行程黎到最後一日,今日我地懷住最後衝刺嘅心態響Tashkent市內遊埋果D未遊完/想去多次補影相嘅景點。 食完早餐之後,我地先去check out同keep行李,之後就出發喇。出左酒店之後,我地行去 “Ming Orig” 站先搭地鐵去 “Amir Timur Hiyoboni”站去市中心嘅獨立廣場參觀。 去地鐵站路上,我地發現左呢間3D影院。又再一次證明,中亞國家絕唔係想像般咁落後架。 行到去地鐵站,照老規矩買token入閘過安檢入去上車。 1.「塔什干市中心之中心」-Amir Timur Maydoni 車到左市中心“Amir Timur Hiyoboni”站,我地就去被喻為「塔什干市中心之中心」嘅 Amir Timur Maydoni (公共廣場)睇下。 呢個廣場亦名為「帖木兒廣場」。原本呢度矗立左一個馬克思半身雕像,但之後被現有嘅帖木兒銅像取代。 之前睇書,有人話見到有雀雀響帖木兒頭上 “便便”,但今日我地見唔到呢個奇景。背後有間酒店,酒店方面自稱佢地係「全市最佳酒店」,佢嘅特別外觀令佢被外國媒體選為「世上最醜陋酒店」。 據說,烏茲別克嘅帖木兒銅像最主要的有3個。分別係上圖位於Amir Timur Maydoni 中嘅呢個,仲有兩個分別坐落於撒馬爾罕同帖木兒出生地沙赫里薩布茲。3個我地都有見過,就係差撒馬爾罕果個我地冇影相。希望下次有機會返去補飛。 2. 再遊未遊完嘅獨立廣場 – Mustaqilik Maydoni 去吉爾吉斯前果日嘅半日遊,我地只係快遊呢個地方,冇咩影過相。今日專程返黎補影的。 呢個廣場,佢嘅主要function係,響獨立日或者總統卡里莫夫覺得有需要激發愛國情緒果陣,就會聚集人民響度睇閱兵。 上面呢隻象徵幸運嘅「鵜鶘」,其實都唔係好知係咩,總之雀仔一隻係啦~ 新落成嘅參議院,總統辦公室同政府辦公室 位於獨立廣場西邊,呢個壯觀嘅噴水池同水池有住為城市降溫作用。唔少市民都鍾意去坐下。 水池近鏡 終於,碰上了企圖索賄嘅警察 遊完獨立廣場,我地就落返去地鐵站準備搭車再去Chorsu Bazzar。落到去照舊買token去過安檢。過果陣終於遇到傳說中嘅查證,有個警察同我地講 “Tourist?”, 之後下句就係 “Passport?”, 佢咁樣,我地梗係知佢做咩,我地同佢講 “Keep at hotel.”, 佢唔明我地講咩,又再重複佢果幾個有限英文生字,我地亦keep住repeat果句野,仲加快速度後者加多兩句英文,佢見咁樣溝通唔到,就放棄放我地走喇。哈哈,我地贏左佢喇,雖然我個樣好低b咁,但我絕對唔會俾你敲倒我錢嘅。 之後我地就入閘,坐車向Chorsu 站出發了。 3. Chorsu Bazzar Again~ 再黎呢度,都係因為想再行下巴札,感受一下民族風情。順道周圍睇下,仲有冇要買嘅紀念品。但我地始終覺得呢隻嘅野偏貴,最後都係咩都冇買。 我地好想搵返上次hea爆大叔帶我地遊果個現代化商場,但可惜兜黎兜去都搵唔到,之後我地就轉移左去行超級市場,裡面好大,好多野賣架。 行完之後,我地就去超市隔離嘅餐廳食飯。 是日午餐: 看圖唔識字點餐again~ 食完之後,我地響巴札附近嘅檔攤行多陣就返返酒店準備執行李去機場了。 4. 響酒店附近小店作真正最後衝刺 返到酒店附近,見仲有幾多時間,我地就沿路慢慢睇下有咩好睇同買。行行下,我地去左一間大型百貨公司,去左佢地嘅food court度飲左杯汽水,再hea多陣,之後就去左下面嘅超市,掃左d乾果,茶包咁做手信,之後再一路慢慢行返去,去左一間賣韓國野嘅舖頭(果間野係韓裔嘅烏茲別克人開架), 響果度買左D野食,咁就岩岩好用晒身上嘅som了。呢個先係去旅行嘅最高境界啊~~~ 返到去酒店附近,我地都影下周圍嘅民居,呢個小區幾靚架,佢地環境應該都唔錯。 點擊圖片放大 領取失物兼 “紀念品” 影完相之後,我地就返左去執行李,今次旅程我做左2次大頭蝦。