愛上COCO CHANEL,係因為佢優雅高貴嘅Little Black Dress風尚、Classic Vintage皮革包,仲有瑪麗蓮夢露愛塗抹嘅Chanel No.5香水,呢三項堪稱經典界嘅代表,至今仍冇邊個品牌可以有如此具代表性又標誌性嘅時尚,你話,教我如何不愛它﹖ 得知心愛嘅品牌喺香港開辦Pop-up Shop形式嘅CAFÉ,就立即上網登記,睇吓有咩玩﹗雖然已經做咗網上登記,但係嚟到其實都係要排隊等一陣,等嘅期間好熱,但會不斷有店員Serve水畀大家降溫解渴,呢個服務非常貼心﹗ 門口好多人排隊呀,小妹預約咗4點至5點,但4點嚟到,3點嗰批都未入晒去。 場刊 入到去,真係人頭湧湧呀﹗由於小妹已經做咗網上登記,所以可以獲得一杯咖啡師即場手調嘅COCO特飲,有牛奶咖啡同薰衣草伯爵茶揀,小妹近排腸胃比較敏感,唔可以飲咖啡,惟有飲茶啦,味道都唔錯,係有啲淡,但一邊飲住嘢,一邊試吓化妝品、香水都唔錯嘅。 攞完嘢飲,行到入去,人流仲多呀,大家都起勢試用唇彩、香水同指甲油,盡情「扮靚靚」,嗰個場面認真壯觀﹗ 薰衣草伯爵茶 小妹冇乜點試到化妝品,反而係香水就請咗店員嚟介紹一吓,不過個人認為香味比較唔適合我個年紀,所以就冇乜收獲。而小妹嘅朋友就試咗幾隻指甲油嘅顏色,感覺好靚,不過由於太多人嘅關係,店員都好難Serve,所以都買唔到啲咩,同埋大部份指甲油都被試到接近乾咁濟,加上全店又用晒卸甲水,所以朋友都冇試上指甲,只係試喺咖啡杯嘅白色位,如果想買,其實去正常舖頭會更好。 香水唔太啱我年紀 是日唔提供香水主題果汁 枱櫈只For影相 小妹同朋友都玩咗貼紙相,不過奇怪嘅係,佢只係透過E-mail Send張相畀大家,並唔係好似CAFÉ預告講嘅有張實體貼紙相畀大家,喺呢個位有少少失望。而朋友想試佢以香水為主題嘅果汁,又咁啱冇供應,所以又多一個失望位。除此之外,本來都期待玩品牌設計嘅紋身貼紙,可惜去到都唔見有,係第三個失望位。另外,店內冇安排枱櫈畀大家坐,純粹只係For影相呃Like,同之前去Vivienne Westwood Cafe舒舒服服食Cake飲下午茶有好大分別,似賣化妝品多過Cafe,係第四個失望位。 小禮物 CHANEL貼紙同唇彩體驗卡 不過,好彩臨走前都有份驚喜小禮物收,入面有CHANEL貼紙同唇彩體驗卡(唇彩試用裝)作為紀念品,安撫吓我有啲失望嘅心靈。 店名:CHANEL COCO CAFÉ 地址:銅鑼灣耀華街 38 號 營業時間:2017年6月10-25日 相關網站:cococafe.chanel.com.hk Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331