其實依家去韓國掃零食，究竟仲有幾多人會買Brownie、魚仔餅呢？或者買手信畀公司同事都仲會嘅，但自己食就真係唔．想．囉！皆因韓國永遠講潮流鬥In，我哋呢班緊貼潮流嘅香港豬豬當然要時刻跟上步伐啦！ 話說早排小妹同朋友又去韓國，講真首爾呢個地方真係去極唔厭，唔講化妝品、護膚品，齋講美食就已經值得一去再去。小妹今次有個特別企劃，就係掃盡韓國特色零食，純粹分享，大家睇完就算，因為到各位去到可能已經冇咗或者Out咗，如果閣下唔聽話都可以去搵吓嘅... ...但我唔擔保實有囉，利申！ （１）Samlip士多啤梨夾心三層蛋糕 小妹認為呢個蛋糕真係士多啤梨系列入面最好食嘅，兩片海綿夾住士多啤梨忌廉，香滑軟熟，好食過香港大牌「嘉Ｘ雪芳蛋糕」，啲忌廉極幼滑之餘又充滿士多啤梨嘅香甜，Yummy Yummy！各大便利店都有得賣，但最好早餐時間去，因為過咗就會畀啲學生哥搶晒！ （２）Samlip士多啤梨曲奇 話就話係曲奇，其實係似老婆餅嘅質感，入面包住杰身嘅士多啤梨冬瓜蓉，味道香口，但要有心理準備較乾身，齋食唔飲嘢會好難吞。 （３） Biggrae士多啤梨奶 簡直係港女至愛，粉紅色嘅牛奶夢幻甜蜜，仲係港女最愛嘅士多啤梨味，便利店同超級市場長期有貨，唔使驚！ （４）極大盒士多啤梨（購自樂天超市） 係人都知韓國盛產士多啤梨，如果去超級市場買手信，千祈唔好錯過蔬果部，因為嗰度經常推出特價時令生果，大大盒士多啤梨都係W6320，即係港紙$50到，而且粒粒清甜，香港$50得十零粒，呢盒起碼40粒起跳，小妹同朋友食咗幾晚先食得晒！ （５）樂天士多啤梨忌廉Bun 呢個士多啤梨忌廉Bun都好值得推介，好味程度僅次於士多啤梨夾心三層蛋糕，一邊忌廉由士多啤梨果肉打成，一邊則係輕盈牛奶忌廉，雙重享受但一啲都唔漏，比起香港個大牌子得啲好Full嘅忌廉相比，呢個Fresh好多。 （６）Petitzel Sweety士多啤梨忌廉卷蛋（士多啤梨／朱古力） 呢個蛋卷雖然Full of Strawberry Cream，但一啲都唔Full，因為都係用新鮮士多啤梨一齊打成Cream，酸酸甜甜咁，個人覺得朱古力味冇咁單調，朱古力微苦可以中和甜味。 （７）士多啤梨粒粒果三文治 呢個三文治一推出，吸引勁多韓妹、Blogger放上IG呃Like，引到一班港女嘩嘩聲！小妹喺韓國行咗勁多間便利店先搵到，而且唔係日日有同間間有，終於畀我喺一間冇乜人行、位於東大門設計廣場地下嘅便利店搵到！所以大家如果想食，可以摷摷啲非旅遊區、非大學區、零人經過區嘅便利店，可能都仲有啲機會！講番味道，個人覺得冇同牌子嘅芒果藍莓醬三文治咁好食，皆因佢士多啤梨肉少又冇乜味，忌廉又較多，所以都係攞嚟呃Like會好啲，期望唔使太大。 （８）芒果藍莓醬三文治 呢個就係上面講嘅好味三文治，佢嘅賣點係極厚超甜芒果肉同新鮮自家製藍莓果醬，本身以為會係個伏，但食落香甜又好味，芒果肉包甜，而藍莓醬又食到打碎咗嘅果肉，真材實料過士多啤梨三文治！ （９）Cafe Snow士多啤梨果粒卷蛋 由士多啤梨海綿蛋糕製成，同上面介紹嘅卷蛋唔同嘅地方，忌廉係純牛奶忌廉，中間仲有粒士多啤梨果肉，雪凍食忌廉會似奶凍，超邪惡但好味！ （１０）이슬톡톡桃味汽泡酒 由韓國人氣歌手IU代言，品牌「真露」推出，粉紅色嘅罐簡直係港女殺手，睇落似汽水，實際上飲落都似汽水，甜甜哋又充滿桃香，勁易入口，雖然有3%酒精，但唔飲得嘅豬豬都飲到，小妹當汽水咁飲，唔使怕！點擊圖片放大 （１１）Tiffany Blue汽酒 呢隻汽酒唔記得係咪同桃味汽泡酒一樣係同一個牌子，但都大受韓國女仔歡迎，皆因又係以汽水Feel做招徠，同樣3%酒精，檸檬味清爽冰涼，勁Fresh！佢仲有士多啤梨味，又係女仔失心瘋時間。 （１２）Petitzel Sweety布甸 Petitzel Sweety出嘅布甸可以話係韓國人氣零食，聽韓國朋友講，未試過呢隻布甸，同冇嚟過韓國一樣，皆因韓國人人都食佢，而且味道選擇多，又香甜幼滑，受歡迎就一定架啦！話說小妹每次去都要買嚟食，尤其係焦糖味，一定係必食之選！ 小妹將佢口味嘅好食程度排列如下（個人口味不同，只作參考）： No.1焦糖味----個人覺得佢嘅雞蛋布甸軟滑得嚟又有啲彈性，加埋焦糖糖漿一齊食，所有配置啱啱好，糖漿唔會過苦，又唔會太甜膩。由於長期熱賣，便利店成日賣斷市，去超市會較易買到。 No.2藍莓芝士味----食落超似食緊藍莓芝士餅呀！ No.3紫薯味----超香濃紫薯味，布甸同樣富有彈性。 No.4朱古力味----質感偏向軟身流心，超似慕絲，有香濃朱古力味。 No.5南瓜味----南瓜味甜品好難難食，但個人覺得呢隻味有啲假，不試為妙。 （１３）Jagabee 韓國限定嘅紫薯味（左下）同蜜糖牛油味（右下）最正，紫薯味仲要係用真．紫薯製成，誠意滿分！鹽味就正常，好似香港都有得買。 （１４）柿乾（購自樂天超市） 韓國人鍾意食柿，如果想長期食到就一定要買製成乾嘅柿，呢個柿乾完全天然風乾至50%，仍保留柿嘅鮮嫩肉質，食落香甜，表面冇白色糖粒結晶，證明甜味純天然。小妹媽咪超級鍾意食，由於只係買咗一盒，佢有啲未夠喉，下次買多幾盒先！不過價錢大概$70到，有啲貴，但堅．好食！ （１５）樂天果汁軟糖 因為出咗隻番茄味所以引起關注，酸酸甜甜勁開胃，仲有士多啤梨、藍莓、提子同橙味，細細包，放喺Office或手袋超方便。 （１６）樂天向日葵瓜子朱古力 嘩！呢個超好食，牛奶朱古力包住向日葵瓜子，你以為風馬牛不相及嘅兩樣嘢，實際係Perfect Match，而且仲會食上癮，每次幾粒幾粒放入口，好快又KO一包，所以一定要大量入貨，小妹掃十包都算係小兒科喇！
