無論幾忙都好,都要約朋友聚下、放鬆下!沉日約左好朋友同埋老公去食飯,大家都係灣仔附近,上網睇左一輪,揀左係附近的日本菜「家賀屋」。平日大家工作咁忙,一定要食好野好好慰勞一下自己先得! 雖然呢度唔算好易搵,不過地鐵站行過去都好近! 店舖唔算好大,但因為係樓上舖感覺私隱度夠高,好適合同朋友聚會! 點擊圖片放大 我地3個人都叫左唔少野食,我地叫左一板海膽、特選鮪盛、特選海鮮丼、青龍卷、焦糖玉子燒、炭燒餃子雞翼、薄燒牛舌 新鮮海膽 - 以前我對海膽無咩好感,因為試過係某d壽司店食過有陣怪味,但自從之前我食過一次海膽飯後,深深愛上左海膽個種又鮮又甜的味道!我地3個人都係愛海膽之人又點可以唔叫呢?呢度的海膽真係好新鮮,食落去真係好甜,完全無腥味,加埋飯同紫菜真係好滿足! 點擊圖片放大 特選鮪盛 - 其實我因為對某d魚生敏感,引致到我每次食日本菜時都只可以食三文魚,所以每次同朋友食飯,為左遷就我,佢地盡量唔會叫太多魚生,但我見佢地沉晚睇menu時已經係咁望住個3件拖羅,就算我唔食得都有叫到比佢地!佢地由最深色的吞拿魚開始食,然後中間的中吞拿魚腩,最後食最淺色大吞拿魚腩,一舊比一舊肥美,大吞拿魚腩油脂最豐富,我淨係望住已經想像到個種滋味,沉晚真係有一刻想過食左先算,但一諗起敏感時候有幾辛苦就打消左呢個念頭。 特選海鮮丼 - 特選海鮮丼裡面有磯煮鮑魚、大吞拿魚腩、三交魚籽、蔥吞拿魚腩、海膽、特大赤海蝦、立魚、赤貝、油甘魚、左口魚裙邊、吞拿魚、三文魚腩。真係好豐富!海鮮入面我只係食左三文魚腩、特大赤海蝦、赤貝同埋磯煮鮑魚,首先要講一定係特大赤海蝦真係好大隻,肉質非常爽口而且好好好甜(很重要,所以說3次^^ ),赤貝亦係非常爽口帶小小海水味,磯煮鮑魚煮得非常軟身但又不失咬口,真係好好味呀! 點擊圖片放大 +2 我地叫的海鮮丼係一個套餐有前菜胡麻醬沙律、麵豉湯及日式蒸蛋。 麵豉湯 - 裡面唔止得紫菜仲有秀珍菇架,不過略微鹹左小小!日式蒸蛋 - 裡面有日式魚蛋、蟹柳同埋冬菇,我自己覺得多左小小湯但都係好味的! 青龍卷 - 呢個好似比較普通,但每次食日本菜都一定會食,炸蝦炸得有小小乾身但味道幾好味! 焦糖玉子燒 - 我同老公食日本菜好少會叫呢個食,但朋友好想食,所以叫左最特別的焦糖玉子燒,另外仲有低糖玉子燒,估唔到呢個咁有驚喜,焦糖配玉子出奇地夾及好味!不過要襯熱食! 炭燒餃子雞翼 - 其實睇menu時已經好想食,雞翼燒得香脆,裡面係啖啖雞肉同埋餃子餡,感覺真係好似食緊餃子,只係將餃子皮換成雞翼皮,好味! 薄燒牛舌 - 本身唔太鍾意食牛舌,好記得好耐之前試過食過一塊牛舌,然後腸胃炎左幾日,可能因為個塊太過油膩。呢度的牛舌比較厚身d,如果可以切薄少少就更好喇! 呢餐飯真係食得好飽好滿足,食完今次日本菜可能又要唔知再等到幾時喇! 「家賀屋」 地址:灣仔灣仔道83號1樓 「YING住食住行」已經開左係Facebook開左專頁喇! 歡迎大家入去比個like丫! www.facebook.com/yingyingstyle