秋風起,大家就會諗起去Camping同野餐,唔單止可以同朋友食吓嘢、聚吓、玩吓小學雞集體遊戲,仲可以接觸吓大自然... ...講真,有幾多人真係想同大自然嚟個全接觸呀(行山人士、運動愛好者同「星探」除外)?又要著長袖衫褲、又要防曬、又要避蟲蟲,一班港女真係可一不可再(只限今年囉,下年又再犯濺過),但係,如果有一間可以畀大家體驗Camping同野餐樂趣嘅餐廳,港女們實Like! 於灣仔軒尼詩道嘅「野玩山店」,設計概念就係以露營同野餐為主,室內每一處設計都可以搵到野外露營嘅器具,例如三角形帳幕、野餐木枱、露營火水燈、 不銹鋼水杯、保暖壺、野餐用紅白格仔餐巾、鐵製器皿... ...入到去仲以為去咗露營用品店! 野火香烤豬仔骨 小妹向來對「人在野」感覺麻麻,所以有感呢間餐廳係特別為我而設嘅,唔單止可以過吓露營癮,野吓餐,仲唔使同蛇蟲鼠蟻做朋友,真係造福人群!呢度嘅嘢食都幾「野」味十足,為咗配合露營野炊嘅主題,喺選材同菜名設計上都諗過度過,例如「野火香烤豬仔骨」,食野味通常喺歐洲好流行,將新鮮豬肉或牛肉放喺搭建嘅爐上面BBQ,別有一番風味,喺呢度當然唔使自己燒,有專人燒嚟畀你,印印腳就可以食到BBQ風味豬肋骨,好梳乎呀! 香辣雞翼伴藍芝士 「燒雞翼,我鍾意食」星爺完完全全將BBQ嘅精髓講咗出嚟,就係雞.翼。雖然呢度嘅雞翼唔係燒嘅,係西式嘅Buffalo Wings(香辣雞翼伴藍芝士),野味辣汁撞藍芝士,再加埋西人最鍾意嘅西芹條同甘筍條,完全突顯出又Raw又有BBQ風味嘅感覺。 荷蘭鍋海鮮薈 鍾意「食野味」(野炊)嘅朋友一定對荷蘭鍋好熟悉,呢種鍋唔單止受熱均勻,可以保存食物原味,而且保溫效果超好,好多露營玩家都好鍾意用佢嚟烤肉、蒸食、整Pizza、焗麵包等,而呢個「荷蘭鍋海鮮薈」就係用呢種器皿,將青口、蝦、魷魚、蜆等簡單海鮮,混合茄醬、辣椒等材料,完全就係一般人野炊嘅方法! 野玩沙律 講到Raw Food一定唔少得沙律,呢個「野玩沙律」其實同一般沙律無異,但用午餐肉、腸仔嚟整沙律就好有野炊Feel,因為只有露營者先會經常幫襯呢啲罐頭食物(唔識煮嘢食嘅人都係),所以配埋沙律菜、蕃茄、洋蔥、粟米、芝士,感覺又豐富咗同Fresh咗。 蜜糖烤甜薯 焗麵包布甸 甜品方面小妹都係幫襯番啲野炊Feel嘅嘢食,例如「蜜糖烤甜薯」。好多BBQ人士都會煨吓蕃薯咁,而呢個甜薯烤完之後搽上蜜糖,食落甜絲絲,外脆內軟,只係飯後食有啲滯,如果多人Share都值得一試。頭先講過荷蘭鍋可以焗麵包,所以一定唔少得「焗麵包布甸」,香軟嘅麵包布甸配合濃滑嘅朱古力醬,雖然罪惡感十足,但係咁誘人嘅味道都真係好難忍。 背囊都可以做裝飾!!! 點擊圖片放大 +2 店名:野玩山店(Something Wild) 電話:2997 5233 地址:灣仔軒尼詩道288號英皇集團中心1樓101-104號舖 營業時間:星期一至五: 11:30-00:00 星期六、日及公眾假期: 10:00-00:00 Facebook:https://www.facebook.com/hongkonggirl331/ Instagram:http://www.imgrum.net/user/hongkonggirl331/2549505907