分別將響飛機用嘅頸枕同MP3漏低過。但好好彩,兩樣野最後都拎得返。 個頸枕就係漏左響呢間黑洞酒店(過哈薩克前漏低左), 今日食早餐果陣去reception問過,果位大叔話要等house keeper返黎問下佢,叫我下晝5點倒再去問過。我見差唔多時間,就返去搵大叔,佢一見到我就即刻拎個頸枕出黎俾我,仲送多左個 “紀念品”俾我,就係當地好流行嘅一個藍底白字膠袋。 認領完失物之後, reception 大叔話我地嘅agent大叔打過電話黎搵我地,之後叫我等陣,佢打俾大叔俾我講。原來agent大叔想話我地知,dislike司機大叔會響5:30黎接我地去機場。仲問我地個trip好唔好玩,安排上有冇問題。其實佢地嘅安排真係算做得唔錯,我都話佢知我地玩得好開心,多謝佢嘅安排。過左冇耐dislike司機大叔就黎喇。 Photo 13 – 酒店送俾我嘅 “紀念品”~ 5. 再見了,鳥茲別克,西域~ Dislike司機大叔準時黎接我地,之後就開車去機場了。 最後幾眼嘅烏茲別克街景 路上有少少塞車,唔知咩原因要改路, dislike司機大叔有D燥,於是就用9秒9轉去第二條街行,兜遠少少就到喇。(我覺得佢似趕收工多D) 同佢道別之後,就自己推行李入去,入到去之後,我地居然見返Day 1入境時幫我地過海關果個靚仔,佢果陣應該係放工喇。臨走都見返下佢,呢個旅程都算好頭好尾呀。嘿嘿`~~出境大堂,先去check-in寄行李先。 寄完行李之後,再填一次報關表,響烏茲填報關表,身上有嘅所有貨幣金額都要如實填報,而且金額唔可以多過入境果陣,否則麻煩自找。 再去過immigration同海關,過海關果陣又係被人答訕吹水,今次個海關大叔好攪笑,第一件事唔係望我個樣,係望我隻手。因為果邊太乾,皮膚敏感,佢問我隻手攪咩,哈哈。之後又問我係唔係學生,結婚未呢D指定問題。 過完海關就過immigration,毫無難度就入到禁區,今次真係要返屋企喇,實在係非常唔捨得,12日就咁就完左。我真係未玩夠呀~~~ 入到禁區上機前,仲要check多一次boarding pass 同過多次安檢的。響呢個過程中,我地遇到烏茲別克類似足球隊嘅國家隊要出去比賽,仲同我地一班機呢。佢地人太多,所以我地都用多左時間等接受檢查。眼見check野嘅staff見到佢地班人笑晒口咁幫佢地check野,唔通我地真係同一班當地球星作梗近距離接觸??!! 過晒安檢之後,我地就響候機室等上機,我地要坐shuttle bus出去上機,上到車已經冇位坐,咁我地就企喇。之後果班類似足球隊球員嘅隊員開始讓位俾D女仕。先係婆婆,仲扶佢地埋去坐。之後見到其他女遊客,佢地都有讓位,我地2個都有份呀,開頭都唔好意思坐,後生細女坐咩鬼,但見佢地好堅持要我地坐,咁我地就唯有坐啦。 出發之前我地搵資料果陣都有見過話當地人係會讓位俾女仕的。先係老人家,之後係小童,最後就係年輕嘅女性。估唔到我地響最後一刻拎到呢個優惠呀下~ 既然係咁,我都祝佢地往後嘅比賽順順利利。 落左shuttle後,就上飛機,,正式要離開中亞呢個神秘國度了。呢12日旅程,每日遇到嘅人同事都係好好嘅體驗。尤其是旅程上所有幫過我地嘅好人,湊住我地遊左一圈烏茲嘅司機哥哥,收相機錢收順D嘅auntie,所有city guide,冇對我地索賄嘅邊防人員,機場內好有趣嘅職員們,借電話俾我嘅保安叔叔,響邊境幫過我地做翻譯嘅朋友,響餐廳推介我地食好野嘅大嬸……有佢地,令我地旅程非常順利,當然仲有志同道合嘅團友,令旅途中充滿歡樂。以上所有嘅人,都令我響略帶驚險中完成左我嘅夢想。 響有生之年,我希望有機會可以再去踏足呢片土地。亦希望呢度有嘅風土人情,尤其係而家少有嘅人情味唔會隨住遊客增多而有改變。 再見了,西域, 我會再回來看你的!!!!!! 「這中亞數日裡,可供一生懷愐,歸家路裡可以仍在笑~」