Issyk-Kul Lake, Here we go~~~~ 原本尋晚係同司機哥哥約好左朝早9:30出發的,點知原來佢同當地接待嘅旅行社溝通有d問題,其實我地應該要8:30 就出發架喇。到8點幾,reception姐姐走黎拍門,話我地嘅tour guide已經響度等我地,即刻要彈起身執野走人。響吉爾吉斯嘅3日行程,係由一位叫Alexandra嘅大叔接待我地,睇佢style,十分熱愛行山嘅人啦。 食埋早餐就出發。我地黎吉爾吉斯主要目的係為左要去距離首都比什凱克220公里外嘅伊塞克湖遊一圈。今日第一日嘅行程預計車程大概4個鐘。途中會去一個叫Tokmok嘅地方參觀一個叫布蘭那塔嘅古蹟。 「中亞瑞士」- 吉爾吉斯 簡單介紹一下呢個國家。一個位於中亞嘅內陸國。「吉爾吉斯」響吉爾吉斯語裡面解作「草源」同「流浪」,含意「草源上的遊牧民族」。一個高山國家,有「中亞瑞士」之稱。 全境海拔500米以上, 1/2地區海拔1000-3000米, 1/3地區海拔達3000-4000米。東北有天山山脈西段,西南部有帕米爾-阿賴山脈。僅西南部和北部有低地分怖。納倫河橫貫全境,長540千米。東接中國,南接塔吉克,西接鳥茲別克,北接哈薩克。面積198,500平方公里,約180個香港咁大。據2012年數據顯示,人口約549.67萬人。首都比什凱克(Bishkek)。 前蘇聯加盟共和國之一,於1991年8月31日獨立,但獨立後經濟困難重重。吉國之經濟開始時十分依賴蘇聯,獨立後適逄蘇聯解體,阻礙了吉國與其他同期獨立出黎嘅國家向市場經濟過渡。 經過多年經濟改革,吉國政府試圖建立可持續增長經濟模式,幾經努力,終於響1998年12月20日加入了世界貿易組織,係中亞五國中最早加入世貿嘅。 吉國經濟以農業為主,佔GDP35.6%。而且吸收了一半就業人口。呢個都係因為地理環境山多所致。吉國政府銳意轉型,農產品加工係經濟工業化嘅重要組成部份。吉國礦藏豐富,煤,金,鈾,銻同其他稀有金屬儲量好大。但缺乏天然氣同石油,需要依賴入口。而出口就主要係出口有色金屬,礦石,農產品,電力(由於多山同水資源豐富,可利用水力發電)。近年吉國亦開始發展旅遊業,社區遊亦開始流行,政府希望旅遊業可以成為該國經濟新動力。 比什凱克介紹 吉國首都,該國政治,經濟,交通,科技及文化中心。 “比什凱克” 係吉爾吉斯族人自古以來對該市嘅稱呼,吉爾吉斯語意指「攪拌馬奶嘅棒子」。 響蘇聯時期,被當時政府稱為 “伏龍芝”。以紀念一位叫伏龍芝(Mikhail Frunze)嘅蘇聯與吉爾吉斯共產黨軍事家。佢係響呢度出世的。1991年獨立後,又叫返做 “比什凱克”。 亦為中亞古代重要城鎮,係古絲路其中一段經過天山山脈,貫通西域同中亞草原嘅要道所經嘅驛站。人口約87.4萬 2010年數據), 吉國主要人口都住響呢度。 到訪李白出生地-托克馬克 經過差唔多一個鐘車程,我地就到左距離比什凱克60公里外嘅一個城市托克馬克(Tokmok)。呢個人口只有6萬嘅城市,位於吉爾吉斯楚河州北部,海拔816米,唐朝貞觀年間稱作碎葉城(或素葉水城,因依傍素葉水(楚河)而得名,呢度一度係安西都護府所在地。 <<大唐西域記>>係咁記載的: 「清池(即伊塞克湖)西北行五百餘里至素葉水城。城週六七里。諸國商胡雜居也。土宜糜麥蒲萄。林樹稀疏。氣序風寒人衣氈褐。素葉已西數十孤城。城皆立長。雖不相稟命。然皆役屬突厥。」 根據郭沫若考證,中國唐朝詩人李白就係可能響度出世,一直住到6歲先同家人一齊搬到中原居住。 