暑假又嚟喇﹗但對於小妹呢啲早已投身社會嘅人嚟講真係好遙遠,不過對於小朋友嚟講就真係好似天堂一樣,唔使做功課,唔使考試,唔使測驗... ...雖然有啲小朋友要應付好多暑期興趣班,但佢哋嘅高質爸媽都會帶佢哋去玩,享受吓親子樂﹗ 往年小妹都有去過一啲親子樂園,但今年就去咗一個從來都未去過嘅燒烤樂園,睇到呢度,或者你會話:「熱死辣辣仲BBQ?」不過小妹要你大跌眼鏡,因為呢度唔止得BBQ咁簡單,仲有充氣水上樂園任玩兩個鐘,嚟個水陸兩邊走,燒到熱辣辣,就走入水池濕吓身,梳乎又消暑﹗ 今次小妹趁星期六7.1假期,同幾個朋友嚟咗馬鞍山嘅白石燒烤樂園,話說馬鞍山線通車之後,去呢邊都幾方便,直達烏溪沙站再搭約6分鐘車程嘅免費接駁巴士,就可以直達燒烤樂園喇﹗真係好方便呀﹗(接駁巴士喺B出口向左轉,喺一排餐廳前面等就得喇,每搭3同搭9就有一班車) 呢個陣勢,真係飽肚感十足﹗ 小妹同朋友一嚟到,就揀咗一個「5人海鮮燒烤套餐」($ 959全包 / 5人,平均每人約$192), 再加一節「5人充氣水上樂園」( 11:00-13:00任玩兩個鐘 $180 / 人),海鮮燒烤套餐嘅食物多元化,包括: 海蝦1袋10隻 帶子1袋5隻 青口1袋10隻 蜜汁叉燒2袋 咖哩豬排1袋 泰式雞排2袋 黑椒雞排1袋 蒜蓉珍寶雞中翼2袋 蒜香豬排2袋 雞肉腸1包 豬肉腸1包 芝士腸1包 雜丸(魚蛋、龍蝦丸、墨魚丸)3袋 本地有機橙心蕃薯5條 本地有機粟米2袋 汽水5罐 礦泉水5枝 燒烤用蜜糖1樽 燒烤叉5枝 膠碟+膠叉5份 燒烤鉗1枝 剪刀1把 紙巾1包 海蝦每隻同手掌差唔多大 帶子未解凍,要睇燒烤指南學解凍呀﹗ 青口接近一半有橙色膏 睇到呢個陣勢,就知道飽肚感十足啦﹗值得一提嘅係佢提供嘅海蝦每隻同手掌差唔多大,青口接近一半有橙色膏,而帶子又貼心提供埋蒜蓉牛油畀大家整蒜蓉牛油燒帶子,海鮮選擇雖少,但勝在質量取勝﹗ 燒烤用具齊全 跟燒烤指南學BBQ,一定會變高手 學燒乳豬冇難度 點擊圖片放大 +4 烤蕃薯又香又甜,我的最愛 而最重要嘅係,燒烤場特別提供燒烤指南一本,畀大家學習點樣先可以燒出高質BBQ﹗等大家咪以為BBQ咗幾十年就係高手,尤其係燒乳豬,真係識條鐵架﹗係呀,呢度連乳豬都有得燒架,如果你人夠多,成隻乳豬擺上爐,都咪話唔沙塵﹗點擊圖片放大 +2 至於水上樂園就更精彩,小朋友同大人可以任玩10條充氣滑水梯、4個充氣水池、搖搖香蕉船、水上飛碟、大滾筒同兒童歡樂水城,其中一條滑水梯仲要高達5米、長12米,小妹我畏高唔敢玩,但啲細路就玩到High High,瀡到連老竇姓咩都唔知,不知幾開心﹗ 水彈大混戰開始喇,小朋友都蠢蠢欲動。 而且每日都設有水彈大混戰,小妹同班小朋友你掟我、我掟你咁,全身濕晒,暑氣全消﹗因為水上樂園每節時間都唔同收費,大家想冇咁熱,可以揀18:30-20:30呢段時間,每個人都係$180,如果想濕足6個鐘,仲可以$420任玩三連節,嚟個瘋狂「夏」水禮﹗ 水上樂園每節票價 (大小同價) : 11:00-13:00: $180 13:30-15:30: $240 16:00-18:00: $240 18:30-20:30: $180 任玩三連節套票: $420 其實暑假週末真係有好多選擇,唔去旅行,留喺香港,去吓近郊BBQ、玩吓水都可以享受親子樂,何樂而不為? 馬鞍山白石燒烤樂園 地址 : 新界馬鞍山白石第1950 號 電話:2744 8188 營業時間:星期一至五13:00 - 23:00、星期六、日及公眾假期10:00 - 24:00 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331