街市地道韓國人炸雞店 追加隱世牛骨濃湯坑腩粉@馬鞍山 邊個話食好嘢一定要出銅鑼灣、尖沙咀?邊個話食好嘢一定要去高級餐廳?太安樓大家去得多啦,不如轉下環境入馬鞍山啦! 唔好睇馬鞍山咁偏僻啊!其實佢有好多隱世美食,例如桂林老友粉、醬缸咁!長於呢個寧靜小角落嘅我見證住佢由美食沙漠變成天堂。今次為大家介紹嘅就係由韓國人開嘅小店,佢嘅始祖有成19年歷史嫁啦!店鋪前身係一間賣炸三寶,位置非常狹小,目測只有100平方米。 唔講唔知,小店係位於馬鞍山新港城街市內。進入街市沿路直走,經過赤松麵包店後轉右,就會見到紅招牌寫住「韓國料理」嘅小店啦! 店內有多款唔同嘅小食,如圖所示,有芝士味($20)、原味($18)、吞拿魚味飯團($$20)。 魚肉可樂餅($23)、紫菜飯卷($28) 除咗飽肚小食仲有涼菜,有辣八爪魚、辣魷魚($50)、辣白菜同辣蘿蔔($25-$30)! 咁我就同男朋友仔買咁少少試下: 細份炸雞$35 有5件聞到好香,味道更加唔錯。外皮都好脆好鬆化!可惜唔係即炸,已經放涼;亦唔Juicy!不過相比相台灣炸雞,我覺得呢道嘅炸好味好多! 魚肉可樂餅($23) 外表又幾得喎,面頭仲有啲甜甜嘅汁醬。BTW食落去認真普通,好似食粉團咁,又無魚味。另外入面仲有條香腸,我冇喺韓國食過魚肉可樂餅,唔知入面有冇香腸。但我就咁食就覺得好奇怪啦!同埋一條已經好夠飽! 紫菜飯卷($28) 飯卷係暖暖哋,配料有紅蘿蔔、醃蘿蔔、青瓜、蛋、蟹柳。味道我覺得正常啦,唔算話太好食囉。同埋$28真係唔太平!而且餐肉唔係用韓國嘅,有啲失望! 地址: 馬鞍山新港城街市麵包店側 食咗咁多嘢一於唔好畀佢停!男朋友之前入馬鞍山,佢對於其中一間牛腩粉念念不忘! 就係永利清湯腩!店面基本上無特別裝潢,白色圓枱加上木凳。但原來佢經營嘅本錢源於牛骨湯! 下午茶時段加兩蚊有一杯飲品。 我同男友都揀咗坑腩河,因為有少少根、少少肥。 點解咁鍾意食?全因為佢牛味重,夾起唔散大大舊好抵食! 個湯一飲就知係牛骨湯,只不過略嫌小小淡,不過湯底夠甜啦! 地址: 馬鞍山沙路628號新港城廣場3期地下