小妹朋友係個居酒屋控,無論去到邊都一定要食居酒屋,今次嚟到台北,同樣唔可以錯過!大家都知道,香港嘅日式居酒屋,價錢都有番咁上下,相反台灣就比較大眾化,可以話有質素之餘,價錢又合理,而呢間居酒屋更加隱身喺台北「潮流特區」西門町,旺中帶靜,靜中又帶旺,非常就腳!點擊圖片放大 +2 大村武以日式木屋為主要風格,紙燈籠、木質拖門、巨形清酒甕、老日本旗幟... ...每一處都充滿日本嘅風味,行入店內,眼前全部都係日文海報、各式清酒、日本人偶擺設等,每一樣都經過精心佈置,彷如置身日本嘅傳統居酒屋!點擊圖片放大 小妹一坐低,就嗌咗一枝熱清酒暖吓身,由於係米酒,所以熱飲好甘香清醇,成個胃都暖笠笠。呢度嘅串燒選擇好多,好似燒大蝦咁,每隻都有成隻手掌咁大,而且食落冇雪藏味,蝦肉彈牙又啖啖肉,價錢方面,簡直係超.級.抵!NT$160有2隻,大約HK$42有2隻,你話抵唔抵食? 而燒牛柳同鹽烤牛小排咬落肉汁多又軟腍 ,一啲都唔乾,係必嗌之選!竹莢魚嘅一夜干肉質鹹香鮮甜唔多骨,價錢都係NT$180條,港紙幾十蚊一條一夜干,相信喺香港好難搵到。點擊圖片放大 +5 另外仲有培根蘆荀、雞皮、明太子釀雞翼、絲瓜蛤蜊、烤珍珠筍等,價錢非常大眾化,兩個女仔成餐飯食到飽飽,$400蚊都唔使,性價比極高呀! 店名:大村武 電話:886 2 2312 3338 地址:台灣台北市萬華區漢口街二段83巷2號 營業時間:一至日18:00 - 1:00 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331