一去到Tokmok,入城路口就有架飛機模型(不過miss左影唔到),原來呢度曾係蘇聯最大嘅飛機員培訓地,好多新式飛機試飛嘅機場,不過機場已經荒廢。 伊塞克湖途上唯一景點:布蘭那塔(Burana Tower) 入到Tokmok,再多20分鐘車程,經過一條單程小路就到達布蘭那塔。建於11世紀,磚造建築,約高25公尺,伊斯蘭教拜喚塔兼瞭望台。於2001年曾被UNESCO列入觀察名單。從2001年開始,此地區不停進行修復,響塔後嘅廢坑中挖掘左唔少古物。響塔邊有座小型博物館,我地先入去參觀。 布蘭那塔正門~ 布蘭那塔真身~ 博物館與紀念品店~ 博物館內展品~其實係唔影得的,但係我影完大叔先出聲~keke 去完博物館後,我地就去埋隔離一間賣紀念品嘅shop度睇下。係一間氈房黎架。 遊牧民族生活必須品-氈房(Tjundjuk) 簡稱蒙古包。係可以隨時拆卸運走嘅圓形住宅。由網狀編壁 “哈哪”,條木楞子”烏尼”,圓形天窗同門構成。外面蓋上氈子,再用鬃毛繩子勒緊就攪掂。 唔好睇佢好似好細,其實可用面積好大的。而且室內空氣流通(天窗可以打開的, 編壁牆底部仲有一層團氈,夏天可以掀開取風,冬天可放下保暖。) 最大優點係易拆易裝,方便搬遷。一般只需2-3個鐘就可以搭好。 網狀編壁 “哈哪”,條木楞子”烏尼” close up~ 圓形天窗 正因為吉國係個遊牧民族,氈房係最有代表性嘅東西,所以佢地嘅國旗上亦可以見到氈房房頂嘅形象。 國旗解說: 紅色=和平, 開放, 中間一道四十光芒嘅太陽,代表吉爾吉斯40個部落。太陽中間每組三條,互相交叉嘅線條,就係氈房嘅形象了。 吉爾吉斯國旗~ 遊完博物館同紀念品店之後,我地先到塔後面嘅遺址參觀。呢度收集左好多石人雕像,有d上面仲有樣架,石人像可以反映中亞墓葬文化,響西元前1800件青銅交化時期,當地人會響先人嘅墓前用簡單雕刻面目猙獰嘅鬼神或怪獸,用黎鎮邪,避厄同祈福。 響呢度擺嘅,全部都係收集之前放響墓前,用黎守護靈魂,顯示墓主尊貴身份,記錄戰人殺人及墓地標示嘅石雕。不過響突厥人信左伊斯蘭教之後,石人亦冇再被使用。呢種墓葬文化唔止吉爾吉斯有,遠至哈薩克都有,可見當時呢種文化響中亞區域好流行,範圍亦廣。 李白出生地,昔日絲路最繁忙嘅路段,而家就只剩下荒蕪了~ 呢座土堆係古索格狄亞人修建嘅古巴拉薩袞遺址,後來響11世紀成為回鶻黑汗王朝嘅一座都城。 睇完遺址之後,我地就上左去布蘭那塔望下。 我地參觀果陣,有一班小學生響果度旅行,佢地玩得好開心,仲走埋黎我地度睇下我地攪梗咩,我地又做左外星生物喇。 繼續向伊塞克湖進發 去完布蘭那塔之後,就正式向伊塞克湖進發。車一路沿住A365公路(由比什凱克可到Balykchy至納倫(Nayrn),通至中吉接壤邊境Torugart Pass),直駛往伊塞克湖。 沿路風景真不錯~ 點擊圖片放大 +3 中途停低食午餐~ 點擊圖片放大 +2 食飽之後繼續進發 再走左一段路,就到左伊塞克湖嘅外圍城市Balykchy(巴雷耶奇)。黎到呢度,就意味住我地已經到左伊塞克湖嘅西邊邊陲不遠了。Balykchy,人口42380(2009年數據),位於伊塞克湖最西端。海拔約1900米。主要羊毛,農產品加工工業及交通重鎮(有航行伊塞克湖之船隻,鐵路總站及主要公路分岔口。(響呢度可以由A365公路轉入A363環湖公路) Balykchy 標誌~ 過左Balykchy,我地就去到 “伊塞克湖生物保護區 (Biosphere Reserve-Issyk Kul)” 嘅入口。