講到元朗最出名嘅Cafe,大家可能只會諗起Moment,因為小清新風格令人印象深刻,但食死一間Cafe真係有啲悶,作為元朗偽文青,發掘新Cafe是常識吧? 近日發現元朗馬田路開咗一間小巧精緻嘅Cafe,令小妹大為心心眼,皆因小舖前嘅透光玻璃、綠色盆栽同原木桌椅,正正係小妹最愛嘅小清新風格!即晚就約咗大班好友開餐,試吓小舖大廚水準。睇吓餐牌,居然玩Fusion Style,美式Burger、意粉、韓式芝士BBQ豬肋骨、英式魚柳、西班牙式小食拼盤、法式煎魚柳... ...舖仔細細,菜式竟然係咁International! 香蒜辣味孖寶虎蝦意粉($138) 香蒜辣味孖寶虎蝦意粉($138)係小妹覺得值得推介嘅主菜,全因意粉韌度啱啱好,唔會太腍或太硬,意粉掛滿蒜頭、辣椒同酒爆香嘅汁醬,香辣惹味。而大蝦亦Sell重量級,兩隻越南大蝦佔滿成隻碟,食落爽口彈牙,大廚功力不容忽視。 燒烤醬焗原條豬肋排配芝士溶岩醬($178),上面鋪滿芝士呀~~~ 而另一主菜燒烤醬焗原條豬肋排配芝士溶岩醬($178)亦係小妹至愛,做法雖同一般美式餐廳大同小異,但豬肋排嘅肉質卻異常軟腍,只要用牙輕輕一咬就骨肉分離,完全食得唔「呢Hea」!BBQ醬汁有少少辣,加埋溶岩芝士食完全冇罪惡感,食完想再Encore! 煙肉芝士烤雞排漢堡($78) 白酒羅勒煮鮮大蜆($78) 鮮菠蘿合桃煙三文魚青檸香醋沙律($78) 餐前會Serve牛油餐包 另外仲有煙肉芝士烤雞排漢堡($78),烤雞排經過秘製醬汁醃製,烤時鎖緊肉汁,令漢堡食落更Juicy。至於前菜有白酒羅勒煮鮮大蜆($78),味道相對較淡,不過不失;而是日沙律係鮮菠蘿合桃蝦青檸香醋沙律($78),可惜因為大蝦賣晒要轉煙三文魚,係有少少失望,因為菠蘿酸甜味同煙三文魚唔太夾,而質感上亦有偏差,唔似蝦肉較爽口清新,但整體上成間餐廳嘅Feel同食物水準都達90分! 有得一次,就有第二次。小妹第二次帶FD去食,係非元朗區居民,本來一心想再食虎蝦意粉,可惜餐牌已轉,但又畀到我另一驚喜!冇咗大蝦,有蟹!前菜蟹肉蟹籽香芒蘋果沙律($98)主打清新風,以羅馬生菜、火箭菜、紫葉生菜墊底,面層鋪滿新鮮芒果肉同蘋果粒,食落香甜爽口,再配合鮮甜生拆蟹肉同蟹籽,令口感層次更豐富! 蟹肉蟹籽香芒蘋果沙律($98) 至於主菜蟹肉羅勒藍龍蝦汁意粉($128),同上次一樣,意粉韌度恰到好處,但令次就轉「索」香濃龍蝦汁,口感上較Creamy滑溜,再撈埋蟹肉、洋蔥、蘑菇一齊食,更加提升龍蝦汁嘅香濃感。 蟹肉羅勒藍龍蝦汁意粉($128) 鮮果冰茶$28入口非常Fresh! 現今Cafe開到成行成市,但令小妹真心覺得有質感、有質素嘅就真係寥寥可數,作為一個文青(尤其係我呢啲偽文青),一定要對生活有態度,唔係咩Cafe都Hea,咩Cafe都蒲,如果你都鍾情元朗嘅Cafe,除咗Moment,呢間都係一個唔錯嘅選擇。 店內坐嘅都係文青,有圖有真相。 室外位都好有文青味道。 門前綠意係我嘅最愛 呢個位下次一定要坐坐 P.S下次去要試吓揀下晝去,因為真係好想坐喺個小窗邊曬吓太陽,睇吓書,歎吓咖啡。 店名:Aldou Cafe 電話:2619 9933 地址:元朗馬田路38號怡豐花園3號地舖 營業時間:星期一至四 : 12:00-17:00,18:00-22:00。星期五、六及日: 12:00-17:00,18:00-22:30。