經過新年一連串拜年活動,今日終於有時間更新下我呢排又去左邊度食野喇!今次介紹的呢間餐廳係位於九龍灣新開無幾耐的韓式餐廳,最吸引人的一定係佢的75cm鐵板餐! 當日去到都幾多人食! 店舖都幾大!坐位都坐得舒服! 前菜小食唔多吸引!所以我都無食!今次我地一行12人一齊去食,叫左兩個75cm鐵板餐再加一個2人餐及4人餐,仲有比小朋友食的兒童餐! 套餐的辣炒豬肉 - 唔算好辣但好鹹,一定要配飯食! 套餐的鐵板炒雞肉 - 呢個炒雞個醬汁好好味! 套餐的什菌豆腐湯 - 呢個唔太辣,有淡淡泡菜味道,好飲! 套餐的韓式炒粉絲 - 其實我本身唔太鍾意食韓式炒粉絲,因有d店舖會炒得好乾,但因韓式粉絲較煙韌,所以會有好似食緊橡筋的感覺,但呢度的炒粉絲就無呢個問題喇!所以我都食左兩碗! 套餐的迷你部隊鍋 - 雖然呢個迷你版有齊大部分部隊鍋應有的材料,但湯底實在偏酸及辣,所以大家食哂配料就算了! 套餐的柚子醬沙律 - 呢個沙律我幾鍾意架!除左有柚子醬仲有黑醋,酸酸甜甜幾開胃(雖然唔係好明點解上左幾個main先送上) 套餐的海鮮煎餅 - 呢個煎餅真係麻麻地,唔夠脆但又非常油! 小朋友的兒童餐 - 都好豐富,有粉絲、雞肉同飯團,仲有甜品同飲品,小朋友話好好味喎! 主角終於黎喇!75cm鐵板餐!裡面有辣味同醬油味的炒雞肉、炸蝦/炸雞(我地揀左炸蝦)、蒜香腩肉、沙律、薯條同埋中間個行芝士,你可以將雞肉沾落芝士度,然後將芝士捲住雞肉一啖放落口,極邪惡但又好好味!小朋友仲將薯條沾落芝士,玩得好開心! 點擊圖片放大 總括黎講食物質料都ok,但唯一要改善係店員的服務態度,落單時店員的態度非常差,好似嫌你麻煩,唔想聽你講野咁!真係需要改善! Kim's Spoon 地址:九龍灣宏照道38號MegaBox6樓3號舖 「YING住食住行」已經開左係Facebook開左專頁喇! 歡迎大家入去比個like丫! www.facebook.com/yingyingstyle