今日係我地最後一日留響吉爾吉斯了。早上起程回比什凱克,下晝就搭飛機返烏茲別克了。 一早起身,我地食早餐之前走左去guest house嘅紀念品店混吉。玩完一輪,我地再去花園周圍影相。 早安,天山~ 是日早餐- 芝士+火腿+米糊。米糊超級香,好好食~~~~ 意想不到的Bonus 行程- Skazka Canyon @ Tosor Village 食完早餐之後,我地就離開guest house,開始返Bishkek 了。就快要同呢個人間仙境講再見,真係要盡最後努力不停昒同再望多兩眼先得。 離開Tamga之後,Alexandra大叔為我地帶來bonus行程,帶我地到附近嘅Kadji-sai附近Tosor Village 附近嘅 Skazka Canyon (又名Fairy Tale)嘅地質公園睇怪石。其實Alexandra大叔都好鍾意影相,佢知我地咩都影得一餐,所以每到一個景點,都有拎自己嘅架生出黎同我地一齊影,去到呢個Fairy Tale 地質公園,大家齊齊狂影相,不知幾開心。 都介紹一下,Kadji-sai呢個地方。人口只有4300人,係比什凱克同Karakol之間一個便利中轉站,周圍被低矮,風水侵蝕嘅山谷環繞。 1947年,蘇聯響度發現左鈾礦,自此呢度變成左 “秘密地區”。當時呢度只被簡單稱為 “伏龍芝10” , 但因為鈾質量太差,三年之後鈾礦就關門大吉。 今日我地到訪嘅Skazka Canyon,係一個經大自然風水侵蝕而成嘅峽谷,有d似動物,有d似皇官,有d似長城的,形態好特別,可見大自然鬼斧神工有幾厲害。響呢度,仲可以從高角度遠眺伊塞克湖,一樣係美景~雖然要行少少路上山,但絕對值得。 上山沿途所見……. 點擊圖片放大 大自然的鬼斧神工,好神奇!! 有D似我地長城嘅一堆紅土~ 今日天公造美,雲層冇前2日咁厚,可以影得清雪山了。其實今次黎嘅其中一個target就係要同天山同伊塞克湖影 “合照” ,但前2日雲太多,影唔清,今日總算做到了,雖則距離遠左d。 點擊圖片放大 高角度看伊塞克湖, 一樣美!! 響南岸呢邊望返過北岸的Kungry Alatau Range~ 秋天嘅伊塞克湖湖畔,會有好多好colorful 嘅植物,紫紫黃黃,幾靚架~ 影完一輪,又係時候繼續返去了~ On the way to Bishkek…… 路上依湖而建嘅 “蒙古包型”酒店。不過我都係鍾意傳統要搭出黎果隻多d~ 公路旁的天山。 圖中左邊舊大石上面有好多坑紋,一劃劃的,Alexandra 大叔話係伊塞克湖 “Ancient level” 嘅痕跡。咁樣就證明左,湖水水位響度一直下降中。 一直在 “消失中”嘅伊塞克湖? 有人話,幾百年黎,湖面周期性起伏淹沒左一D定居點。伊塞克湖東邊有個叫Chigu嘅地方就係被水淹沒嘅城池。而果個充滿軍事色彩嘅Mikhaylovka Inlet,係由一場地震造成的,亦揭示左一部份淹沒村莊嘅遺址。 地質學證據亦表明,最近500年湖面水位已下降左2米。希望呢度嘅美景唔好咁怏消失啦。 最後一眼嘅天山, 再見啦~~~~ 過埋呢度,就正式同伊塞克湖湖區同天山山脈講再見了。可以響呢度遊一圈嘅夢想達成左,已經好滿足,冇遺憾了。絕對冇令人失望嘅地方。比預期中更靚。呢3日響呢度所遇見嘅所有人同事,我都會好好記住。期待下次嘅到訪。 出到去之後,我地就到公路旁邊一間餐廳食飯。 是日午餐: 牛肉拉麵 + 茶 (西域嘅麵真係好好食架,彈牙非常~~) 路上碰見老爺火車~ 響車上先寫好要寄的postcard。同佢地”分別”前都係同影張相先。好彩最後返到香港大概兩個星期就收到喇。