其實「龍蝦風」已經喺香港吹咗成年,Sell龍蝦包、芝士焗龍蝦嘅舖頭一間接一間咁開,所謂「鷸蚌相爭,漁人得利」,喺咁強烈嘅競爭之下,各位如果想平平哋咁食番個龍蝦餐跟本冇難度!小妹近日試咗三間提供龍蝦餐嘅餐廳,雖然水準比唔上「名人飯堂」,但以平民價錢嚟講,都算得上係上到大場面架。 (1) 爽口龍蝦配炒飯@紐約客 New York Diner 芝士焗波士頓龍蝦配龍蝦肉炒飯($193) 作為一間以美國菜為主打嘅連鎖式餐廳,最吸引嘅莫過於以大大份美式美食作招徠,超大漢堡包、Juicy肉眼排、脆炸薯條、手製明爐薄餅... ...聽到已經食指大動,不過,由美國興起嘅Lobster Cuisine呢度都食得到,「芝士焗波士頓龍蝦配龍蝦肉炒飯」大大份都係$193,兩個細食女仔啱啱好夠食,每人都係$100到,絕對平民價!半隻龍蝦用芝士焗,半隻用嚟炒飯,蝦肉夠爽口彈牙,蝦頭佈滿橙紅色蝦膏,配埋香濃芝士,食完即刻心花放。如果自認大食,可以試埋「美國招牌啤酒烤雞」($173),最正係隻雞用啤酒同必製醬料醃過,上枱嘅時候枝啤酒插住隻雞,好似隻雞跳緊鋼管舞咁,影相呃Like一流。嘢飲方面可以試吓「海洋梳打」($38),成杯藍色沙冰,最啱夏天飲。 美國招牌啤酒烤雞($173) 點擊圖片放大 海洋梳打($38) 店名:紐約客 New York Diner 電話:2246 9488 地址:荃灣楊屋道1號荃新天地一期地下G27-28號舖 營業時間:星期一至日11:30-22:00 _________________________ (2) 厚肉龍蝦包@Hungry Lobster 齋睇個名就知道係食龍蝦餐專門店啦!主打焗龍蝦、龍蝦包、龍蝦湯同龍蝦意粉,隻隻加拿大入口嘅波士頓活龍蝦重1磅或以上,咁新鮮已經抵讚,熱賣嘅「龍蝦包」($138)選用軟熟嘅牛油包,雖然每隻包只係用半隻分量嘅龍蝦肉,但係以半磅嚟講算厚肉兼大隻,加上自家牛油、香草同檸檬汁,令成個包香口又清新,每一啖都係厚厚龍蝦肉,Oishi!而「龍蝦意粉」($168)就用蕃茄、龍蝦肉同香草熬成嘅醬汁煮成,每條意粉都掛上蕃茄龍蝦汁,非常鹹鮮香濃。個人認為「龍蝦湯」($58)一定要試,因為大廚為呢個湯花咗唔少功夫,用大量龍蝦頭、龍蝦殼、蔬菜同秘密香料熬足十個鐘,每一啖都係龍蝦嘅精華,想唔飲都唔得!三樣嗌晒每人都係$200到,比起「名人飯堂」,呢個價我諗剩係食到個龍蝦包。 龍蝦包($138) 龍蝦包手掌咁大 龍蝦意粉($168) 龍蝦湯($58) 超好飲手工啤 店名:Hungry Lobster 電話:9330 5378 地址:銅鑼灣登龍街18號V Point地下3號舖 營業時間:星期一至日11:30-22:30 _________________________ (3)Creamy芝士焗龍蝦@Pizza Hut 「咩話?Pizza Hut都有龍蝦食?你係咪玩嘢?」當你睇到個標題,你一定會咁樣問,以為我講笑,其實我冇,當我都以為Pizza Hut頂多都係賣到烤豬仔骨、燒春雞同德國豬手嘅時候,點都估唔到佢會賣埋龍蝦。呢個龍蝦餐係二人套餐(當然單點都得,但唔抵),價錢係$368,有原隻巴馬臣芝士焗龍蝦、一個飯或意粉、兩客湯或沙律、兩杯嘢飲,以兩個正常食量嘅女仔嚟講真心食唔晒,因為隻龍蝦真係超大份,龍蝦肉預先拆咗肉,混合磨菇同芝士一齊焗,香口又Creamy,真係估佢唔到咁好食。為咗配合龍蝦餐主題,飯麵方面可以嗌「大蝦龍蝦汁意粉」,同樣都係Creamy同龍蝦味濃,只係大蝦唔夠大,用咗中蝦,名實不符,以連鎖快餐店嚟講,甚為普遍。二人餐每人又係$200蚊樓下,平平哋,質素OK,都值得一試。 原隻巴馬臣芝士焗龍蝦 超大舊龍蝦肉 大蝦龍蝦汁意粉 店名:必勝客Pizza Hut 地址:全港、九、新界均設分店 營業時間:星期一至日11:00-22:30 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331