“陸.空大長征來了” ~ 響鳥茲別克留左7日,我地要暫別鳥茲,先到哈薩克嘅阿拉木圖(Almaty)再向吉爾吉斯首都比什凱克進發。其實個人係超級期待去吉爾吉斯的。 能去一趟哈薩克,絕對係意外。原本我地係直接由烏茲搭飛機去吉爾吉斯的,點知一直都係waiting list,仲要係我地出發前幾日都係咁嘅狀況,根本搵唔到機位。最後agent大叔幫我地訂左去阿拉木圖嘅機票,再響果邊搵個司機接我地過吉爾吉斯。真係好好彩,哈薩克政府2012年7月起俾特區護照免簽入境14日,咁就造就左我地可以繼續行程喇。(如果冇得去吉爾吉斯,真係會係個好大嘅遺憾啊~) 呢日,一早響酒店食完早餐之後,司機哥哥就送我地去機場。我地每前返到Tashkent都係住同一間黑洞feel酒店,但勝在去機場夠方便,15分鐘內就到。到左機埸,司機哥哥好好人,係都要幫我地搬埋行李入去先走,佢仲拎埋自己D證件同機場閘口嘅警察不停講,之後警察俾佢同我地一齊入去,原來因為國際航班要上二樓,要托行李上樓梯,所以司機哥哥咁堅持要幫我地,真係麻煩晒佢。走之前我地同佢合照,佢仲話叫我地下次要返去遊埋未去過嘅地方。哈,我都好希望有咁嘅一日。 分別之後,我地就入去出境大堂喇。一去到,要填返同入境時一樣嘅報關表,填好之後就去航空公司counter check-in。Counter果位地勤哥哥睇完我地本passport,猛咁問我地有冇哈薩克visa。佢嘅英文好似係有限公司,我地不停同佢講,我地唔使簽證。之後佢再響電腦前玩左幾下,之後就出左boarding pass。拎埋boarding pass我地就去排immigration喇。亞洲人,尤其是年輕嘅,響中亞絕對成日會俾人當係外星人看待。辦出境手續果陣,先過安檢,過hand carry果陣,關員不停同我地吹水,又問我地係咪學生,又問我地去邊,又問我地響邊度黎。好喇,到真正過immigration果陣,冇俾人問咁多野,但係都俾佢地望左我地本passport好耐先放人。我將之前酒店俾嘅registration card夾晒落passport度,關員叔叔收剩2張俾返我.好彩之前一晚同佢地影左全家福,未致於一無所有。 中亞怪異規矩 - Visa Registration 成功申請到visa/可以免簽入中亞? 咁樣唔等於你入到去可以打橫行,仲有一樣好緊要嘅野要做,就係住宿登記。即係所謂嘅visa registration。響烏茲,如果你係入住一般嘅酒店,旅館,佢地係會自動幫你做registration的。佢地會俾返一張紙仔你做證明,呢張東東務必keep好,佢地多數都會同你講 “It’s a very serious document”。In case警察盤查,可以拎出黎,同埋出境時可能會被要求查看所有registration。如果係住民宅,就要自己去當地嘅Office of Visas and Registration做登記,不過手續會煩好多。 另外,哈薩克都有類似嘅制度,唔好諗住特區護照免簽就咩都唔使做,如果留多過5日,就一定要去做登記。如果唔係,出境果陣會被罰款甚至扣留。(有人曾經因為咁樣而miss左自己班機) 而吉爾吉斯呢,好似已經廢左OVIR呢樣野,我地去果陣已經唔需要登記了。去之前,一定要留意了解OVIR最新安排,以免有入冇出。 