冇寄失已經好好喇~~~~ 終於回到Bishkek,去機場前響市中心作個最後衝刺~ 差唔多四個幾鐘之後,我地終於返到黎Bishkek喇。去機場前,我地先響市中心黎個簡單city tour,然後再去旅行社office拎返部之車響哈薩克過黎果陣漏左響車嘅MP3。 Bishkek 街景 隨風飄揚嘅吉爾吉斯國旗~ Ala-too Square 一遊 Ala-too Square 係到Bishkek 必定要到嘅地方。蘇聯時期叫列寧廣場。1991年起改名。以前有列寧像響廣場中央,2003年被搬到去廣場博物館後面,現被下圖圖中嘅Erkindik (自由) 雕像代替。每日黃昏都會有降國旗儀式。 周邊有博物館,美術館,Panfilov Park等名勝。不過好可惜,我地今次唔夠時間去周邊嘅景點。 去完Ala-too Square之後, 我地就去旅行社office拎返部MP3, 佢地請我地幫手填問卷,仲送左紀念品俾我地添呀,哈哈,真係多謝晒大叔。 幫手填問卷 旅行社送俾我地嘅紀念品~吉爾吉斯傳統拖鞋一對~ 攪掂晒野之後,我地就出發去機場了。 機場途上~ 再見了,吉爾吉斯,希望有機會再返黎探你。中部南部嘅Osh,Naryn,Song Kol,仲有Torugart Pass,希望有機會可以去下~~~ 軍民兩用嘅機場- Manas International Airport 大概半個鐘車程,我地就到左機場喇。大叔送到我地去門口佢就走喇。因為果度唔停得車。真係辛苦佢呢幾日湊住我地仲帶我地周圍去影相呢。 介紹下呢個吉爾吉斯嘅首都國際機場。位於市中心西南30公里,以吉爾吉斯民族英雄瑪納斯(Manas) 命名。 呢個機場有咩特別之處?一般普通首都國際機場,只會提供民航升降服務,但呢度同時多左一個軍用function, 被美軍租用做軍方基地,稱為Manas Air Base。吉國與美國嘅租用協議將會響2014年到期,過左之後呢個機場就唔會再有軍事成分。 美軍要駐紮呢度,全因為要配合阿富汗反恐戰爭物流支援需要。就係因為地緣政治價值高,雖然吉爾吉斯係個小國,但中國美國俄羅斯等嘅大國亦經常拉攏,鞏固自己響中亞地區嘅勢力。 吉爾吉斯民族英雄:瑪納斯(Manas)與吉國人瑰寶:瑪納斯史詩 瑪納斯係一位帶領吉爾吉斯族人開闢彊土,與外敵部落鬥爭保家衛國嘅勇士。佢係一位天生領袖,驍勇善戰。某程度上佢嘅特質體現左吉爾吉斯族驍勇善戰,百折不撓嘅民族性格。 吉爾吉斯有一部由口頭傳說所集成嘅史詩 <<瑪納斯(The Manas Epics)>>, 就係以瑪納斯為主角講述吉爾吉斯族嘅歷史。史詩講述瑪納斯點樣帶領族人抵抗侵略者,保衛家園。後來嘅故事就以佢兒子Semety與孫子Seitek為主角。 呢部史詩嘅長度係古希臘荷馬史詩 <<奧德賽>> 嘅20倍。吉爾吉斯遊牧民族在史上長期受外族統治,安居日子少,總係不停要反抗,征戰,響馬背上生活。呢部史詩反映左大約12-18世紀吉爾吉斯族全面社會生活,亦成為左民族共同喜愛嘅作品。 可以演唱<<瑪納斯>> 嘅人被稱為 “Manaschy”, 響當地非常受尊敬。而家史詩仍響吉族人之間口耳相傳,根據學者錄音記錄,要唱晒成套史詩要起碼用2年時間。除左口耳相傳,佢地而家亦有用文字記低史詩喇。而家每家每戶都會有一套<<瑪納斯>> 看門口,且代代相傳。而家關於<<瑪納斯>>嘅圖書,戲劇,電影,電視劇等層出不窮。 1995年, 為配合<<瑪納斯>>1000年紀念,吉國政府同UNESCO 宣佈果年為「國際瑪納斯年」(International Year of Manas’) 。吉爾吉斯呢個窮小國都花左800萬美元為呢部史詩攪慶典,可見佢響佢地國民心中地位有幾重要。 