旺角登打士街雖然唔係好長, 但就因為有好多美食, 所以每次行過都會遇倒人肉路障, 寸步難行, o係哩度雪糕糖水小食窩夫薯條差唔多咩都食倒, 但最近去開附近先知原來隔離好景開左一間手卷店, 三十幾蚊就已經有大大隻鋪滿唔同海鮮o既手卷, 手卷款式仲有幾十款咁多 *********** 講緊就係哩間卷王, 聽朋友佢上次黎都大排長龍, 不過今次我黎又咁o岩冇人喎 卷王係一間外賣小店, 但手卷款式就冇俾店面大小局限 食客除左可以外賣, 食店旁邊仲有張枱仔, 食客可以食埋先走, 枱上面有幾種唔同o既調味, 食客可以按自己個人喜好去加 幾十款手卷真係花多眼亂, 以我所見最抵食就係哩個四味自選大手卷, $38就可以揀四款唔多配料 而我因為鍾情三文魚籽同海膽, 最後都係揀左食海鮮丼 三色丼($68) 我哩個三色丼入面有海膽, 三文魚籽同三文魚蓉, 海鮮多到遮晒所有白飯 海鮮丼仲包埋汽水 雖然要立食, 但三文魚籽粒粒晶瑩剔透, 海膽鮮甜又冇腥味, 三文魚蓉又夠滑入口即溶, 出面堂食價錢貴一倍都未必有咁o既質素, 超高o既性價比絕對可以彌補冇位坐哩個缺點 點擊圖片放大 +2 除左海鮮, 下面o既白飯都唔馬虎, 珍珠米唔會過腍食落有d彈口, 淋少少豉油上去已經好好味 估唔到旺角街頭都有咁高質o既海鮮丼, 而且價錢仲唔貴, 雖然當日天氣炎熱, 但我以我平時都容易中招o既體質竟然都可以全身而退, 非常驚喜 味道: 4/5 環境: 3/5 服務: 3/5 衛生: 3/5 抵食: 4/5 食店: 卷王 地址: 旺角花園街2-16號好景商業中心地下22號舖 電話: 25232303 人均消費: $50-100