Registration Card 全家幅~ 過完immigration之後,仲有時間剩,我地連裡面僅有嘅幾間shop都行埋,之後就坐響度等上機喇。上機前,最後一關,check埋boarding pass,再過多一次安檢(過hand carry,仲要除鞋過金屬探測器,之後就可以正式上機喇。 今日搭Air Astana, 香港直航到阿拉木圖嘅航班都係由佢地營運架~ 今程機只有簡餐,係個味道唔錯嘅餡餅~仲有名牌朱古力食添~ 阿拉木圖上空,陰陰天咁...... Just landed~第一眼的阿拉木圖。 呢程幾坐我地隔離嘅,係一個 “敦位十足”嘅大嬸,佢原本係坐窗口位的,但係佢想方便出入,於事用比劃形式示意我地話想換位,我地當然冇問題啦~ 之後派餐,空中姐姐派漏野俾我地,大嬸好好人,佢幫我地叫姐姐俾返我地,佢量我地都唔識同姐姐溝通掛~哈哈 經過個半鐘航程,我地就黎到位於哈薩克東南部,靠近吉爾吉斯邊境嘅第一大城市阿拉木圖(Almaty)。呢度曾經係哈國舊都 (1997年佢地遷都到東北部城市阿斯塔納(Astana)), 現為該國主要商業中心,直轄市。面積324平方公里,人口140多萬。由於阿拉木圖位於蘋果出產區,故亦稱 “蘋果城”。 雞同鴨講初體驗~ 到左arrival hall,排隊攪入境手續,係一個大嬸幫我地,排前面嘅朋友好快攪掂, 之後到我果陣,佢舞左我本passport好耐,仲要離開左counter入左房,我果下即刻怯一怯,心諗,唔係一個過到一個過唔到咁攪笑呀??!!之後好彩隔左幾分鐘出返黎,可能因為我用舊版passport嘅緣故,冇得直接scan嘅關係佢先要入房吧。真係一額汗。 之後大嬸從counter飛左張form出黎俾我填,填好之後我俾返佢,佢指住出面拎行李嘅方向,同我講左一大埋我唔明嘅野(係俄文定哈文呢其實?), 我估佢應該係問前面個女仔係唔係同你一齊黎,想搵返我朋友入黎填表。之後佢俾返本passport我,同我一齊出去認行李果度搵返我朋友,捉返佢填form,過程有點攪笑。 完全唔知做乜,只係靠估,呢個就係到中亞最刺激嘅地方之一。去哈薩克,剛才提過嘅form一定要好好保存直到出境,仲要make sure入境果陣邊防人員有幫你chop好晒印,因為呢張野要響出境果陣交返出黎的。 攪掂晒入境手續之後,我地就出左去arrival hall搵接我地嘅司機。點知去到唔見人,心諗,唔係咁邪化?! 如是者等左15分鐘,我地冇辦法之下打左個電話返烏茲搵agent大叔,佢話阿司機哥哥塞梗車,要過多陣先到,之後唯有繼續等。唯一嘅得著就係我地可以體驗下機場個wifi,速度幾快架,哈哈~ 等多陣,有個人衝入黎,見到我地兩個就走過黎,show左原本要舉嘅牌俾我地睇,我地終於同司機哥哥相認喇。不過,我地同佢唔係好溝通到,因為佢嘅英文係有限公司,所以agent大叔之前已經問定我地有咩要響哈薩克做,等佢可能預先同司機哥哥溝通。我地已經一早講左話要旋風式掃一掃阿拉木圖先走,唔係一場黎到唔望下先走掛~ 上到車,我地拎本LP出黎show俾司機哥哥睇我地嘅target,之後就開車了。不過佢都係唔係好熟路,人地始終都係跨境司機啊,所以佢一路開車,一邊問路。最後兜下兜下終於到左要去嘅地方。 先講下對阿拉木圖嘅觀感。感覺上係比其他2個我地到個嘅國家更具現代感,發展速度齊亦比佢地快。可以話係個 “暴發戶”。咁係因為佢地發現左石油同天然氣,而由頻臨破產變成中亞最有錢國家,發展迅速。