期待已久嘅伊塞克湖終於到喇~~~~~ 入口招牌 得Alexandra大叔提醒,右手邊眼前嘅就係伊塞克湖了。好興奮,終於到喇~~~ 第一眼的伊塞克湖~ 沿住環湖公路,我地就到左今晚要留宿嘅村莊Tamchy。係一個位於北岸湖邊嘅村莊。今晚住嘅係homestay,響一個有參加CBT社區遊(Community Based Tourism)嘅家庭留宿。吉爾吉斯現正積極發展旅遊業,CBT係由瑞士有相關經驗嘅單位專程搵人教當地人點樣接待遊客,從而令佢地可以賺d多外快,改善自己生活。現時該國熱門嘅旅遊點都開始大攪社區遊,想了解當地文化,接觸當地人同來自世界唔同地方嘅遊客,住呢d CBT homestay會係個好選擇。 到左Tamchy, Alexandra大叔先去CBT Information Centre度問點去我地要住嘅地方,之後就直接去果度喇。 CBT Information Centre 客房隨拍,小熊響呢度認識左一班新朋友啊~ 點擊圖片放大 屋外嘅花花草草,高山王國真係唔係浪得虛名,花都靚過平地嘅~ 屋主嘅貓貓,原本好寫意咁曬梗太陽,點知我地埋去影左幾張相打擾左佢,最後佢發脾氣走左。 CBT Tourism Homestay成員之招牌~ 今日住入同一個homestay嘅,仲有1個荷蘭人同1 個加拿大人,佢地係第二次去中亞旅行了。仲要係背包遊果隻,真係好佩服佢地。 近距離接觸夢寐以求嘅伊塞克湖 Settle好晒之後, Alexandra大叔就帶我地出去伊塞克湖見識下了,呵呵~~~期待已久嘅事要發生喇~~~~~~~ 我地住嘅homestay,其實就響湖嘅北岸旁邊。出到去橫過左條環湖公路, 再沿住對面馬路各南行就會到湖邊。 On the way to Issyk-Kul Lake, 橫過環湖公路中,Alexandra大叔之背影。 到湖邊路上嘅超級湖景屋,俾間我就好喇~ 行左大概5-10分鐘,伊塞克湖就呈現響我地眼前。周圍好寧靜,見動物多過見人,可能已經過左旺季嘅關係吧 (旺季一般係每年6-8月,當地人同其他中亞國家嘅人都會黎避暑。) 點擊圖片放大 +2 伊塞克湖介紹 位於構成天山北部支脈嘅Kungey Alatau 同Terskey Alatau之間。可以話係天山環繞。 海拔1608米,世界第二大高山湖泊,面積6203平方公里,湖水最深處達702米。東西闊170公里,南北長70公里。冬天不結冰。 “Issyk-kul”- 突厥語也,意指 “溫暖湖泊”。唐代稱之為「熱海」,清代稱「特穆爾圖淖爾,圖斯池」。 湖水微咸,水源來自四周天山山脈收集得來嘅積雪融水同高山泉水,無出水口,屬內流湖。可以調節氣候,再加上充裕嘅降雨,令呢一帶成為吉爾吉斯嘅綠洲。 吉爾吉斯人一向以呢個湖為榮,直頭當佢係母親湖看待。佢地仲有句諺語「冇到過伊塞克湖,就唔算真正到過吉爾吉斯。」。 呢個湖,有住十分豐富嘅過去…… 響古代,呢度周圍嘅大草地係遊牧基地。傳說帖木兒亦曾安排將呢度附近地區做夏季指揮部 (大概響Karkara Valley附近)。 唐代玄奘取西經時亦有路經呢度。<<大唐西域記>>係咁描述呢度的:「山行四百餘里至大清池(或名熱海又謂鹹海)。周千餘里,東西長南北狹,四面負山,眾流交湊,色帶青黑味兼鹹苦,洪濤浩汗,驚波汨淴。龍魚雜處,靈怪間起,所以往來行旅禱以祈福,水族雖多,莫敢漁捕。」 