最近星期六日出街都係以西環一帶既餐廳為主,大學站、西營盤、堅尼地城值得去既新餐廳愈開愈多。今次我倆係去完Sky100玩飽後再坐巴士出西營盤,目標係想食好耐既周記點心。 原文網址: http://connie-hk.com/ChauKee 餐廳係良心小店: 外賣自取9折、免茶芥、免加一持長者咭外賣(平日)一律85折,蒸飯一律$15。 周記最出名既係之前大肆報導既流沙西多,個時想食真係一位難求,餐廳又收得早(收六點),想平日放工去既如意算盤都打唔響。 今次去到兩點幾,適逢下午茶時間都要拎飛號碼籌,等左約二十分鐘就有位。餐廳比較細,坐位不多,大部分都近乎背貼背,坐得較為迫狹,但為左美食當然無問題啦!雖然見到餐廳員工忙到甩碌,但服務態度仍是不錯,這點值得一讚! 餐牌上的點心有分煎炸類、包點類、蒸點類、蒸飯和特色點心等,比較特別的有流心西多、蝦多士、鴛鴦燒賣、松露湯餃、鵪鶉蛋燒賣等,其他為較大路點心。周記的點心標旁手工自家製作,招牌流心西多和蝦多士幾乎每一枱都會點。偶然還會推出餐牌上沒有的點心和其他味道的流心西多,看到牆上貼著的大字報便知道。 周記也有供應早餐 (8-11am) 和下午茶餐(2:30-6pm) ,套餐包一杯熱飲,下午茶仲可以試晒招牌點心,還滿抵食的。所以我地今次叫左兩個下午茶餐,另加數款點心已經飽到夜晚都唔使食。 接近每檯必點既奶黃流沙西多士 $35,另外仲有香芋同黑芝麻流沙兩款。炸到金黃色既西多士,中間仲要漲卜卜,用刀切開,真係好流心!奶黃流沙很澎湃不停湧出! 男人最後切成六舊,夾起來不停再蘸奶黃汁! 食落滿口蛋黃香,仲要件西多無話有吸晒油既油膩咁,見到對面食客直情用紙巾印完件西多都無咩油,好得下!真係邪惡又好食,仲幾飽滯添。 除左個瀑布流心西多外,小妹覺得佢地其他點心都好足料!仲有一定一定要試佢地既 招牌芝麻蝦多士 $38,四件多士都炸得香酥不油膩,就算放涼左食咬落既口感都係香酥! 裡頭夾著厚厚帶濃郁蝦味既蝦膠,超豐富,加埋面頭的白芝麻,咀嚼中多左份芝麻香,真係好足料好好食! 鴛鴦燒賣 $26 一籠有兩粒黑松露味、兩粒蟹籽燒賣。其實兩粒燒賣都係一樣,係面頭既配料有分別。燒賣粒粒都飽滿又有大大隻蝦肉,可能習慣吧,小妹都係鍾情蟹籽燒賣,黑松露味香就香,但感覺同燒賣唔多夾。 黑松露湯餃 $20 呢個湯餃蒸一份要等15分鐘架!個湯餃又係好足料,好多蝦肉係入面。當然唔少得仲有松露味,連湯底都有松露味架,唔會太強烈卻恰到好處。食落好香,蝦肉又爽彈!所以忍唔住又追加多份,唔怪之得連隔離枱都一叫叫兩份! 樽仔原味奶茶 $18 呢樽奶茶都好受歡迎,去到近四點已經賣晒飲落茶香味濃,但甜度較高,如果有少甜版本就好喇。 整體黎講周記點心既味道超岩我條脷,而且份量同用料上都覺得新鮮又足料!性價比高,確係用心之作,唔怪之得長期大受歡迎,直到而家都好掛住個蝦多士同湯餃! 周記點心 FACEBOOK、IG 地址: 西環西營盤水街東利大厦地下H1號舖 (港鐵香港大學站 B1 出口, 步行約4分鐘) 電話: 25592389 營業時間: 星期二至日 08:00-18:00 (星期一全日休息) ※本文以用餐當日的環境、服務和食物質素為準,口味亦因人而異,文章只作參考之用。