東京-富山 相信大部份人去金澤,白川鄉都會由名古屋出發。但係我地買既香港--東京機票只不過係2 蚊, 心血來潮又突然想去白川鄉睇雪,所以我地選擇左由東京羽田飛富山空港,由上而下左至右咁玩落去。由ANA 官網訂票,非日本人遊客價錢連稅不過是 HKD 755,平過坐JR,一D都唔貴。順帶一提,金澤最近機場其實係小松空港,因為買唔到最早班機,我地只好考慮羽田直飛富山。 ANA881 HND-->TOYAMA 0640-0740 (此段航線有用波音787執飛,航空迷大可留意) 係羽田機場宿一宵後,晨咁早5點就由國際大樓坐機場Shuttle 去國內線Terminal。羽田空港只有國際大樓先係24小時開放,乘客可以最早5點坐免費shuttle 到其它國內線大樓,好方便。 唔駛一個鐘就到富山,係出發前幾日落既初雪,時間來得正好。 富山空港其實好細,冇乜睇頭。機場有巴士可以到富山市JR 駅,而開出時間亦都係配合羽田飛黎富山既ANA航班,但留意如果你有寄倉行李,要把握時間否則可能趕唔切上最近班巴士。 富山空港交通: http://www.chitetsu.co.jp/?page_id=733 富山駅⇔富山空港: 410円 時間: 30分鐘 富山-金澤 到左富山駅,基本上都唔覺附近有乜野值得觀光,所以就直接買飛去金澤。坐「富山地方鉄道株式会」既高速巴士去金澤,車程一個小時,片道930円,算係最平又快既方法。第二種方式就是JR西日本,富山–金澤 係JR北陸本線既一段,普通車片道(單程) 970円,特急片道(單程) 1900円,計埋都係坐巴士又快又舒服。 高速巴士時間表: http://www.chitetsu.co.jp/?page_id=754 時間: 1 小時 睇下山,望下雪,話咁快就到金澤駅。今次我地住既酒店係 加賀の湧泉 ドーミーイン金沢 Dormy Inn,係網上睇評價幾高,而且頂樓有大浴場,係金澤駅行去五分鐘就到,反正日本酒店平貴分別都唔會好大,六舊幾水double room 包二人早餐仲想點呢。 。 Dormy Inn: http://www.hotespa.net/hotels/kanazawa/ 去日本咁多次,似乎用盡辦法扮肚痛都無辦法可以提早酒店Check in。我地十點幾就到酒店,將行李寄存好後,就開始金澤漫無目的之旅。