蘇聯時期,伊塞克湖一帶係禁止外國人進入的,事實上當時吉爾吉斯範圍除左Bishkek之外,大部份地區都係唔準外國人去架。響該時期湖周圍曾種左大量罌粟同大麻,但後來因為國際壓力而「被消失」了。點解呢區咁神秘唔俾外國人入黎?好大原因,係因為呢度當時有住好多蘇聯嘅祕密。當時為左避開西方監視,響湖區嘅Mikhaylovka水灣曾係蘇聯海軍用黎祕密試魚雷嘅地方。響Mikhaylovka對面嘅Koy-sary,有一個軍事研究機構。 除左係軍事重地,呢度仲因為有溫泉同怡人湖境,因而吸引左好多蘇聯高官同太空人響執行任務之後黎度假同療養。蘇聯解體後,而家黎呢度度假嘅,就變左做一山之隔嘅哈薩克暴發戶了。令原本響蘇聯解體後變得蕭條嘅溫泉旅遊業再現生機。 就係因為呢個湖有住太豐富嘅過去,關於佢嘅傳說都有好多。 關於佢嘅形成,就有好幾個講法,以下係其中一個: 好耐以前,高山上有座城堡,主人係個貪婪、殘暴嘅大汗。山腳下住左一個牧羊人美若天仙嘅女兒,好多人傾慕佢嘅美貌前去求婚 ,但姑娘一直答:「我已有心上人。」曾有一個英俊騎士騎住白馬帶佢去到好高嘅地方,從手中摘下戒指戴佢她手上話:「我好快會返來。只要有戒指在,你將遠離任何災難。」之後大汗帶住貴重禮物去求婚,同樣遭到拒絕。姑娘獨自上山去搵心上人,唔小心跌左戒指。佢喊住跑返屋企,半路上被劫持到城堡中。但姑娘甯死不從,縱身跳出窗外,落下懸崖。就響呢個moment,地動山搖,大汗座城堡開始下沉,從四周嘅山谷中湧出一股股洪水沖向城堡,直到山谷和城堡一起沒入水底…… 除左伊塞克湖嘅形成有傳說外,仲有D其他得意嘅傳說。 有人話一直搵唔到嘅成吉思汗墓就響湖底。據考證,伊塞克湖底確實有古城堡遺跡,考古學家已從湖底打撈出一D古代生活用品周古錢幣,經鑒定係成吉思汗時代物品。唔少歷史學家和考古專家支持呢一個推斷。因為當年呢一區係成吉思汗兒子嘅屬地。 據說,成吉思汗去世後,其後人秘密將成吉思汗遺體同眾多的財寶運到湖區,並製作左巨大石棺,將遺體同財寶裝入並沉入湖底。然後將其他財寶藏響伊塞克湖地區嘅山谷中,引泉水將佢地掩藏起黎。後來所有參與引水工程嘅人都被殺死,藏寶地方響邊至今都仲係個迷。 另一個就係話湖中同尼斯湖一樣都有水怪存在。佢仲同尼斯湖嘅Nessie一樣,有名架,叫Jekai。唔知係唔係真嘅呢? 想到伊塞克湖看一眼嘅原因,最主要係呢度天山環繞,其實小妹自小就十分嚮往天山,所以就下定決心要黎一趙。 終於親身見識到伊塞克湖嘅喜怒無常~ 到左湖邊嘅沙灘之後,我地不停影相周圍睇。大叔亦有備而來(連泳褲佢都準備好),想響湖度游水。亦撞到同我地一個homestay嘅荷蘭人同加拿大人。佢地已經游完水上返黎喇。 畢竟係一個響海拔1600米上面嘅湖,其實都幾涼爽,而且風都好大。果陣應該有21-22度,但係水溫就應該得10幾度。不過荷蘭人同加拿大人猛話好舒服,外國人體質果真唔同。雖則叫 “熱海”, 但其實佢嘅水並唔係好似岑參首詩<<熱海行送崔侍禦還京>>中咁講,「西頭熱海水如煮」。(真係懷疑條友係咪冇去過只係響度吹水。) 係凍冰冰至真~~~ 正當Alexandra大叔想落水嘅時候,個天突然暗晒,仲行雷添。(幾分鐘前仲係陽光普照架) 之後仲落雨,越落越大,於是我地走去大樹底避雨。 好乖嘅狗狗。我地一去到湖邊附近果陣,佢好似知我地要去邊咁,做迎賓帶我地去湖邊。我地影相同攪事果陣佢都響離我地唔太遠嘅範圍自己玩。之後我地去避雨,佢走返黎我地附近坐響度陪我地避雨添。 