今日一早,就由撒馬爾罕返去Tashkent。車程大概要4個鐘。正式出發之前,我地又去到兀魯伯天文台附近。司機哥哥話要停車去買幾個饢先,話屋企人好鍾意食果檔出品嘅饢喎。 司機哥哥買饢中 不過話時話,司機哥哥買嘅饢真係幾香,佢放左上車之後,真係成程車都飄香呀~ 舌尖上的中亞~ 到中亞旅行,有幾樣野食係不可不試的,以下係其中一種。 饢, 係一種起源於波斯的發酵麵餅,是中亞主食之一。 饢的製作方法係將麵粉糰好發酵後放響特製的饢坑中烤製而成。具體形狀因地域同民族習慣而不同,有擀制的麵餅,有盤起成半球狀的麵糰,亦有直接拿手拉拽成長面片的。由於可以存放很長時間唔變壞,可以作為便攜乾糧。 我地響Khiva嘅古城裡面亦都有睇過當地人點整饢 Step 1: 將糰好嘅麵粉搓成餅狀, 響中間扭拓上花紋,並撒上芝麻或者其他配料。和麵果陣要加入烹調用油、雞蛋和牛奶,令烤出黎嘅饢噴香酥脆可口。 Step 2: 放入饢坑烤熟佢。饢坑係用鹽土製成,分為地上和地下兩類。地下囊坑如同淺井,地上囊坑的整體如同一隻倒扣在地上嘅碗,底大口小。 製成品。好燙手,熱到真係差d想飛佢落地。 除左饢,之前有出現過嘅手抓飯(Plov),拉麵,(Lagman)同蒸餃(Manty),仲有一種焗肉餡餅(Samsa),仲有酸奶(尤其是吉爾吉斯居民home made的),都一定要試!!!! 買好饢之後,就開始踏上回Tashkent之路。 回Tashkent之路上 隨處可見嘅紫色植物 回到Tashkent外圍 都介紹一下塔什干…… 塔什干(Tashkent), 海拔478米 烏茲別克首都兼塔什干州首府。”Tashkent”係突厥語, 意指「石頭城」, 全市面積250平方公里,人口200幾萬。中國古代稱「石國」,唐代稱「赭時國」。<<大唐西域記>>係咁描述的:「赭時國。周千餘里。西臨葉河。東西狹南北長。土宜氣序同笯赤建國 (今哈薩克南部之Shymkent希姆肯特)。城邑數十各別君長。既無總主役屬突厥。從此東南千餘里至怖(敷發反)捍國。」 塔什干也是中亞經貿、交通的主要轉運中心,也是烏茲別克最大的棉花集散地,已有2500 多年文歷史嘅城市,有神學院,清真寺,陵墓等古蹟。但響1966年一場大地震後,舊有嘅塔什干市幾乎全毀,全市經過有計畫嘅大規模的重建。 4個鐘車之後,終於返到黎起點, 意味住我地成功遊左鳥茲別克一圈了。先去到酒店settle好,之後就開始今日嘅city tour。今日帶我地參觀的,係一位大叔。 1. 舊城區民居 我地響舊城區附近meet好大叔之後,就殺入去體驗下當地人嘅地道生活。 點擊圖片放大 +3 2. 路過Rabu Bakr Kaffal Shoshi 陵 建於16世紀, 規模不大,墓主係一位班尼斯嘅伊斯蘭學者。 3. Barakh Khan Madressah 亦係建於16世紀,烏茲別克穆斯林委員會(Muslim Board of Uzbekistan)之所在地。呢度有佢地嘅Mufti(大穆夫提:伊斯蘭教之說明官),相當於基督教嘅大主教。 4. Kukeldesh Mosque, Khast Imom, Tilla Shaykhk Mosque Kukeldesh Mosque: 建於15世紀, 曾是處決不忠實妻子嘅地方。蘇聯時期變左做金屬片工作坊,經學院變左做倉庫。 Khast Imom: 呢度有剛修復嘅Moyie Mubarek,裡面收藏左傳說係 世上最古老,7世紀就出現嘅<<奧斯曼古蘭經>> (Osman Quran)。巨大嘅鹿皮書卷曾經俾帖木兒帶左去撒馬爾罕,1868年又俾俄國人帶左去莫斯科。1924年,列寧為左向土耳其嘅穆斯林示好,就將書卷還返俾塔什干。入去睇呢本大經書卷,要先過”安檢”,之後仲要除鞋先入得去,內裡嚴禁攝影。 Talyashayakh Mosque: 位於Moyie Mubarek旁邊一間樸素嘅清真寺。 點擊圖片放大 +2 5. Chorsu Bazaar (圓頂市集) Tashkent市內最著名貿易市場,頂端有一個巨大嘅綠色圓頂,去到第一件事係先醫肚,果陣已經差唔多兩點喇。 點擊圖片放大 同場加映:巴札開片記 食食下野,我地附近有個賣野食嘅大嬸無啦啦好激動咁衝埋去個食梗野嘅大叔度,仲爆埋樽添。好彩我地坐前一格,如果唔係就中玻璃碎喇。City guide大叔好攪笑,叫我地鎮定,仲出口勸交。最後個大嬸身邊嘅人都衝過去拉住佢,佢先埋唔到去郁手打人,如果唔係,真係見血都有之。 醫好肚之後,去左Chorsu Bazaar轉個圈。呢度賣嘅野嘛,同其他巴札大同小異,不過就多左紀念品。