日期: 23-9-2017(星期六) 今次因為經朋友托上托, 所以可以以公司包場價買倒超平海洋公園飛, 重點係, 仲可以優先玩埋鬼屋, 雖然唔係間間都玩過, 但都已經玩左5間, 最恐怖o既都玩過晒, 等我而家分享下我玩過o既5間鬼屋啦 恐懼鬥室(恐怖度4/5) 今年海洋公園哈囉喂以恐懼鬥室作主打, 佢亦係我今次玩過5個鬼屋入面最恐怖, 但以睇恐怖片大o既我黎講, 我會俾4分, 入面雖然有好多鬼會失驚無神彈出黎, 但因為佢唔掂得你, 加上自從有鬼屋出事, 海洋公園亦加派左工作人員係指路, 所以行行下你會見倒有工作人員指你行左/右邊, 令投入度大減 暗黑迷宮(恐怖度: 1.5/5) 未入暗黑迷宮之前我以為迷宮入面又係會有鬼彈出黎嚇人, 點知入到去係黑到伸手不見五指, 行晒全程乜都冇, 只係有d位可能掛左d布, 你行o個陣會感覺倒有d野掂倒你, 同有個位地板會郁咁, 但由於可以同朋友一齊行, 所以除左帶頭o個個可能會驚d之外, 其實中間o既人只會會覺得乜都睇唔倒, 就咁o係度行, 如果唔洗排都可以一玩下, 要排就免了 靈光萬聖祭(恐怖度0/5) 哩個嚴格上黎講唔可以叫鬼屋, 其實佢只係一個俾你影相o既場景, 雖然唔恐怖, 但入面d佈置都幾靚, 而佢亦係唯一一間可以影相o既鬼屋 點擊圖片放大 +2 慌宅17(恐怖度: 3/5) 慌宅17係唯一一間要預約o既鬼屋, 所以我地對佢o既期望都好大 想玩o既朋友記得o係公園門口右手邊哩度拎預約證, 因為慌宅17 o係海洋公園o既另一邊, 如果唔記得拎又要行來行去 預約證有寫時間, 只要o係指定時間去到鬼屋就可以 一入鬼屋佢會每人派一張牌分組 大約十人一組, 就會叫你蒙住眼同耳, 拉住條繩行 o係蒙眼o既時候, 其實只係拉左我地去第2個建築物, 真正鬼屋o既入口(由於鬼唔掂得你, o係眼耳都冇得用o既情況下, 當然冇鬼會嚇你), 雖然話睇唔倒野, 但戴住耳罩其實仲會聽倒身邊其他人講o既野, 所以唔會感到有幾恐怖 去到真正鬼屋入口, 佢會隨機將之前o既十人小隊分做2 team人, 換句話講你有可能同朋友分開左, 但你身邊仲會有其他人o既, 入鬼屋前仲特登同你講可以中途可以隨時放棄, 但其實都係心理戰, 而入到去亦冇鬼彈出黎, 只係叫你伸隻手入個櫃度摸d野, 同有一part係要一個跟一個爬一條隧道, 原本我又以為會有鬼彈出黎, 原來都係冇o既, 只係爬o既過程, 佢有d位鋪左地氈咁, 你會摸倒毛松松, 同埋爬爬下, 會有一段時間唔見左前面個人(估計係有分叉路), 但好快又會見返佢地, 到最後見倒一個扮相醜陋o既慌宅主人, 食d野就玩完, 玩完o個刻真係有d O咀, 下?!咁就完拿o既感覺 城寨驚魂(恐怖度: 4/5) 城寨驚魂其實驚嚇度拍得住恐懼鬥室, 因為都係擺左好多鬼入去, 時不時會有鬼彈出黎, 不過論鬼o既造型, 當然就係恐懼鬥室稍勝一籌 總結, 除出出事o個間鬼屋係需要一個人玩之外, 其他所有鬼屋其實都可以一堆人入去, 所以對於膽大者其實驚嚇度只係一般, 如果時間有限, 我會首推恐懼鬥室同城寨驚魂, 因為2間鬼屋都有好多鬼會不時彈出黎嚇人, 細膽者亦可以去靈光萬聖祭影下相, 至於黑暗迷宮同慌宅17我覺得有時間先好去