落左一陣雨,居然連冰雹都落埋,開頭都唔敢相信自己對眼,但再望真d,真係雹黎呀!!!!大概過左20-30分鐘,天氣就好返,太陽從烏雲中走返出黎,我地仲見到雨後彩虹,仲要打孖黎添。一個好難得嘅體驗。 太陽出返黎喇 雙彩虹 之前都有道聽途說咁上網爬文見人地有提過同agent大叔都有提過呢度天氣十分唔穩定,落下雨又會出太陽,點知仲要俾我地睇埋落雹同雙彩虹,好神奇呀~~~一去到藍天白雲好friendly咁歡迎你,之後又突然天黑落雨落雹真係幾恐怖,好似個湖突然發脾氣咁,都幾有個性呀。 停雨之後,我地繼續響湖邊寫意一下。大叔冇耐性,等停雨等到一半就自己閃左先,佢今日游唔成水了。 點擊圖片放大 +2 雨後之伊塞克湖。呢度真係好寧靜,除左浪聲之外,就冇其他聲喇。咁嘅環境,好relax,好舒服,不枉我咁辛苦長途跋涉咁堅持黎一趟,冇令人失望嘅地方。仲有就係玄奘果真係出家人唔講大話,<<大唐西域記>> 書中描述嘅伊塞克湖,景觀而家都仲係差唔多,而重點係,湖水真係咸架!!因為我真係試過~ 玩到差唔多6點,都日落喇,都係時候返homestay了。綜合得返黎嘅資訊,都係話響吉爾吉斯玩盡量唔好夜晚出去活動。為左安全,都係乖乖返歸喇。 點擊圖片放大 回homestay路上 返去hea左陣,就去左沖涼先。因為浴室係響客房外一間屋度,同埋有d半開放feel,只有磨沙玻璃冇curtain, 所以都係趁日光日白沖埋先。個花灑好冇力,沖得有d辛苦。沖完之後仲未食飯,於是再響homestay裡面再周圍影下相。 點擊圖片放大 超級愉快嘅晚飯 到7點,我地就食飯喇。我地仲同荷蘭人同加拿大人一齊同檯食飯添。 是晚晚餐: 傳統吉爾吉斯家庭晚餐,味道唔錯。 食完飯,我地幾個同Alexandra 大叔坐埋一齊吹水,講下大家嘅行程,會去邊度,原來荷蘭人同加拿大人已經係第2次去中亞旅行,佢地就係上次旅行認識左再約返一齊再返去旅行的。佢地今次只係響吉爾吉斯hea遊2星期。 原來荷蘭人去過香港,佢同我講話響香港去過一個地方要坐一個鐘船入去,估下估下,原來係南丫島。 之後唔知講咩,我地響度試圖搵有冇wifi 網絡。Alexandra大叔見狀,爆左一句: “It’s incredible to have wifi here.” 佢一講完我地笑左。 之後繼續傾旅行嘅野,荷蘭人話佢都去過澳門,不過佢話超唔鍾意,我地問佢點解,佢嘅原因居然係: “Because there’re always fat guys smoking on the street.” 哈哈哈哈哈,全場即刻爆笑。笑到眼水都標埋。 傾多陣,我地就各自各hea。原本我地想影星星嘅,但係花園燈光大勁,影唔到。(如果大家都諗住同我地一樣,夜晚想響戶外影下星星嘅話,就要帶定冬天衫以備不時之需喇。雖則我地去嘅時候係9月,但呢度日夜溫差大,夜晚只會得返10零度甚至幾度架) 之後唯有轉入屋內hea,響度飲下食下再寫埋thankyou card俾homestay屋主,響伊塞克湖區,你嘅生活好難會唔正常。7點食晚餐,我地hea左好耐都未10點,完全冇意欲去訓,而且出面黑麻麻,冇wifi, 兼shopping夜蒲地方絕對久奉。絕對係都市人調整生活嘅好地方。 最後到差唔多12點,終於有睡意了可以去訓了。臨天光有隻蚊嘈醒左我,好討厭。之後要望天光。聽日我地會繼續環湖遊,一路向東去到伊塞克湖最東陲城市Karakol,之後再兜落去南岸去一個叫Tamga嘅地方。