不過呢度嘅紀念品比起其他城市嘅偏貴。 點擊圖片放大 6.Crying Mother Monument 係1999年為紀念二次大戰中犧牲嘅40萬名烏國士兵而修建的。前面有一團不熄之火,紀念碑附近嘅走廊有刻有所有出征戰士的大名。 點擊圖片放大 其實呢位大叔有點hea,成日都話要5點要趕去清真寺做禮拜,好彩我地之後仲會有幾會返黎一日,可以有時間再去遊多次。見佢咁心繫真主,唉,成全佢啦。之後我地就俾司機哥哥車我地返酒店先。當然,司機哥哥”離家出走”左咁多日湊住我地,都唔好意思阻人地”天倫之樂”了,雖則佢成日同我地講”When you need me, just call me.”, 但我地真係唔好意思打攪佢喇。所以決定自己出去玩~ 塔什干自由行-闖入中亞最早興建嘅城市軌道交通系統 呢個,先係今日嘅重頭節目,今日主要任務係去體驗下鳥茲別克嘅地下鐵係咪如傳說中咁講每個地鐵站都有主題,設計美輪美奐。 出左酒店之後, 去地鐵站嘅路上,我地邊行邊遊,最大驚喜係遇到一間幾靚嘅東正教教堂,返黎search返資料,呢座係位於Mirobod市場附近的係Tashkent市內四座東正教教堂之一嘅聖母升天大教堂(Assumption Cathedral Uspensky Sobor), 教堂主色係粉藍色,配銅穹頂。 行下行下,我地就到左塔什干其中一個火車站(Vokzal)。 地鐵站就響火車站對面馬路,再行多兩步,就到左地鐵入口。我地去嘅站,叫”Toshkent”。 介紹下塔什干地鐵(Toshkent Metropoliteni), 於1977年通車。中亞最早出現的城市軌道交通系統。全長36.2公里,目前有29個車站,一共3條線,仍有新線/新站在籌備建造中。 Tashkent 地鐵路線圖 現時中亞只有兩個國家有地鐵,另一個就係哈薩克,響佢地最大城市兼前國都阿拉木圖市內,於2011年12月1日通車,用左23年時間建造(以香港標準好耐啊~如果響香港,肯定俾人嘈爆做咩要咁耐~) 地鐵全線都係嚴禁拍照的,話說係因為打仗時可以用黎做防空洞,要保密咁話。所以所有野只能留響腦海裡面了。 落到去地鐵站,去到賣飛嘅counter,買個token就可以入閘,車費唔貴,一人700 som, 出發前睇過資料,塔什干地鐵係烏國全國保安最嚴密嘅地方之一,警力比其他地方多。未入到站,響出入口已經有一個,入到去買完飛之後,再行入d就可以入閘,入閘前都有幾個警察響度,入去前可能會被抽查做安檢,要開袋俾佢地check。我地今日都有呢個情況,不過都係望一望走得,冇好似之前前人咁,有被要求睇passport想抽水嘅情況出現。 遊中亞要注意:慎防警察同其他執法人員 其實唔止鳥茲,到其他中亞國家旅遊,都需要小心當地警察同其他執法人員。佢地想抽水,其實某程度上都係因為生活逼人。以烏茲為例,當地警察收入一個月只大約有100蚊美金。為左賺外快,就唯有對遊客落手了。不過烏茲呢個情況,經過總統卡里莫夫落order要求警察唔可以再向旅客索賄之後,情況大大改善。其實佢地最主要都係求小財,最差情況都係放低幾兩就走得。(我一位長駐中亞朋友嘅親身經驗。) 不過,響中亞大部份警察嘅英文都好爛的,只係識”passport”同”tourist”兩個字。(真係唔係吹水,係我地嘅親身體驗) 當遇到俾人問你拎passport黎睇嘅時候,免驚,只要保持禮貌,淡定,女生可以裝可愛,裝甜美,保持笑容扮傻就得。(我地試過,係work架~~~) 記住,響任何情況之下都唔好拎本passport出黎俾警察睇,最多只係copy就好。免得要花錢花心機去贖回passport。仲有一招可以用的,就係不停對住佢地講英文(又或者任何文警察係聽唔明嘅),佢地咁樣就會開始放棄架喇。我地之後都係咁樣擺脫左一個警察嘅寸寸進逼。 過左安檢之後,就可以正式入去搭地鐵了。一去到月台,感覺裡面燈光好暗,其實設計真係幾靚架,同俄羅斯一樣,烏茲各個地鐵站都有主題。我地都係好隨意咁坐車,睇下每個站係咪都係設計獨特,仲特登去左d轉線站睇下。不過最後嘅結論係,個個站都有d似,而且因為太暗,行黎行去轉線時穿過d隧道有d恐怖(唔通呢d就係傳說嘅防空設施?!)。養眼指數比起俄羅斯嘅差得遠。 遊完一輪之後,我地就返返去Toshkent站,返去酒店附近搵食。首先去左一間超市度買d乾糧,預備聽日”大長征”果陣食的。 我地今晚去左間越南餐廳食飯,味道ok,不過要成20% service charge,但其實,服務真係好一般。 聽日,就要進行大長征,先旋風式到訪哈薩克再陸路過吉爾吉斯。好期待~~~期待己久嘅吉爾吉斯之旅就快要開始喇~~~