2001年,首都比什凱克國際機場更名為瑪納斯國際機場。 Manas International Airport 外觀~ 安檢時遇到一個十分funny的肥叔叔~ 同大叔say goodbye之後,我地就入去check-in了。果段時間冇咩人,好快就寄好行李,之後就去過immigration。過完immigration過security check,同烏茲出境果陣一樣,都係要除鞋過,所有hand carry都係要過X-ray。我地就係響security check呢度遇到果位好funny嘅肥叔叔。佢check我地passport果陣,問我地個名點讀,仲要repeat又repeat。真係有D頂佢唔順。佢玩左好耐都唔捨得俾我地走,之後人多,佢先放我地走。 之後入到去禁區,裡面有幾間紀念品shop,亦有duty free, 我地都去掃左少少紀念品,之後就出去坐下等上機,頭先security check個肥叔叔toilet break,佢行過見到我地又叫我地個名,佢居然仲記得….,仲笑晒口,好攪笑。 坐坐下,我地遇到一個吉爾吉斯人,佢係生意人,搵位坐果陣坐正我地前面,佢只係識好少英文,佢問我地係唔係Korean,佢話淨係識吉文韓文同少少英文。其實我感覺到佢好想同我地吹水交流的,好可惜佢英文真係有限公司。 等多陣,夠鐘上飛機了,正式同Bishkek講再見了。 又回到Tashkent 經過一個鐘多D嘅航程,我地又返到黎鳥茲別克了。吸取左第一次入境嘅經驗,落左機坐shuttle bus果陣我地已經佔據左最有利位置,準備車到左arrival hall之後第一時間衝出去辦入境手續。 最後好順利地,我地係頭幾個最快過完關的。出去等認完行李,就去過海關,但今次冇人幫我地手喇,好彩今次冇俾人插隊,過程都順利。用左一個鐘都唔夠就攪掂晒出得去喇~~ 又再一次遇到好人- 謝謝你,保安叔叔。 可能係因為我地有左入境要快嘅經驗,太快出到黎,我地出到去都唔見要黎接我地嘅人。我地響度左望右望都唔見,之後有一班響度兜生意嘅的士司機已經走過黎不停響我地面前 “Taxi,Taxi,Taxi?”,呢個時候,我地就對佢地灑手拎頭。 坐響門口更亭嘅保安叔叔出手喇,佢用英文問我地: “Any driver, hotel?” 我地同佢講"Ok, we have",等佢知道有人會黎接我地,我諗梗要唔要打俾agent大叔果陣,保安叔叔居然拎左佢自己部電話出黎,塞落我手叫我打電話~~~ 之後打俾大叔,話俾佢知我地出左黎,唔使3分鐘,我地就見到黎接我地嘅人喇,仲要舉牌之後快閃,人又多,根本睇唔到佢去左邊,之後有幾個響度舉梗牌等梗其他人嘅大叔幫我地手,一齊指住同一個方向,咁我地先搵到佢。一望之下,唉,又係我地全程唯一一個dislike嘅司機大叔。佢真係……. 不過真係好多謝保安叔叔,居然肯借個電話俾個完全唔識嘅路人甲打。仲不停咁用自己最有限嘅英文問我地係唔係真係有人黎接我地。(等嘅過程中佢係不斷問,仲要加埋好worry嘅眼神) 之後見真係有人接我地,佢個樣relax晒,我地都有同佢講thankyou同講再見,之後我地就上車返去黑洞酒店了。 Tashkent 機場夜景~ 去到酒店之後,我地搵黎reception 識英文嘅哥哥幫手約果位dislike大叔聽日幾點黎接我地去機場,約好之後就返房了。 今次再住黑洞酒店,我地被安排住上面,房間比之前住嘅兩晚新淨,花灑都有力D,冇晒黑洞feel。響房執下野,沖埋涼,同紀念品影下相,上下網plan下聽日最後一日自由時間嘅行程之後,就休息抖足精神準備聽日最後衝刺了。