日本再自駕‧秋葉初體驗...快閃名古屋 第六天 (續)..... 將部實而不華, 又可靠, 既慳家既Prius 還番俾Toyota後, 便第一時間去鄰近既名古屋JR駅逛商埸同醫肚; 誤打誤撞地在駅內暗角找到一條橫街, 裏面的食店清一色售賣日本各地拉麵, 我們揀了間賣和歌山拉麵的, 見有好多人幫襯, 心唸衰極有限, 但有點失望, D麵麻麻地, 豬骨湯底仲好味の素, 份量重好細, 唉! 又一羊群心態! 稍為充飢後, 便乘地鐵「櫻通線」到名古屋人氣購物區『Sakae榮』; 一出「久屋大通」地鐵站就見到名古屋地標「電視塔」, 襯天還未轉黑, 我們便先到隔鄰的立體公園「綠洲Oasic21」逛逛, 這裡是「榮」的新觀光點, 又係情侶拍拉盛地, 有各式餐廳及商店, 走上玻璃天台『水の宇宙船』更可飽覽電視塔同「榮」的美景... 同太太散散步, 拍拍照後便落番Oasic21個商場Heal多陣, 冇乜野買到, 但路過麥記, 見D魚栁包大平買¥100一個, 橫掂頭先碗麵都消化哂, 又攰攰地, 不如坐低飲啖烏龍茶食個包, 話時話, 東瀛D麥記魚栁包除左好味D, 又真係大過香江D蚊型包仔好多呢... 保充精力後又要衝喇, 我們捨棄千編一律的地下街, 選擇走回路面, 從緣洲21沿「久屋大通公園」漫步欣賞華燈初上的「榮」... 「榮」真係好繁榮, 有數間出名的百貨公司, 比較大的有松板屋、Parco同三越, 我們先去三越逛逛, 由頂樓巡到落地庫個超市,有D腳仔軟, 但見到D超靚魚生同熱辣辣既熟食,兩隻胃食貓當堂精神番, 最吸引係佢地仲做緊清貨大平賣添, 我們就決定今晚係呢度掃貨返酒店開大食會, 豪食一晚... 入完貨後, 便乘地鐵「東山線」返回名古屋駅; 除了是JR的主要換乘車站外, 亦係名鐵、近鐵、地鐵同新幹線的主要中心站, 非常繁忙, 站內人頭湧湧, 加上閃爍的聖誕燈飾, 更為熱鬧... 今晚入住的「東橫Inn」距離名古屋駅只需數分鐘步程, 旺中帶靜, 一晚雙人房只收¥8,715 ,同金沢一樣, 包簡單朝食; 我們先取回寄存的行李便Check-in上房; 開飯喇...有"沙律大蝦"、名古屋名物"酥炸芝蔴雞翼"和大大隻"甘蝦壽司", 仲有主角..."魚生", "鮮帶子", 加埋限量版Asahi太陽啤酒, 袛花數千円就享受一頓豐富魚生晚餐, 食飽飽執好行李就"訓交交豬", 明天要一早出機場呀... 有二百多萬人口的名古屋位於日本的中部, 是日本第四大城市。在日本歷史上名古屋佔有重要的地位, 十六世紀日本三位大將軍「織田信長」、「豐臣秀吉」及「德川家康」都出生在名古屋; 今天的名古屋更成為日本工業中心, 市值超過二千三百億美圓的全球最大豐田車廠便是來自名古屋.... (有關資料: 名古屋市導覽圖) ……續