今日一早食完早餐, 爭取時間響古城內作最後衝刺,再去想影相嘅古蹟再影一次相。 清晨的布哈拉 點擊圖片放大 +2 把握完最後機會之後,準時9:00am就返去酒店門口join司機哥哥,準備坐6個鐘車去撒馬爾罕,途中會停留Shakhrisabz (沙赫里薩布茲) 作半日遊。 到Shakhrisabz 之路上 點擊圖片放大 長到冇盡頭嘅路 路上遇到的牛牛 臨近中午,其實真係好有乾煎feel 途中不斷遇到去收棉花嘅車隊。當地人對棉花有幾又愛又恨?連佢地嘅傳統國具都要有佢嘅花響上面呢?從司機哥哥口中得知,每年9月份係當地棉花收成季節,學生同老師都會被動員去義務幫手收棉花,車隊經過嘅地方都會有警車響最前面開路,任何車都要俾佢地過先。唔講唔知,烏茲別克係全世界第二大棉花出口國,非常巴閉,種棉花除左為烏茲別克帶來收入之外,亦令呢個國家付出左唔少代價。前蘇聯政府指令烏茲別克要多種棉花,於是將兩大河嘅河水引到棉花田灌溉(棉花係一種需要大量水灌溉嘅植物), 最致命的,係當時果位偉大嘅領導史太林指示要抽咸海嘅水黎灌溉,令咸海面積越縮越細,令咸海沿岸一帶嘅捕魚業式微,變出左個”船墳墓”, 就係因為河流缺水,湖泊乾涸,令烏茲別克嘅天氣越黎越熱。 除左生態災難,棉花種植亦衍生出另一個問題- 強迫性勞工及童工。當地人會用童工幫手收棉花,以往仲係大規模咁動員童工,由於受到人權組織壓力,而家強迫性勞工嘅目標由幼童轉為成年人,而且每到採收季節,財務勒索情形亦有所增加。就係因為使用童工,一d公司好似H&M, 馬沙,Tesco等都抵制來自烏茲別克嘅棉花。 大概下晝2點,我地就到達Shakhrisabz- 沙赫里薩布茲。 到埗第一件事,當然就係醫肚, 食飯之際,我地都響餐廳meet埋我地響呢度半日遊嘅美女city guide, 佢仲係學生,做導遊係part-time job, 響Tashkent讀大學中,媽媽亦係從事旅遊業,受媽媽影響,佢都希望第日從事同一行業。 都介紹下Shakhrisabz 呢個地方。位於撒馬爾罕以南80公里, 帖木爾帝國締造者帖木兒出生之地。始建於2,700年前左右,海拔高度622米,1991年人口約53,000。曾是中世紀西域古國史國(Kess)在國力強大之後的國都。 1380年,帖木爾將沙赫里薩布茲作為他夏日的居住地,並設為帖木爾帝國的陪都,建設新的宮殿。1500年至1920年,沙赫里薩布茲屬於布哈拉汗國。”Shakhrisabz” 響塔吉克語裡面解作 “綠色城池”,而家呢度大部份景點都係帖木兒或者佢個孫兀魯伯下令修建嘅。帖木兒呢位當時叱吒中亞嘅歷史人物,響介紹撒馬爾罕果陣會作詳細少少嘅介紹。 呢個地方, 玄奘響<<大唐西域記>> 都有記載,書中係咁描述的:「羯霜那國。周千四五百里。土宜風俗同颯秣建國(即撒馬爾罕)。從此西南行二百餘里入山。山路崎嶇谿徑危險。既絕人里又少水草……」 其實今次到中亞旅行,好多會去嘅地方都係當年玄奘取西經嘅時候去過的。去呢區計劃行程時拜讀下<<大唐西域記>>,對了解各國當地一d地方嘅風俗亦有幫助。千幾年前玄奘不怕艱辛走過同一國度去印度,千幾年後有幸走上玄奘走過嘅一小段路,感覺好特別。今日我地響路上見到嘅,同前人當年所見嘅會有好大差別嗎? 真係好想知到答案。 