原本主打龍蝦套餐嘅Master Kama,最近推出以蟹為主題嘅套餐,只因龍蝦風潮似乎已過,而咁啱法國膏蟹當造,不如嚟個順水推舟,引入阿拉斯加鱈場蟹同法國膏蟹,分別推出西式同日式兩食嘅二人套餐「Holy Crab」蟹宴,價錢「小資」得嚟又唔貴,最啱兩個人撐枱腳,小妹即刻約朋友食,打鐵趁熱一下! 「Holy Crab One西式風味」($538) 「Holy Crab Two日式風味」($588) Holy Crab One西式風味」($538)主要係以新奧爾良Shake Shake海鮮做主打,有膏蟹、大蝦、蜆肉、青口、帆立貝同魷魚等海鮮,用香草牛油汁調味,另外仲有蟹肉芬奴意式烤麵包、釀蟹蓋同前菜六小缽;而「Holy Crab Two日式風味」($588)就係日式紙火鍋Shabu Shabu,同樣以蟹、虎蝦、蜆等做材料,仲有蔬菜盛盒、釀蟹蓋同前菜六小缽。小妹同朋友都係蟹迷,眼見兩個餐牌都極吸引,真係陷入兩難,不過由於之前試過另一間專門食新奧爾良Shake Shake海鮮嘅餐廳,權宜之計小妹就同朋友揀咗日式風味。 法國膏蟹嘅蟹蓋勁多膏呀~~~~ 日式海鮮盛盒入面有阿拉斯加鱈場蟹、法國膏蟹、虎蝦同蜆,蟹同蝦嘅肉質都飽滿彈牙,放入昆布湯入面灼5分鐘到就可以食,不過小妹始終覺得份量太少,以個人食蟹嘅經驗,去韓國食一餐紅蟹放題要成6-7隻先滿足到我(仲要係好似松葉蟹咁大嘅蟹),呢度對我嚟講真係唔夠攝牙瓹... …好彩都有啲蔬菜同粥打吓底,蔬菜盛盒入面仲有日本進口嘅魚餅同心心圖案鳴門卷,得意又彈牙。至於個蟹粥「蟹之雜炊」,就混合咗蔥花、雞蛋、蟹肉同蟹膏,蟹膏滲入粥入面,十分鮮甜,小妹我食咗一大碗呀!點擊圖片放大 蟹之雜炊 蟹之雜炊 當然上主菜之前會上精美嘅前菜,「六小缽」入面有蟹肉玉子燒、蟹子日式凍豆腐、虎蝦配芒果慕斯、柚子醋海藻沙律、酸辣羅勒海蜆同海鹽枝豆,六樣嘢就集齊甜、酸、甘、辣、鹹五種味道,清新醒胃!相反「芝士蟹肉釀蟹蓋」就比較惹味濃郁,同「六小缽」形成極大對比,以法國膏蟹肉混合車打芝士,再配三文魚籽同火箭菜一齊食,鹹香得嚟又Creamy,又係一邪惡食物!最後仲有抹茶奶凍奉送,食落充滿抹荼甜而回甘嘅味道,好一個Happy Ending! 「六小缽」入面有蟹肉玉子燒、蟹子日式凍豆腐、虎蝦配芒果慕斯、柚子醋海藻沙律、酸辣羅勒海蜆同海鹽枝豆。 芝士蟹肉釀蟹蓋 抹茶奶凍 現場有勁多蟹公仔畀你Selfie,襯晒主題 一般出去食蟹宴,每人冇一千蚊以上都冇得落樓,但係呢度就可以$600食到一個2人前嘅蟹宴,最啱小資閨密同情侶們撐枱腳,雖然夠唔夠食嘅嘢見仁見智,但過吓食蟹宴嘅癮都係一種情趣嚟嘅,反正唔貴,試吓無防。點擊圖片放大 店名:Master Kama 電話:3421 2129 地址:銅鑼灣謝斐道500號維安商業大廈3樓 營業時間:12:00-22:00 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331