呢度路上面嘅名車,亦比其他國家多。 阿拉木圖的馬路~ 市內樓房~ 馬路邊嘅士多~ 旋風式到訪哈薩克之唯一行程- Zenkov Cathedral 因為仲要趕過境嘅關係,我地只能選擇到一個景點。就係被我地睇LP圖片被佢吸引嘅 Zenkov Cathedral。 Zenkov Cathedral(澤尼科夫大教堂), 位於Panfilov Park內,於1904年由澤尼科夫設計,係阿拉木圖市內現存唔多嘅俄國時期建築。響1911年阿拉木圖發生左一次大地震,該次地震城中大部份建築物都被震毀。唯獨呢座全由木打造,現今全世界第二高嘅木建築物能倖存,屹立至今。 蘇聯時期,教堂被當作博物館與音樂廳,1995年被重新恢復成教堂。教堂外部用上鮮艷黃色做主色,加上金色穹頂,非常吸引。不過我地去果日天氣麻麻,天陰陰,如果配埋藍天白雲個圖畫會靚好多。 教堂正門~ 側門 1~ 側門 2~ 教堂門外有好多白鴿~ 妹妹同鴿鴿「對峙」梗呢~ 哈吉陸路過境記- 向吉爾吉斯進發~ 遊完教堂之後,我地就開始開車去邊境過境吉爾吉斯。呢段路個人覺得係全個旅程最有挑戰性嘅一段。正式開始前,司機哥哥先去加油站入滿油先。 Bishkek, we are coming~~~ 長征路線圖 其實路線好簡單,就係上圖mark左紫色嘅A2公路,去到Korday呢個口岸,再過境吉爾吉斯。全程242公里,車程約4個鐘 (未計過關時間)。我地由下晝差唔多成5點先開始起程,保守估計都要成夜晚8-9點先到達吉爾吉斯首都比什凱克(Bishkek)喇。 日落公路上~ 雖然路線睇落只係一條直線,但呢條路係一條單線雙程行車嘅路,行嘅車亦多。大貨車以至我地坐嘅私家車都有。而公路上嘅照明系統係幾乎冇,周圍都黑漆漆一片,伸手不見五指。今轉車真係冇訓過覺,司機哥哥不時抽頭過線爬頭真係令我冇心機訓。 呢段黑麻麻嘅路,我一世都會記住!! 最刺激嘅一段路,出路遇貴人~謝謝你,你,你,還有你的幫忙!!!! 過左唔知幾耐之後,我地終於都左Korday。呢個小鎮位於哈薩克Zhambyl省內。吉國嘅對口口岸叫Akjol。呢2個口岸係哈吉兩國最重要同繁忙嘅口岸。我地架車到左之後,發現前面全部都係車龍,而且係郁都唔郁。司機哥哥落車打探完一輪,返黎用比劃示意我地響度起碼要等2個鐘,先過到境,話再行遠少少,去另一個check point過。之後就開車,轉左入小路,嘩,呢段路全部都係泥路,唔係好路,好黑,完全唔知去梗邊嘅感覺。呢段路,就係上面地圖紅色果一小段喇。 過左唔知幾耐,就到左check point。嘩,呢邊果然真係冇咩人。首先響哈薩克果邊攪出境手續先,呢度2個邊防大叔一見到我地兩個就好似見到外星人咁,如臨大敵。佢地一收左我地嘅passport,就響度不停研究,之後又同我地講一大堆我地唔明嘅野,好彩後面有個auntie識英文,佢話我地知,佢問我地要去邊度。我地就答返大叔要去Bishkek。又睇埋我地有冇對面吉爾吉斯嘅visa,好喇,俾埋佢,之後又再響度研究一輪,再過多陣,終於捨得收左張入境申報表同響我地本passport度chop個出境印喇。之後我用手勢多謝大叔,佢居然響度扮我囉……都唔知好嬲定好笑。之後我地就出返去搵司機哥哥。排響我地後面個auntie好好,佢問我地有冇車車我地走呢。多謝完佢之後我地就上返車準備過吉爾吉斯果邊攪入境手續。 