半日遊行程 第一個景點,係去參觀”Ak-Saray Palace” (Timur’s Summer Palace)。 呢度係帖木兒嘅夏宮,亦叫”白宮”。”白”響當地語有「最高權力」之意。坐落市中心北面。呢座宮殿用左24年時間修建,當年佢打羸左花刺子模之後,仲響當地引入最好嘅工匠幫手起添。 永遠消失的穹頂: 其實夏宮嘅建築物大部份都已經倒塌,原本有嘅圓穹頂已經冇左,而家只剩返兩座38米高嘅門廊,仲略帶有鑲嵌圖案。要由地面上門門廊頂,要行116級樓梯,仲要幾斜下架,真係可想而知當時呢座野幾咁壯觀同有規模。 上門廊頂途中向窗外一拍 D樓梯係咁款架 門廊頂上一覽Shakhrisabz 帖木兒與他的"夏宮"。又係唔明,果度咁鬼死熱,做咩要整個夏宮響度??!! 2. Kok-Gulmbaz Mosque 之後,我地再轉到Kok-Gulmbaz Mosque參觀。呢座係一座大型星期五清真寺,係帖木兒個孫兀魯伯為紀念爸爸Shah Rukh而建的。清真寺一直處於修復之中,我地只係去左後面帖木兒祖先嘅墳墓睇下。墓主係帖木兒同佢爸爸的精神導師,建於1374年,另外仲有一座1438年兀魯伯為自己子孫修建嘅陵墓,有冇人葬左響裡面就不得而知了。 3. Khazrat-imam Complex 最後一站,我地轉到Khazrat-imam Complex, 由帖木兒響1392年建成,遺址主要殘存建築係十分破舊嘅” Tomb of Jehangir”, 墓主係帖木兒最喜愛的長子。長子英年早逝,22歲就去世,葬響度嘅,仲有帖木兒另一個仔,Umar Sheikh. 最後兩個景點都冇影相,只係記得一入到去好暗同潮濕(有d似響埃及金字塔裡面咁,好大陣霉味),感覺有d唔好,所以只係快快遊完了事。 參觀完晒之後,同美女city guide姐姐影完合照就上車繼續去撒馬爾罕,響呢度繼續行90公里,經過海拔1788米嘅Takhtakaracha Pass車路落山,景色唔錯架。 點擊圖片放大 到最高點,落埋山就到喇~ 差唔多2個鐘之後,我地就到左撒馬爾罕, 去到已經差唔多5點,司機哥哥帶我地去酒店check in之後我地就響附近行下,再去搵食。 全程至like嘅酒店,設施ok,舒服,好強力嘅花灑,沖涼一流~ 我響呢度訓果幾覺係全程最好質素的。 酒店附近的東正教堂。 <span style="color: rgb(51, 51, 51); font-family:;" new="" roman";"="" "times="" roman";="" ar-sa;="" zh-tw;="" en-us;="" 0pt;="" minor-fareast;="" 12pt;="" 新細明體","serif";=""> 響食晚飯嘅餐廳巧遇一對可愛小兄妹, 佢地屋企人今日響度擺壽宴呢~ 食飯時,我地拎住本Lonely Planet督俄文字典點棻,食唔到手抓飯有d失望。(後來從司機哥哥口中得知,手抓飯原本只係下晝先有得食,賣曬就冇架喇~) 前方呢個類似雪菜嘅野做嘅湯係餐廳auntie介紹的,好好味架原來,叫”Shi”。 埋單唔使10,000 som, 同我地之前食嘅差唔多,可想而知我地響遊客區俾人敲得幾勁。 食完飯之後,附近嘅店舖都收晒,我地唯有返去酒店休息,準備聽日暢遊撒馬爾罕古城了。