢食嘢飲都係一律280円(未連稅)。
雖然價錢咁抵，但嘢食一啲都唔馬虎，所有串燒都係即叫即燒。
除咗串燒，都仲有好多小食選擇，高度推介薯仔沙律!

咁大個釜飯都係280円! (但又係咸咗少少)

仲要有埋部電子Menu喺面前不斷loop，真係一不小心就叫到成台都係。
而最開心係坐Bar台會有年青兼職侍應同你吹下水LOL

4. 食魚生食到盡 - 名古屋機場Food court魚錠

由於臨走嗰日都對魚生念念不忘，所以去到機場都要最後沖刺。
嗰時諗住只係醫下肚，是但嗌。
我想講，呢間都超。級。好。食，價錢又係2000円左右。

~~~~番外篇 - 金澤 ~~~~
如果大家都咁一樣魚生上癮的話，又如果咁啱會去金澤的話，
記得唔好錯過近江町市場嘅魚生店，廢話不多說，去圖!

So sexy~~~~~~

=====
肉そばやま昇
地址: 愛知県名古屋市中村区名駅南 1-4-10 昭和ビルディング 1Ｆ(名古屋車站附近)

若狹家
地址: 愛知県名古屋市中区大須 3-9-20 (大須觀音寺附近)

鳥貴族
地址: 愛知県名古屋市中村区名駅4-16-33-4F (名古屋站附近都仲有好多分店)

成功發佈