唔使3分鐘,車已經到左吉方口岸。我地響度研究梗響邊度交passport,有個一早企左響度都係等過關嘅男人指我地去一個窗口度交passport。 我地兩個響度用廣東話傾計,頭先指我地埋去交passport果位仁兄走埋黎用普通話問我地係咪中國人。哦,原來係自己人~佢話佢係被公司派去長駐嘅,咁岩要過吉爾吉斯做野,佢有帶住司機兼翻譯響身邊。 我地俾左個passport邊防人員check先,吉爾吉斯果幾個大叔同哈薩克嘅一樣,見到我地好似見外星人咁,接我地野果位大叔,呆左2-3秒之後,向後面大叫左一聲: “Chef”~, 估計佢係響後面個阿頭求救。之後就見佢地幾個好努力響度埋首研究我地兩本passport。 見佢地個勢都冇咁快,我地2個就企埋一邊同普通話人吹水,佢話一聽我地講野,就知我地係廣東人,之後佢問我地邊度黎,我地話香港。佢話響呢邊真係好少遇到香港人,佢問我地過關有冇俾人索過賄,我地話冇,佢話絕對係奇蹟。之後佢知道我地一句俄文都唔識都走過去玩,佢呆左,不停話我地好大膽,哈哈哈~~~ 我地3個響度吹水之際,另一邊箱我地兩邊嘅司機哥哥都自己響度吹水。呢個moment,普通話人嘅翻譯兼司機同我地講,其實我地嘅司機哥哥唔exactly知我地入到Bishkek之後要去邊。好彩我地有印到行程出黎,上面有酒店地址,俾佢睇完之後,佢表示大概知道喇。 吹多陣水,班邊防大叔研究完有少少反應俾我地,佢大叫左一段唔知乜野, 普通話人嘅翻譯問我地過去吉爾吉斯做咩,我地話去旅行,佢就幫我地答返大叔佢地。之後佢地又繼續玩,我地又繼續吹水,普通話人問我地會去邊度玩,我地話要去伊塞克湖,佢好羨慕,雙眼發晒光。 再等多陣,大叔俾返passport我地,終於攪掂晒入境手續,真係好多謝呢段路上幫過我地嘅人,今次真係知咩叫出路遇貴人喇。如果冇佢地幫手,真係唔知要估幾耐先知佢地想問咩。 我地同普通話人告別之後,就拖返行李上車,點知大叔要我開行李俾佢睇,佢條友都唔係睇嘅,搵笨。放好晒行李上車之後,我地就同佢個邊防大叔bye bye,要我開行李果個竟然扮返我地囉~乜我地真係咁似外星生物咩?! 返黎search返資料,原來我地過境嘅口岸係新開的,2012年2月先啟用。哈方一邊叫 “Karasu”, 吉方一邊叫 “Ak-Tilek”。唔怪得過關嘅人只有小貓三兩隻啦。 呢2個印,得來不易呢~~~ 中亞黑洞之一: 會被邊防人員索賄/刁難嗎? 之前一路都好擔心呢段路上會有咩不可預計嘅事發生。例如係響邊境站可能有人向我地索賄,不過好好彩最後冇事發生。我地整個旅程都好幸運,一蚊賄款都冇跌過,都算係奇蹟。尤其是烏茲別克同吉爾吉斯兩個國家,係世上20幾個贪腐程度比較高嘅國家之一。(2008年,兩國嘅貪污感指數同係1.8, 0=最腐化,10=最廉潔。)響呢d國家嘅高危熱點可以全身而退,真係不禁要講一句,勁呀~哈哈。 之前爬文做準備嘅時候都見有人話試過被邊防人員刁難,但可能我地兩個實在裝可愛裝得太出神入化,好lucky地冇被刁難。但其實都係要多謝大叔大嬸們高抬貴手啫。 過完關,司機哥哥就直驅Bishkek, 去到酒店之後,司機哥哥用佢有限嘅英文問我地要唔要出去 “Dance?” ,唉,d咁嘅野唔好喇,之後reception姐姐幫我地手翻譯,約好左聽日幾點出發去伊塞克湖,之後就食埋d乾糧休息喇。聽日,就向期待已久嘅伊塞克湖出發~~~ 酒店一角~